முதல் மரியாதை ஏற்படுத்திய தாக்கம்

நடிகர் திலகம் சிவாஜி கணேசன் அவர்கள் முதல் மரியாதை படத்தில் நடித்ததை பற்றியும் மற்ற சில தகவல்களையும் பற்றிய இக்கட்டுரை. Image Credit

முதல் மரியாதை

நடிகர் திலகத்துக்கு ஒப்பனை செய்யாமல் அப்படியே இயல்பாக பல காலங்களுக்குப் பிறகு உலவவிட்ட படம் முதல் மரியாதை.

நடிகர் திலகத்தை வேறொரு பரிணாமத்தில் காட்டிய திரைப்படம்.

சிறுவனாக இருந்த போது பழனிக்குக் குடும்பத்துடன் சென்று இருந்தோம். அப்போது அங்கு இருந்த திரையரங்கில் பார்த்த படம், மற்றபடி வேறு எந்த நினைவும் இல்லை.

பெரியவனாகித் திரும்பப்பார்த்து வியப்பான படம் 🙂 .

பாக்யராஜ்

தாவணிக்கனவுகள் படத்தில் நடிகர் திலகத்தை பாக்யராஜ் நடிக்க வைத்து இருப்பார்.

படப்பிடிப்பில் எப்போதும் தயாராக இருக்கும் நடிகர் திலகத்துக்கு வசனங்களைக் கொடுக்காமல் உதவி இயக்குநர்கள் இழுத்தடித்துள்ளனர்.

கடுப்பான சிவாஜி, பாக்யராஜ் வந்தவுடன் கேட்டதும் அவரிடமும் இல்லை. வசனத்தை அப்போது கூறி நடிக்கக் கூறி இருக்கிறார்.

கடுப்பான சிவாஜி காகிதமாக வசனம் கொடுக்காததைக் கேட்டவுடன்,

‘சார் ஏற்கனவே பல முறை படித்து எல்லாமே மனப்பாடம் ஆகி விட்டது‘ என்று கூறியவுடன், ‘இப்படி நான் நடித்ததே இல்லை‘ என்று சலிப்புடன் நடித்துள்ளார்.

பாரதிராஜா

தாவணிக்கனவுகளுக்கு பிறகு பாரதிராஜாவுடன் முதல் மரியாதை நடிப்பதாக முடிவாகி, ஒப்பனையுடன் (Wig) படப்பிடிப்பு தளத்துக்கு வந்துள்ளார்.

பாரதிராஜா, ‘சார் Wig எல்லாம் வேண்டாம், உங்களுடைய இயல்பான முடியுடன் வந்தால் போதும்‘ என்று கூறியுள்ளார்.

சிவாஜி அவ்வாறு நடிக்க மறுத்தாலும், பின்னர் பாக்யராஜ் பாரதிராஜா வற்புறுத்தலில் ஒப்புக்கொண்டுள்ளார்.

முதல்மரியாதை காட்சிகளைப் பின்னணி இசை இல்லாமல் ரசிக்க முடியாது.

பின்னணி இசையில்லாமல் முள்ளும் மலரும் பார்த்துத் தயாரிப்பாளர் எப்படி கோபமானாரோ அது போலத்தான் முதல் மரியாதையும் இருந்து இருக்கும்.

இயல்பான நடிப்பு

ஒரு நபர் தனது வழக்கமான வேலையைச் செய்தால் எப்படி இருக்குமோ அதே தான் முதல் மரியாதை.

சிவாஜியிடம், அப்படிப் பாருங்க, இங்கே திரும்புங்க, நடங்க என்று காட்சிகளைப் பாரதிராஜா எடுத்துள்ளார்.

இதனால் கடுப்பான சிவாஜி பாக்யராஜிடம்,

‘நீ படம் எடுத்த போது வசனம் தான் தெரியவில்லை, இங்க என்ன எடுக்கறாங்கன்னே தெரியல‘ என்று கடுப்பாகி இருக்கார் 🙂 .

‘என்னய்யா எடுக்குற! அப்படி பாரு இப்படி பாருன்னு சொல்ற . . என்னென்னே தெரியாம நான் எப்படி நடிக்கிறது?‘ என்று கோபப்பட்டுள்ளார்.

திட்டினாலும் அவர் கேட்டபடி நடித்துக்கொடுத்துள்ளார்.

கடைசி விவசாயி படத்தில் நடித்த பெரியவரிடம் இப்படிக் கூறித்தான் நடிப்பை இயக்குநர் மணிகண்டன் பெற்று இருக்க வேண்டும்.

இளையராஜா

முதல் மரியாதை படத்துக்குப் பாடல்களும், பின்னணி இசையும் எவ்வளவு முக்கியம் என்று அனைவருக்கும் தெரியும்.

பலருக்கும் தெரியாதது, இளையராஜாக்கு முதல் மரியாதை பிடிக்கவில்லை என்பது.

படம் ஓடாது என்றே முடிவு செய்து படத்துக்கு இசையமைத்துள்ளார் 🙂 பின்னணி இசையை இரு நாட்களில் அமைத்துள்ளார்.

ஒரு மனுசன் பிடிக்காமலே இவ்வளவு அற்புதமாக இசையமைத்துள்ளார் என்றால், இவரின் திறமையை எப்படிக் கணக்கிடுவது?

தொழில் நேர்மை என்று எடுத்துக்கொள்வதா? அல்லது அப்போது தொட்டதெல்லாம் பொன் என்பதாக இவர் எப்படி இசையமைத்தாலும் சிறப்பாக வந்ததா?!

இவரின் தொழில் நேர்மை என்று எடுத்துக்கொள்கிறேன்.

இப்படத்துக்காக SPB யை அணுகிய போது அவரால் வர முடியவில்லை அதனால், திடீர் வரவாக வந்தவர் மலேசியா வாசுதேவன்.

ஆனால், சிவாஜிக்கு இவரின் குரல் அற்புதமாகப் பொருந்தியது. எல்லாமே அமைய வேண்டும்! முதல் மரியாதைக்கு எல்லாமே அமைந்தது.

பாரதிராஜா எப்படி எடுத்து இருப்பார்?

பின்னணி இசை பற்றிப் பல கட்டுரைகளில் கூறியுள்ளேன்.

இயக்குநரின் உணர்வுகளை எப்படி இசையமைப்பாளர் புரிந்து கொள்கிறார் என்பது பலநாள் சந்தேகம்.

முதல் மரியாதை படத்தைப் பின்னணி இசை இல்லாமல் வெளியிட்டால் படம் அனைவரும் நினைத்தது போலத் தோல்வியடைந்து இருக்கும்.

இறுதிக்காட்சியில் பின்னணி இசை இல்லையென்றால் படமே இல்லை.

எடுத்துக்காட்டுக்கு, ராம்கோபால் வர்மா ‘Sarkar‘ படத்தில் துவக்கக் காட்சியில் ஒரு பெரியவர் நடந்து அமிதாப்பிடம் வருவார்.

இப்படியொரு காட்சியை எடுக்கும் போது பின்னணி இசையை மனதில் வைத்து எடுப்பார்களா? முன்னரே திட்டமிடுவார்களா? எப்படி எடுக்கிறார்கள்?!

இதை எப்படி இயக்குநர்கள் சிந்திக்கிறார்கள் என்று எனக்கு புரியவில்லை.

நாம் எடுக்கும் காட்சியை இசையமைப்பாளர் இசையாக உணர்வுப்பூர்வமாகக் கொடுப்பார் என்று நினைப்பார்களா?

இந்தச் சந்தேகம் என்னை அரித்தெடுக்கிறது!

ரஜினி கூறியது போல பாட்ஷா, ஜெயிலர் போன்ற படங்களுக்கு பின்னணி இசை படத்தைப் பல படி மேலே தூக்கியது என்றால், மிகையில்லை.

ஒளிப்பதிவு கோணங்கள்

பலரும் நினைப்பது போல அனைவரும் சிறப்பாக நடித்துத்தான் படம் வெற்றியாகிறது என்பது தவறு.

ஒளிப்பதிவு கோணங்கள், பின்னணி இசை மூலமாகக் காட்சியை மேம்படுத்தி விடுகிறார்கள். திரையில் நம்மால் உணர முடியாது.

வெவ்வேறு கோணங்களில் எடுக்கும் போது தவறுகளை மறைத்து விடுவார்கள். சரியாக முகபாவனை கொடுக்காத காட்சியைப் பின்புறம் இருந்து எடுக்கும் ஒளிப்பதிவால் காண்பித்து விடுவார்கள்.

சிவாஜியை அப்படி திரும்புங்க, நேரா நடங்க, அந்தப்பக்கம் பாருங்க, சிரிச்சிட்டே வாங்க, கோபமா நடங்க என்று கூறி சிறு சிறு காட்சியாக எடுத்துள்ளார்.

எனவே, சிவாஜி கோபப்பட்டதில் நியாயம் இருந்துள்ளது.

‘என்னய்யா எடுக்குற?! எனக்கு நடித்த திருப்தியே இல்லை‘ என்று கோபப்பட்டுள்ளார் 🙂 .

திரைப்படம்

திரைப்படங்கள் எப்போதும் வியக்கத்தக்கவை!

எப்படிப்பட்ட நடிகர் சிவாஜி! ஆனால், அவருக்கே சந்தேகம் வந்து கடுப்பாகி நடித்தாலும், அவரே எதிர்பார்க்காத அளவுக்கு வெற்றியானது.

சிவாஜி அவர்கள் எப்போதுமே உணர்ச்சிவசப்பட்டு ஆக்ரோஷமாக நடிப்பார், இதற்கு இவர் முன்னர் நாடகத்தில் நடித்ததின் பாதிப்பும் உள்ளது.

முன்பு வசனங்கள் பக்கம் பக்கமாக இருக்கும் ஆனால், இதன் பிறகு வசனங்களின் நீளம் குறைந்து விட்டது.

எனவே, இவை எதுவுமே இல்லாமல் மென்மையாக உணர்வுகளை வெளிப்படுத்தும் இயல்பான காட்சியாக அனைத்துமே இருந்ததால், கடுப்பாகியுள்ளார்.

ஆனால், கொஞ்சம் கூட எதிர்பார்க்காமல் அவர் எண்ணத்துக்கு முற்றிலும் மாறாக அசத்தலாக படம் வெளியானதில் மிக மகிழ்ந்து உள்ளார்.

வடிவுக்கரசி அநாகரீகமாக நடக்கும் போது, அவரிடம் வெறுப்பைக் கூட மென்மையான முகபாவனைகளில் காண்பித்து நகர்வார்.

நடிகர் திலகத்தின் சிறந்த 10 படங்களை எடுத்தால், பத்தில் ஒன்றாக முதல் மரியாதை நிச்சயம் இருக்கும்.

16 வயதினிலே, முதல் மரியாதை படங்களே தமிழ் திரைப்படங்களின் பாணியையே, பார்வையையே அக்காலத்தில் மாற்றி விட்டது.

எனவே தான் பாரதிராஜா ஒரு Trendsetter ஆக பெயர் பெற்றுள்ளார்.

🛑 To get Blog Articles, Finance, OTT, Tech News, Offers follow 👉🏻 giriblog WhatsApp Channel ⭐.