முதல்வர் வேட்பாளர் எடப்பாடி பழனிச்சாமி

பல்வேறு ஊகங்கள், சர்ச்சைகளுக்குப் பிறகு அதிமுக முதல்வர் வேட்பாளர் எடப்பாடி பழனிச்சாமி அறிவிக்கப்பட்டு இருக்கிறார்.

எடப்பாடி பழனிச்சாமி

கொங்கு பகுதியைச் சார்ந்தவனாக இருந்தாலும், ‘ஜெ‘ காலமான பிறகே எடப்பாடி பழனிச்சாமி என்பவர் ஒருவர் அதிமுக வில் பொறுப்பில் இருப்பதே தெரியும்.

முதல்வர் பொறுப்புக்குப் பழனிச்சாமி வந்தது பெருமையளிக்கும் வகையில் இல்லையென்றாலும், அதன் பிறகு தன்னை நிலை நிறுத்தி மீதி இருந்த நான்கு+ வருடங்களையும் கிட்டத்தட்ட கடந்து விட்டார்.

ஆறு மாதத்தில் கட்சி கலகலத்து விடும், ஆட்சி கவிழ்ந்து விடும் என்று பெரும்பாலானவர்கள் கருதினார்கள்.

ஆனால், அனைவரின் எதிர்பார்ப்பையும் பொய்யாக்கி சர்ச்சைகள் இருந்தாலும், ஆட்சியை நிறைவு செய்யப்போகிறார். Image Credit

முதல்வர் வேட்பாளர் எடப்பாடி பழனிச்சாமி

எடப்பாடி பழனிச்சாமி எனும் ஒருவர் முதல்வராவார் என்பதை பலர் முற்றிலும் எதிர்பார்க்கவில்லையென்றாலும், தற்போது முதல்வர் வேட்பாளராக இவரே தேர்ந்தெடுக்கப்பட வாய்ப்பு அதிகம் என்று எதிர்பார்த்தார்கள்.

அதே போல இபிஎஸ் ஓபிஎஸ் இருவரும் சமரசம் ஆகி, பழனிச்சாமி முதல்வர் வேட்பாளராக அறிவிக்கப்பட்டு விட்டார்.

இதன் பின்னே மறைமுக ஒப்பந்தங்கள் இருக்கும் என்பது அனைவருக்கும் தெரிந்தும் தெரியாமலும் உள்ள உண்மை.

இந்த அறிவிப்பு மிகச்சிறப்பானது என்று எனக்குத் தோன்றும் இரு காரணிகள்.

• நல்லதோ கெட்டதோ தாமதம் செய்யாமல் அறிவிப்பை முன்னரே வெளியிட்டது சரியான நடவடிக்கை.

காலத் தாமதம் செய்வது கட்சிக்குள் தேவையற்ற குழப்பங்களை ஏற்படுத்தும்.

• சசிகலா ஜனவரியில் விடுதலையாகிறார். அவர் வரும் முன்பே சிலதை தெளிவுபடுத்தி விடுவது இவர்கள் இருவருக்குமே நல்லது.

தாமதமான முடிவுகள் இவர்களுக்குப் பெரும் சிக்கலையே கொண்டு வரும்.

எனவே, இது சரியான நேரத்தில் வெளியான அறிவிப்பு. இதன் பிறகு எப்படிப் போகிறது என்பது அவரவர் சாமர்த்தியம்.

ஸ்டாலின்

10 வருடங்களாக ஆட்சியில் இல்லாமல், இந்த முறை எப்படியும் முதல்வர் பதவியை அடைந்தே தீர்வது என்ற உறுதியான முடிவில் ஸ்டாலின் இருக்கிறார் என்பது அவருடைய Aggressive வான நடவடிக்கைகளைப் பார்த்தாலே புரியும்.

வாரத்துக்கு ஓரிரு அறிக்கைகளாக இருந்தவை, தற்போது தின அறிக்கைகளாக மாறி விட்டன. போராட்டங்களும், கடுமையான விமர்சனங்களும் அதிகரித்து விட்டன.

அதிமுக வில் முதல்வர் வேட்பாளர் பிரச்சனை இல்லாமல் சுமூகமாக முடிந்தது திமுக வுக்கு ஏமாற்றம் அளித்து இருக்க வேண்டும்.

பிரச்சனையாகி இருந்தால், கூட்டணி கட்சிகளின் அவசியம் இருந்து இருக்காது.

தற்போதைய சூழ்நிலையில், ஸ்டாலின் முதல்வராவதற்கே அதிக வாய்ப்புகள் உள்ளன. தேர்தல் நேர மாற்றங்களைப் பொறுத்து வெற்றிகளும் மாறும்.

ஆனால், ஸ்டாலினுக்கு இத்தேர்தல் Do or Die என்பதில் மாற்றுக்கருத்தில்லை.

ரஜினி

2021 தேர்தலில் போட்டியிடுவேன் என்று உறுதியாகக் கூறியிருந்தார் ஆனால், கொரோனா இவரின் திட்டங்களைத் தாமதம் செய்து வருகிறது.

மாநாடு நடத்துவதன் மூலமே, மக்களின் ஆதரவை வெளிப்படையாக அறிய முடியும்.

ஆனால், மக்கள் மிகப்பெரிய அளவில் கூடுவது என்பது வரும் காலத்தில் சாத்தியமாகும் சூழ்நிலையில்லை.

எனவே, எப்படி இதைக் கடந்து வரப்போகிறார் என்பது கேள்விக்குறியாக உள்ளது.

ஊடகங்கள் ஆளாளுக்குக் கொரோனா காரணமாக ரஜினி வரமாட்டார் என்று கூறி வந்தாலும், ரஜினியே கூறாதவரை எதுவும் உறுதியில்லை.

தற்போதைக்கு அதிமுக திமுக போட்டி கடுமையாகியுள்ளது.

சமூகத்தளங்களில் பாஜக வையே அதிகம் விமரிசித்து வந்த திமுக, தற்போது அதிமுக பக்கம் கவனம் திருப்பியுள்ளது. இதற்குச் சமீப சுவரொட்டி சண்டைகளைக் கூறலாம்.

தேர்தல் வருவதற்குள் பல அரசியல் திருப்பங்களைக் காண முடியும்.

🛑 To get Finance, Train, Food, UPI, OTT updates, Memes, Tech News, Online Offers follow –> giriblog WhatsApp Channel (WhatsApp Blog ⭐).