“ரஜினி” பேசியது தவறா?

சேவை வரி பற்றி ரஜினி கூறிய கருத்துக்கு வழக்கம் போல பலரும் திட்டிப் பேசிக்கொண்டு இருக்கிறார்கள்.

ரஜினி கூறியதில் என்ன தவறு என்று எனக்கு சத்தியமாக புரியவில்லை. திட்டுபவர்கள் எல்லாமே, “கோடி கோடியாக சம்பாதிப்பவர்கள் தானே! பணம் கட்டட்டுமே!!” என்று தான் கூறுகிறார்கள். அதாவது இவ்வாறு கூறுபவர்கள் அனைவரின் எண்ணமும், பணம் நிறைய வைத்து இருக்கிறார்கள் பணத்தை வரியாகக் கட்டட்டுமே! ஏழைகளுக்கு பயன்படுட்டுமே அந்தப்பணம் என்று கூறுகிறார்கள்.

நல்ல விஷயம் தான். ஏழைகளுக்கும் ஒரு விஷயம் பயன்படுகிறது என்றால் அது வரவேற்க்ககூடிய விஷயம் தான் அதில் எந்த சந்தேகமும் இல்லை ஆனால், இருப்பதையே சரியாக செய்யாத போது மீண்டும் மீண்டும் வரியை கூட்டுவதால் என்ன பயன்? இதுவரை போட்ட வரிகளை ஒழுங்காக வசூலித்து இருக்கிறார்களா? இந்தியாவில் வரியை (வேறு வழியில்லாமல்) ஒழுங்காக கட்டும் ஒரே இளிச்சவாய ஜீவன் மாத சம்பளக்காரர்கள் மட்டும் தான், அது கூட நிறுவனமே சம்பளம் கொடுக்கும் போதே பிடித்து விட்டு கொடுப்பதால் தான்.

வேறு எவருமே வரியை ஒழுங்காக கட்டுவதில்லை (விதி விலக்குகள் தவிர்த்து). அனைத்து நிறுவனங்களும் பொய் கணக்குக் காட்டி, பொய் நட்டம் காட்டி அரசாங்கத்தை ஏமாற்றுகிறார்கள். பெரிய வணிக நிறுவனங்கள், சிறு வணிகர்கள், தொழில் அதிபர்கள், அரசியல்வாதிகள், நகைக்கடை அதிபர்கள், நடிகர்கள் தங்கள் வரியை ஒழுங்காக கட்டி இருந்தால் நமக்கு போடும் 30 சதவீத வரியையே இன்னும் குறைக்க முடியும், காரணம் அனைவரும் ஒழுங்காக வரி கட்டினால் வரும் பணம் அவ்வளவு இருக்கும் (“முதல்வன்” பட காட்சியை ஒரு முறை நினைவூட்டுங்கள்).

இதை புரிந்து கொள்ளாமல் ரஜினியை எதிர்க்கிறேன் பேர்வழி என்று, என்ன கூறினாலும் தையா தக்கான்னு குதிக்க வேண்டியது. அடிப்படை பிரச்னையைப் புரிந்து கொள்ளாமல் மேலோட்டமாக வரியை உயர்த்துவதாலோ, விலையை உயர்த்துவதாலோ எந்த பலனும் இல்லை. சேவை வரியை போட்டால் உடனே எல்லோரும் கட்டி விடுவார்களா! இதை எப்படி கருப்பு பணத்தில் வாங்கலாம் என்று தான் யோசிப்பார்கள். உனக்கு விதிக்கும் வரிக்கு எப்படியெல்லாம் தப்பிக்கிறது என்று யோசனை பண்ணும் போது, அவர்கள் யோசிக்க மாட்டார்களா! தமிழில் பெயர் வைத்தால் வரி விலக்கு போன்ற சலுகைகளை நீக்க வேண்டும் என்றால், அது நியாயமான ஒன்று. இதை வைத்து எத்தனை பேர் கொள்ளை அடித்தார்கள். “சிவாஜி” படத்திற்கு கூட, அது பெயர்ச்சொல் என்ற ஓட்டையில் சலுகை வழங்கப்பட்டது. இது போன்ற வரிச் சலுகைகளே தவறான ஒன்று. நமக்காவது சம்பளம் தெளிவாக இருக்கும், LIC வீட்டுக்கடன் என்று முக்கி முக்கி தான் சமாளிக்க வேண்டும். இவர்களுக்கு அந்தப் பிரச்சனையே இல்லை, எளிதாக ஏமாற்ற முடியும்.

எந்த இயற்கை வளமும் இல்லாத சிங்கப்பூரில், இங்கே உள்ள சிறு இடத்தை வைத்துக்கொண்டு, வெளிநாட்டு நிறுவனங்களை இங்கே தொழில் துவங்க அனுமதித்து, இருக்கும் வசதிகளை மேம்படுத்தி, சுற்றுலாவை ஊக்கப்படுத்தி அதன் மூலம் வருமானத்தைப் பெருக்கி, அளவில்லா அடிப்படை வசதிகளை மக்களுக்கு கொடுத்து 7 சதவீதம் வரி தான் வசூலிக்கிறார்கள் காரணம், இங்கே வரி ஒழுங்காக கட்டப்படுகிறது ஏமாற்றுபவர்கள் மீது கடுமையான நடவடிக்கை எடுக்கப்படுகிறது. இதே சவூதி போன்ற நாடுகளில் வரியே இல்லை, இது கூட அங்கே எண்ணெய் வளம் இருப்பதால் அவர்களால் வரி விதிக்காமல் இருக்க முடிகிறது என்று கூற வாய்ப்பு ஆனால், சிங்கப்பூரில் அது போல எந்த இயற்கை வளமும் கிடையாது இருந்தும் அவர்கள் 7 சதவீத வரி தான் விதிக்கிறார்கள். நம் அரசாங்கம் 30 சதவீத வரியை பெற்றும் ஒழுங்கான அடிப்படை வசதிகளை செய்து தருவதில்லை.

சிங்கப்பூருடன் நம் நாட்டை ஒப்பிட முடியாது என்பதை அறிவேன், காரணம் வரி செலுத்த முடியாத அளவிற்கு ஏழை மக்கள் மிகுந்த நாடு. இதை ஒரு சிறு உதாரணத்திற்கு தான் கூறினேன்.

இதை எளிதாக புரிய வைக்க நம் தமிழகத்தை உதாரணமாக எடுத்துக்கொள்ளலாம். பேருந்துக் கட்டணத்தை சமீபத்தில் கடுமையாக உயர்த்தினார்கள். 10 வருடமாக உயர்த்தவில்லை அதனால் உயர்த்தி இருக்கிறார்கள் என்று கூறலாம் ஆனால், அரசு பேருந்தில் போலியாக சலுகைகளை அனுபவிப்பவர்களையும், அதில் நடக்கும் ஊழல்களையும், உதிரி பாகங்கள் வாங்குவதில் நடக்கும் தில்லு முள்ளுகளையும் கண்டறிந்து அதை சரி செய்தால் நமக்கு பேருந்து கட்டண உயர்வே அவசியமில்லை. இந்த அடிப்படை பிரச்சனைகளை சரி செய்யாமல் பயணச்சீட்டின் விலையை உயர்த்திக்கொண்டு இருந்தால் அதனால் மக்களின் சிரமம் தான் கூடுமே தவிர குறையாது. அரசின் பளு கொஞ்ச நாள் சரியானது போல இருக்கும் திரும்ப நட்ட கணக்கு தான் காட்டுவார்கள். முதலில் பிரச்சனைக்கான அடிப்படை காரணத்தை தான் சரி செய்ய வேண்டுமே தவிர கூடுதல் வரியோ / கட்டணமோ பிரச்சனையை தீர்க்காது, மேலும் அதை எப்படி கட்டாமல் தவிர்க்கலாம் என்று தான் கணக்கு போடுவார்கள். இதை தான் ரஜினி கூறினார். இதில் அப்படி என்னய்யா குற்றத்தை கண்டுபிடித்தீங்க!

நான் ரஜினி கூறியதால் இதைக் கூறவில்லை இது பற்றிய என்னுடைய கருத்தை எப்போதே தெரிவித்து விட்டேன், பின்வரும் பதிவில்.

Read: விலை உயர்வு பிரச்னைக்குத் தீர்வாகாது [November 2011]

இவ்வளவு பேசுறீங்களே! என்ன சொன்னீங்க.. கோடி கோடியாக சம்பாதிக்கறாங்களே வரியை (30% + 12%) கொடுக்கட்டுமே என்பது தானே…! சரி! உங்களுக்கு அவர்கள் கோடி கோடியாக சம்பாதிக்கிறார்கள் அதனால் கொடுக்கட்டும் என்கிறீர்கள்.. உங்களுக்கு கீழே இருப்பவர்களுக்கு நீங்கள் லட்சம் லட்சமாக சம்பாதிப்பதை பார்க்கும் போது உங்களுக்கு வரியைப் போட்டு ஏழைகளுக்கு உதவலாமே என்று கூறினால் ஏற்றுக்கொள்வீர்களா! வரியை தவிர்க்க என்னவெல்லாம் தில்லு முள்ளு நாம பண்ணுறோம்! எதில் எல்லாம் ஓட்டை இருக்கோ அதை எல்லாம் பயன்படுத்தி எப்படி வரி கட்டுவதை குறைப்பது என்று தானே பார்க்கிறோம். ஏழைகள் மீது கரிசனம் உள்ள நீங்க எதுக்குயா இது மாதிரி பண்ணுறீங்க… வரியை ஏமாற்றாமல் முழுவதும் கட்டி மக்கள் நலனுக்கு / வளர்ச்சிக்கு உதவ வேண்டியது தானே!

இந்த வரிப்பணம் முழுக்க ஏழைகளுக்கு தான் பயன்படுத்துகிறார்கள் என்று நம்புகிற அளவிற்கு அப்பாவியா நீங்கள். அரசியல்வாதிகள் வெளிநாடுகளுக்கு சுற்றுலா போகவும், இலவசம் கொடுத்து மக்களை சோம்பேறிகள் ஆக்கவும், லட்சம் லட்சமாக செலவழித்து விழாவை கொண்டாடவும், அரசியல்வாதிகள் சலுகைகளை அனுபவிப்பதற்கும் பயன்படும் பணம் எது என்று உங்களுக்கு தெரியாதா! மக்கள் வரிப்பணத்தை மக்களுக்காகவே முழுமையாக பயன்படுத்தி இருந்தால் இந்நேரம் நாமெல்லாம் அடிப்படை தேவை பிரச்சனைகளுக்காக இவ்வளவு சிரமப்பட்டு இருக்க மாட்டோம். ஏழைகளுக்கு பயன்படுத்தும் பணத்தில் எத்தனை கொள்ளை! ஊழல்!! உண்மையான ஏழை பலனை அடைவது மிகக் குறைவே! தகுதியற்றவர்கள் தான் பயனடைந்து வருகிறார்கள்.

இது போல நிகழாமல் இருக்க, வசூலிக்கப்படும் வரி நியாயமானதாக இருக்க வேண்டும். ஏமாற்றுபவர்கள் மீது கடுமையான நடவடிக்கை எடுக்கப்பட வேண்டும். மக்களிடம் வசூலிக்கப்படும் வரி முழுமையாக மக்களுக்கு பயன்படுத்தப்பட வேண்டும். பிரச்சனையின் மூலத்தை விட்டு விட்டு, வரியை உயர்த்து வரியை உயர்த்து என்று பொய் வேஷம் போடுவதால் எந்த பலனும் இல்லை. பட்ஜெட் ல நமக்கு வரி அதிகம் செய்யட்டும்.. அப்புறம் பாருங்க.. அவனவன் புலம்பி தள்ளுவான். சார்! நீங்க இரண்டு நாளைக்கு முன்னாடி அதிக வரி விதித்து ஏழைகள் பயன்பெறட்டும் என்று கூறினீர்களே! என்று கேட்டால்.. யோவ்! அது நடிகர்களுக்குயா எனக்கில்ல! என்று தான் வரும். ஏழைகள் மீதான கரிசனம் காணாமல் போய் விடும், இந்த குபீர் கரிசனவாதிகளுக்கு.

ஏழைகள் மீது கரிசனம் உள்ளது போல பேசுவது எல்லாம் நடிப்பு.. அவன் அதிகம் சம்பாதிக்கிறானே! என்ற வயித்தெரிச்சல் தான் உண்மை. ஏழைகள் மீது அன்பு இருந்தால் உன்னை யார் தடுத்தா, தாரளமாக உதவி செய். நீ கோடி கோடியாக சம்பாதிக்கும் இவர்களைப் பார்த்து நினைப்பதைப் போலத்தான், உனக்கு கீழே உள்ளவன் உன்னைப் பார்த்து நினைப்பான் என்பதை மறந்து விடாதே! ஏழைக்கு, உண்மையா இதுவரை உன்னோட வாழ்க்கையில் நீ என்ன செய்து இருக்கேன்னு! உன் மனசாட்சியை கேட்டுப்பார்! அடுத்தவன் மட்டும் ஏழைக்கு உதவவேண்டும் என்று எதிர்பார்க்காதே! உனக்கு கோடி எப்படி அவர்கள் அதிகம் சம்பாதிப்பது போல தோன்றுகிறதோ! அது போல நீ லட்சம் சம்பாதிப்பது உனக்கு கீழ் உள்ளவர்களுக்கு அதிகமாகத் தெரியும்.

ஒருத்தர் சொல்லுற விஷயத்தை மட்டும் கவனிங்க… அது சரியா தவறா என்று! ரஜினி சொல்லிட்டாரா… ஓகே…! உடனே facebook ல நக்கலா ஒரு ஸ்டேடஸ் போடு! திட்டி இரண்டு பதிவைப் போடுன்னு கிளம்பாதீங்க. பிரச்சனையின் மூலத்தை கண்டறிந்து அதை தான் சரி செய்ய வேண்டுமே தவிர! இது போல வரியை கூட்டிக்கொண்டு போவதாலோ, விலையை உயர்த்துவதாலோ எந்தப்பயனும் இல்லை, மாறாக நமக்குத் தான் சிரமம்.

உதாரணத்திற்கு இந்திய அரசு நாளை, 30 % வரியை 35 % என்று உயர்த்தினால் வழக்கம்போல இளிச்சவாயன்களான மாத சம்பளக்காரர்களும் மற்றும் சிலரும் தான் முழுதாக கட்டுவார்கள், மற்றவர்கள் வழக்கம் போல ஏமாற்றிக்கொண்டு தான் இருப்பார்கள். இப்பச் சொல்லுங்க யார் பாதிப்படைவார்கள்!! இது நடிகர்களுக்கு மட்டும் கூறவில்லை, நமக்கும் பின்னாளில் அதிகப்படுத்தப் போகும் வரிக்கும் சேர்த்துத் தான் கூறி இருக்கிறேன்.

இன்னும் கொஞ்சம் எளிதாகக் கூறுகிறேன். நான் மேற்கூறியதை எல்லாம் விட்டு விடுங்க.. ரஜினி ஒரு நடிகன், திரையுலகப் போராட்டம் அனைத்தையும் மறந்துடுங்க. இப்ப ரஜினி கூறியதில் மையக்கருத்தை மட்டும் கூறுகிறேன்.. டென்ஷன் ஆகாம பொறுமையா கேளுங்க!

“வரியை உயர்த்துவதால் அனைவருக்கும் சிரமமே! அதனால் வரி வசூலிக்கும் முறையை இன்னும் கடுமையாக்குங்கள். வரியை ஒழுங்காக கட்டாதவர்கள் மீது கடும் நடவடிக்கை எடுங்கள். இதனால் புதிய வரி போட வேண்டிய தேவையே இருக்காது” இது தான் ரஜினி கூறியதின் மையக்கருத்து. இவர் கூறியது திரையுலகினருக்கு மட்டுமல்ல அனைத்து தரப்பினருக்கும் பொருந்தும். வருமானவரி தவிர நீங்கள் வாங்கும் சம்பளத்திற்கும் வரி போட்டால் நீங்கள் ஏற்றுக்கொள்வீர்களா?

இதே விஷயத்தை ஒரு நடிகன் எனப்படும் “ரஜினி” கூறாமல், ஒரு சாதாரண பொதுஜனம் கூறி இருந்தால் தற்போது கூப்பாடு போடும் அனைவரும் “ஆமாம்! இவர் கூறுவது சரி தான்” என்று ஏற்று இருப்பீர்கள் ஆனால், கூறியது நடிகன் அதுவும் கோடி கோடியாக சம்பாதிக்கும் கன்னட நடிகன். இது போதாதா இதை எதிர்த்து நிற்க.

இது மட்டும் தான் நான் கூற நினைத்தது ஆனால், பதிவர் “டாக்டர் ப்ருனோ” அவர்கள் இது குறித்து விளக்கி இருக்கிறார். இதைப் பார்த்தால் நாளைக்கு நமக்கும் இதே போல சேவை வரி வர வாய்ப்பு இருப்பதாகவே உள்ளது. அப்போது, இப்ப பரதநாட்டியம் ஆடினவங்க எல்லாம் எங்கே போய் முகத்தை வைப்பீங்க. இவர் விளக்கி இருப்பதைப் பார்த்தால் நான் மேலே கூறியது ஒன்றுமே இல்லை என்பது போல இருக்கிறது.

நன்றி டாக்டர் ப்ருனோ

1. சேவை பெறுவதில் இரு நிலைகள் உள்ளன

Contract of services

Contract for services

An employee-employer contract is a contract of service

A contractor-client contract is a contract for services

Click Here – https://plus.google.com/103532248719081060544/posts/hDAGbbNJSju

2. வீடு கட்டும் தொழிலாளிகளுக்கு அளிக்கும் கூலியில் பத்து சதம் அரசிற்கு வரியாக கட்ட வேண்டும் என்றால், உங்களில் எத்தனை பேர் அதற்கு சம்மதிப்பீர்கள்?

Click Here – https://plus.google.com/103532248719081060544/posts/KJDp4QydFsV

3. உங்கள் வாகன ஓட்டுனருக்கு நீங்கள் அளிக்கும் சம்பளத்தில் 12 சதம் அரசிற்கு வரியாக கட்ட வேண்டும் என்றால், உங்களில் எத்தனை பேர் அதற்கு சம்மதிப்பீர்கள்?

Click Here – https://plus.google.com/103532248719081060544/posts/AvSeFs2zhue

4. வருமான வரி தவிர நீங்கள் வாங்கும் சம்பளத்தில் 12 சதம் வரி கட்ட வேண்டும் என்றால், உங்களில் எத்தனை பேர் ஆதரிப்பீர்கள்?

Click Here - https://plus.google.com/103532248719081060544/posts/Chi7pbLBS15

நமக்கு வந்தா ரத்தம் அடுத்தவனுக்கு வந்தா தக்காளி சட்னின்னு நினைக்கிற ஒவ்வொருவருக்கும் என்றாவது ஒரு நாள் ஆப்பு வரத்தான் போகுது. அப்ப வடை போச்சே! னு திருட்டு முழி முழித்துட்டு இருப்பீங்க. அப்ப எவனாவது வந்து உங்க கிட்ட “சார் / மேடம்! உங்க சேவை வரி, ஏழைகள் நலனுக்குத் தானே போகுது ஏன் வருத்தப்படுறீங்க?” என்று கேட்டால் உங்கள் வாயில் இருந்து வரும் வார்த்தை என்னவாக இருக்கும் தெரியுமா! “அவ்வ்வ்வ்வ்வ்வ்வ்” DOT

Tagged as: ரஜினி, விமர்சனம்