சேட்டை – தண்ணீர் பஞ்சம் – திட்டுகள் – WhatsApp

இந்தப்படத்தில் இருக்கும் பெண் ஒரு பிரபலத்தின் மகள். யார் என்று கண்டுபிடியுங்கள்? எளிதாகக் கண்டு பிடித்து விடலாம். முடியாதவர்களுக்கு சின்ன க்ளு, இந்த பிரபலம் தமிழர்களுக்காக உயிரைக் கொடுப்பவர்கள் பட்டியலில் முதலாக இருப்பவர் . Image Credit thatstamil

கடந்த திங்கள் மற்றும் செவ்வாய் சீனப் புத்தாண்டு. அதனால் சிங்கப்பூரில் பெரும்பாலான கடைகள் மூடப்பட்டு இருக்கும், குறிப்பாக எந்த ஒரு Food Court ம் திறந்து இருக்காது. அறிவிக்கப்படாத பந்த் போல இருக்கும், இந்த முறை அப்படி இல்லை. சாப்பிட லிட்டில் இந்தியா தான் செல்ல வேண்டி இருக்கும். சிங்கப்பூரில் அனைத்து சமுதாயத்தினருக்கும் இரண்டு நாட்கள் அரசு விடுமுறை வரும் அதில் சீனர்களுக்கு இந்த இரு நாள். சீனாவில் ஒரு வாரம் புத்தாண்டை கொண்டாடுவார்கள்.

ஆர்யா நடித்த “சேட்டை” விரைவில் வரப்போகிறது. இதில் உள்ள “நீ தாண்டி ஒஸ்தி பொண்ணா” என்ற குத்துப் பாடல் சூப்பர் ஆக இருக்கிறது ஆனால், பாடல் இரட்டை அர்த்தப் பாடலாக விவகாரமாக இருக்கிறது. ஒஸ்தி வார்த்தை மட்டுமல்ல பாடலின் இசை கூட அது போல தான் சில இடங்களில் உள்ளது. இரண்டிற்கும் (ஒஸ்தி / சேட்டை) இசை தமன் தான். Click Play

இதைப்பாடியவர் குரலை எங்கேயோ கேட்ட மாதிரி இருக்கே என்று தேடினால், அட்டக்கத்தி படத்தில் “ஆடி போனா ஆவணி” பாடலைப் பாடிய கானா பாலா. அட்டக்கத்தி படம் பற்றிக் கூறியதும் கடந்த வாரம் திரும்பப் பார்த்த “ஆடுகளம்” நினைவிற்கு வருகிறது. இதில் டாப்சியை தனுஷ் உட்பட இருவர் காதலிப்பார்கள்!! [சண்டை கூட நடக்கும்] அந்த இன்னொரு நபர் அட்டக்கத்தி ஹீரோ தினேஷ் . இது எப்படி இருக்கு!

சிங்கப்பூரில் கடந்த 5 நாட்களாக கடும் மழை. காற்று கூட அடிக்காமல் தொடர்ந்து மழை பெய்து வருகிறது. எங்க ஊர்ல எல்லாம் குடிக்கவே தண்ணீர் இல்லாமல் சிரமப்படுகிறார்கள். எங்கே பார்த்தாலும் கிராமத்தில் போர் போட்டுக்கொண்டு இருப்பதாக அம்மா கூறினார்கள். இங்க பெய்யுற ஒரு நாள் மழை எங்க ஊர்ல பெய்தால் கூட போதும். இந்த வருடம் தண்ணீர் பஞ்சம் மிகக் கொடுமையாக இருக்கும் என்று அனைவரும் கூறுகிறார்கள். தண்ணீர் அதிகமாக உள்ள எங்கள் ஊர் [கோபி] பக்கமே இந்த நிலை என்றால்…!

கமல் படத்திற்கு விமர்சனம் எழுதினால் தான் பிரச்சனை என்று இனி எழுத மாட்டேன் என்று கூறினால் அதற்கு அதை விட அசிங்க அசிங்கமா கமெண்ட் மாடரேசன் போடுற அளவிற்கு திட்டறாங்க. என்ன கொடுமை சார் . ஒரு படம் புரியலன்னு சொன்னது ஒரு தப்பாயா! பேசாம கமல் பேட்டியையே விமர்சனம் என்று எடுத்துப்போட்டு இருந்தால் யாரும் புரியலைன்னு எதுவும் சொல்லாம இருந்து இருப்பாங்களோ! .

Read: கமல் பட திரை விமர்சனத்திற்கு இனி “கதம் கதம்”

கிரி யார் சொன்னா என்ன? இது உங்க தளம்! நீங்க யாரையும் கையப் பிடிச்சு இழுத்து வந்த படிக்கக் கூறல அப்புறம் என்ன? இது போல கூறுபவர்களை புறந்தள்ளுங்கள் உங்கள் மனதில் பட்டதை எப்போதும் போல கூறுங்கள் என்று நண்பர்கள் கூறினார்கள்.

உண்மையில் யாரும் கூறுவதற்காக நான் கமல் பட விமர்சனம் எழுதுவதை நிறுத்தவில்லை. எனக்கே திருப்தி இல்லாமல் இருந்தது, திருப்தி தராத எதையும் எழுதுவதில்லை. அதனால் தான் நீண்ட காலமாக மனதில் இருந்ததை தற்போது கூறி இருக்கிறேன், அவ்வளவு தான். வேறு எதையும் நிறுத்தும் எண்ணமும் இல்லை.

நீங்க ஏன் விமர்சனம் எழுதலைன்னு சொல்லறீங்க.. இனி வரும் படங்களுக்கு எழுதாமல் விட்டு விட வேண்டியது தானே! என்று கேட்டு இருந்தார்கள்.. நியாயம் தான் ஆனால், ஒவ்வொரு முறை படம் வரும் போதும் இதற்கு நான் விளக்கம் கொடுத்துட்டு இருக்கணும். இது வேண்டாத வேலை அதனால் தான் இதை எழுதினேன்.

என்ன திட்டினாலும் ஸ்பாம்க்கு போகிற மாதிரி ஃபில்டர் [காபி அல்ல] போட்டு விட்டேன். ஹி ஹி நமக்கு தெரியாத கெட்ட வார்த்தையா! புதுசா ஏதாவது வந்தா இன்று ஒரு தகவல் மாதிரி இன்று ஒரு கெட்ட வார்த்தையா தெரிந்துக்க வேண்டியது தான் . கிரிக்குள்ள மோசமான இன்னொருத்தன் இருக்கான் . நான் இவங்க அளவுக்கு இறங்கி சண்டைப் போட்டால் என்னுடைய தளம் படிக்க சாக்கடை மாதிரி தான் இருக்கும், அதை நான் விரும்பவில்லை.

மற்றபடி எனக்கு இதற்காக ஆதரவு தெரிவித்த நண்பர்களுக்கு மிக்க நன்றி. என்னுடைய முடிவில் எந்த மாற்றமும் இல்லை. யாருக்காவும் நான் மாற்றிக்கொள்ளவில்லை இது என்னுடைய தனிப்பட்ட முடிவே. ஏனென்றால் நாங்க… இதைக் க்ளிக்குங்க Click Play

“எரியும் பனிக்காடு” என்ற புத்தகத்தைப் படித்துகொண்டு இருக்கிறேன். இந்த[உண்மை]க் கதையைத் தான் இயக்குனர் பாலா “பரதேசி” படமாக எடுத்து இருப்பதாகக் கூறப்படுகிறது. இதுவும் இந்தப்புத்தகத்தை நான் வாங்க ஒரு காரணம். விரைவில் இதன் “விமர்சனம்” எழுதுகிறேன். “பாலா” எல்லாம் இதுக்கு சண்டைக்கு வர மாட்டார்னு நினைக்கிறேன் .

இந்த முறை ஊருக்கு போன போது எனக்கும் என் அப்பாவிற்கும் பஞ்சாயத்து ஆகி விட்டது. பயந்துடாதீங்க… சும்மா லுலுலாயிக்கு . என்னோட அப்பா நான் சிறியவனாக இருக்கும் போது ஒண்ணுமே வாங்கித் தரலை. ஒரே ஒரு துப்பாக்கி, அதுவும் நான் சண்டைப் போட்டு கேட்டதும் கோவை “லக்ஷ்மி காம்ப்ளெக்ஸ்” ல் வாங்கிக் கொடுத்தார்.. பார்த்தீங்களா இடத்தைக் கூட எவ்வளவு நினைவு வைத்து இருக்கேன் என்று .

இப்ப என்னடான்னா… என் பையன் வினய்க்கு அவன் கேட்காமையே அது இதுன்னு வாங்கிக் கொடுத்துட்டு இருக்காரு. “அப்பா! எனக்கு ஒண்ணுமே வாங்கித் தரல இவனுக்கு இவ்வளவு வாங்கித் தரீங்களே” என்று சண்டைக்குப் போயிட்டேன்.. உடனே அப்பா “அதெல்லாம் ஒண்ணுமில்ல… உனக்கும் தான் வாங்கிக் கொடுத்தேன்” என்று கொளுத்திப் போட்டாங்க.. கடைசியில என்னோட அம்மா, நாட்டாமை மாதிரி வந்து எனக்கு சப்போர்ட் பண்ணியதும்.. அமைதி ஆகிட்டாங்க. நீங்களே ஒரு நியாயத்தை சொல்லுங்க.. .

நீங்கள் ஸ்மார்ட் ஃபோன் பயன்படுத்துபவர் என்றால் WhatsApp என்ற Apps கேள்விப்பட்டு இருப்பீர்கள், இன்னும் கேள்விப்படவில்லை என்றால் இப்ப “பட்டுக்குங்க” . இணையத் தொடர்பு இருந்தால் போதும் உலகில் யாருக்கு வேண்டும் என்றாலும் இதே போல App வைத்து இருப்பவர்களுக்கு இலவசமாக SMS அனுப்பலாம். இது போல App நிறைய இருந்தாலும் இது தான் பிரபலம். நான் SMS அதிகம் பயன்படுத்துவதில்லை. இதை நான் எதற்குக் கூறினேன் என்றால், இப்ப மொபைல் நிறுவனங்கள் SMS க்கு பல திருட்டு வேலைகள் செய்து வசூல் செய்கின்றன. எனவே நீங்கள் ஸ்மார்ட் ஃபோன் (இணையத்துடன்) வைத்து இருந்து உங்கள் நண்பர்களும் வைத்து இருந்தால் இதைப் பயன்படுத்துங்கள். ஐந்து பைசா கூட இவர்களுக்கு கொடுத்துடக் கூடாது. எவ்வளவு வசதி இருக்குதோ அத்தனையையும் பயன்படுத்தி இவர்களுக்கு வேட்டு வைக்கணும் என்பது தான் என் பாலிசி .

இதில் குரூப் சாட் கூட உண்டு, 30 பேர் வரை இதில் இணைந்து சாட் பண்ணலாம். இதில் நீங்கள் படங்கள், வீடியோ மற்றும் ஆடியோ கூட அனுப்ப முடியும். என்னோட அக்கா பையன் இதை போன வாரம் நிறுவிட்டு எனக்கு, மாம்ஸ்! குட் மார்னிங், குட் ஈவ்னிங், குட் நைட் என்று கூறி, என்ன சாப்பிட்டீங்க? போன்ற மிக முக்கியமான கேள்விகள் கேட்டுட்டு இருக்கான். இது கூட பரவாயில்ல… எனக்கு சம்பந்தமே இல்லாத ஐன்ஸ்டீன் போன்ற அறிஞர்கள் பொன்மொழி எல்லாம் அனுப்பிட்டு இருக்கான் . இந்தியாவில் SMS அதிகம் பயன்படுத்தப்படுவது “கடலை” “மொக்கை” போடுவதற்குத் தான் என்று “நாசா”வில் பல ஆராய்ச்சிக்குப் பிறகு கண்டு பிடித்து இருக்கிறார்களாம் .

Tagged as: கொசுறு