கனவில் இருப்பது நிஜத்தில் இருப்பதில்லை | ரஜினி

ரஜினியின் பேச்சுகளுக்குப் பெரிய ரசிகன். அவர் கூறிய பல கருத்துகள் எனக்கு வாழ்க்கையில் மிக உதவியாக இருந்தது, சில நம் வாழ்க்கையை பிரபதிபலிக்கும்.

அது போன்று அவர் கூறிய கருத்து பற்றிய கட்டுரையே இது. Image Credit

கிடைக்கும் வரையே ஆர்வம்

எப்பவுமே கிடைக்கும் வரை, அது எப்போது கிடைக்கும்? எப்படிக் கிடைக்கும்? கிடைக்குமா? என்று நூறு கேள்விகள் இருக்கும்.

இன்னொன்று எதையாவது சாதிக்க வேண்டும் அல்லது ஒன்றை அடைய வேண்டும் என்ற வேட்கை, வெறி, கொள்கை இருக்கும்.

அதை நோக்கிச் செல்லும் போது சுவாரசியமாக இருக்கும், அதை அடைய வாழ்க்கை கடினமாக இருந்தாலும், அதில் ஒரு த்ரில், எதிர்பார்ப்பு நம்மை வழி நடத்தும்.

ஆனால், அதை அடைந்து விட்டால், அந்த மகிழ்ச்சி சில நாட்களே நீடிக்கும். இதையே ரஜினி அடிக்கடி கூறுவார்.

எவரெஸ்ட்டாக இருந்தாலும்…

20 வருடங்கள் போராடி கடனைக் கட்டும் போது கடினமாக இருந்தாலும், அதிலொரு த்ரில் எனக்கு இருந்தது. அது முடிந்த பிறகு Excitement போய் விட்டது.

அதன் பிறகு பலவற்றைத் தாண்டி வந்து இருந்தாலும் போராட்டத்தில் இருந்த Excitement தற்போது இல்லை.

எவரெஸ்ட் ஏறும் வரை ஆர்வம், சாதிக்க வேண்டும் என்ற வெறி இருக்கும் ஆனால், ஏறிய பிறகு ‘அட! அவ்வளவு தானா!‘ என்ற நிலையே ஏற்படும்.

பின்னர் அடுத்த சிகரத்துக்கு ஆர்வம் வருமே தவிர எவரெஸ்ட் சுவாரசியமற்று போய் விடும். சிலது மட்டுமே விதிவிலக்காக எப்போதும் Excitement தரும்.

ரஜினி பேட்டி

ரஜினியை விவேக் பேட்டி எடுத்தார். அதில் இதைப்பற்றிப் பேச்சு வரும் போது,

‘எதையுமே கிடைக்கும், அடையும் வரை தான் Excitement இருக்கும், கிடைத்த, அடைந்த பிறகு அதில் உள்ள ஆவல், த்ரில் போய் விடும்‘.

‘சிலது கிடைக்காம இருக்கும் வரை நல்லது, சிலது கிடைக்காம இருப்பதே நல்லது’.

என்றார் 🙂 .

காதல்

சாந்தி எனும் நடிகை மற்றும் நடனம் ஆடுபவரை உங்களில் பலருக்குத் தெரிந்து இருக்கும். ராஜு சுந்தரம் குழுவில் ஆடுவார், ஒல்லியாக இருப்பார்.

‘மெட்டி ஒலி’ துவக்கப்படலில் இவர் ஆடிப் பிரபலமானார்.

ஒருமுறை படப்பிடிப்பில் தலைவருடன் பேசிக்கொண்டு இருந்த போது இவருடைய காதல் பற்றிக் கேட்ட போது, இவரது காதல் கை கூடவில்லை என்பதை தெரிவித்தார்.

அதைக்கேட்ட ரஜினி

‘அப்படியா! கை கூடவில்லையென்றாலும் அதிலொரு சுகம் உள்ளது. நம் மனதில் அக்காதல் பசுமையாக, எப்போதும் நீங்காத நிகழ்வாக இருக்கும்‘

என்று கூறி இருக்கிறார். இதைச் சாந்தி பேட்டியில் கூறினார். இது உண்மையே.

காதல் கை கூடி திருமணமான பலர் சண்டையாகத் தான் இருக்கிறார்கள், காதலித்த போது இருந்த காதல், அன்பு திருமணத்துக்குப் பிறகு இருப்பதில்லை.

ஒருதலைக்காதல்

ஆனால், அதே ஒரு தலைக்காதலாக இருக்கும், கடைசி வரை காதல் கை கூடாமல், ஆணோ பெண்ணோ வேறு ஒருவரைத் திருமணம் செய்து இருப்பார்கள்.

அல்லது எதோ காரணத்தால், திருமணம் வரை செல்லாது.

ஆனால், இவ்வகை காதலுக்கு அழிவே இல்லை. எவ்வளவு வருடங்கள் கடந்தாலும் ரசித்த காதல் எப்போதுமே மனதில் ஒரு ஓரத்தில் இருக்கும்.

எனக்கு ஒருதலை காதல் என்று கூற முடியாது ஆனால், அப்போது இருந்த வயதில் இனக்கவர்ச்சியாக இருக்கலாம் ஆனால், இன்று வரை மறக்க முடியவில்லை.

இது போல லட்சக்கணக்கானவர்கள் இரு தரப்பிலும் உள்ளார்கள். அவர்களுக்கு எப்போதுமே அந்நினைவுகள் சுகமாகவே இருக்கும்.

இதையே சாந்திக்கு தலைவர் கூறி இருக்க வேண்டும். உண்மையாகவே நினைத்தும் கூறி இருக்கலாம் அல்லது அவரின் ஆறுதலுக்காகவும் கூறி இருக்கலாம்.

சாந்தியும், ‘சார்! உங்களுக்கு இந்த மாதிரி அனுபவம் உள்ளதா?!‘ என்று கேட்ட போது ‘ஆமாம்!‘ என்று கூறி இருக்கிறார்.

எதிர்பார்ப்பில் இருக்கும் Excitement, நடந்த பிறகு இருப்பதில்லை.

இன்று பிறந்தநாள் காணும் ரஜினிகாந்த் அவர்கள் அனைத்து வளங்களும் பெற்று, நல்ல உடல் நலத்துடன் ஆரோக்கியமாக இருக்க இறைவனை வேண்டுகிறேன்.

பிறந்தநாள் வாழ்த்துக்கள் தலைவா! 🙂 .

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.