இலந்த வடை சாப்பிட்டு இருக்கீங்களா? :-)

உலகத்திலேயே எந்த பண்டத்திற்கும் இல்லாத பெருமை இலந்த வடைக்கு உண்டு எந்த ஒரு பண்டத்திற்கும் ஒரு சுவை தான் இருக்கும் உதாரணமாக இனிப்பு காரம் என்று ஆனால் பல சுவைகளை கொண்ட ஒரே பண்டம் இலந்த வடை மட்டுமே! ["வடா" இல்லைங்க வடை ]

இலந்தப் பழம் பற்றித் தெரியாதவர்கள் கூட இலந்தப் பழம் பாடலான “இலந்தப் பழம் செக்க சிவந்த பழம் தேனாட்டம் இனிக்கும் பழம்” ஐ கேட்காமல் இருந்து இருக்க முடியாது. இந்த பாட்டில் வருகிற மாதிரி வெறும் பழத்தை மட்டும் சாப்பிட்டால் அப்புறம் டாய்லெட்டிற்குள்ளேயே உட்கார்ந்துக்க வேண்டியது தான்.. அட! புடுங்கிக்குங்க அணை போட்டாலும் தடுக்க முடியாது ஹி ஹி

கிராமத்து பள்ளிகளின் வெளியே இதை சிறிய பாக்கெட்டில் போட்டு விற்பனை செய்வார்கள். நானெல்லாம் சரம் சரமாக வாங்குவேன். வீட்டுல கொடுக்கிற காசெல்லாம் இதுக்கே போகும். தற்போது இது போல விற்கிறார்களா என்று தெரியவில்லை ஆனால் சூப்பர் மார்க்கெட்டில் பெரிய வடையாக செய்து விற்பனை செய்கிறார்கள் ஆனால் சுவையில்லை.

இதை எப்படி செய்வது தெரியுமா?

முதலில் பச்சை மிளகாய், உப்பு மற்றும் பெருங்காயத்தை தேவைப்படும் அளவு சேர்த்து ஆட்டுக்கல்லில் வைத்து நன்கு இடிக்க வேண்டும். இவை நன்கு அரைப்பட்ட பிறகு இலந்தப் பழத்தின் காம்புகளை நீக்கி இதில் கொட்டி கொட்டை அதிகம் உடையாமல் உலக்கை மூலம் இடிக்க வேண்டும். இதை ரொம்ப கவனமாக செய்ய வேண்டும் இல்லை என்றால் கொட்டை அதிகளவில் உடைந்து விடும். பழம் நன்கு இடிபட்ட பிறகு வெல்லம் அல்லது கருப்பு சக்கரையை சேர்த்து இடிக்க வேண்டும். சரியான அளவில் இடிபட்ட பிறகு அதை எடுத்து பாத்திரத்தில் வைத்து பின் மரக்கூடை அல்லது ஒரு பெரிய தட்டத்தில் வடை போல தட்டி வைத்து வெயிலில் வைத்து விட வேண்டும். வெயிலின் அளவைப் பொறுத்து இரண்டு அல்லது மூன்று நாளில் நன்கு காய்ந்த பிறகு சூப்பர் இலந்த வடை ரெடி

உலகத்திலேயே இதற்கு தான் இப்படி ஒரு சிறப்பு என்று ஏன் கூறினேன் என்றால் பெருங்காயம் துவர்ப்பு, பச்சை மிளகாய் காரம், கருப்பு சக்கரை இனிப்பு, உப்பு கசப்பு, பழம் புளிப்பு இப்படி ஒவ்வொன்றும் ஒவ்வொரு சுவை ஆனால் இவை அனைத்தும் சேர்ந்து இது அற்புதமான சுவையைத் தரும். இனிப்பு காரம் துவர்ப்பு புளிப்பு என்று அனைத்து சுவையும் இருக்கும். ஹி ஹி இதைக் கூறும் போதே எனக்கு எச்சில் ஊறுகிறது

இதன் சுவை அனைவருக்கும் பிடித்து விடாது ஒரு சிலருக்கு ரொம்பப் பிடிக்கும் சிலருக்கு பிடிக்கவே பிடிக்காது.. ம்ஹீம் சுவையின் அருமை அறியாதவர்கள் எங்கள் வீட்டில் அனைவருக்குமே இது ரொம்பப் பிடிக்கும். அதிலும் நான் இதற்கு டெர்ரர் ரசிகன். 10 வடை சாப்பிட்டால் நாக்கெல்லாம் உரிந்து விடும் அப்பவும் விடாம ஆ ஊ னு கண்ணுல கண்ணீர் வர சாப்பிடுவேன். கொட்டை அதிகம் இடிபட்டு இருந்தால் சப்பி சாப்பிடுவதால் விரைவில் நாக்கில் புண்ணாகி விடும் அதனால் தான் கொட்டை இடிபடாமல் பார்த்துக்கொள்ள வேண்டும் என்று முன்பு கூறினேன்.

எங்கள் வீட்டில் எனக்கும் என் அக்காவிற்கும் இதற்கு பெரிய சண்டையே நடக்கும் இதனால் எங்கள் அம்மா ஆளுக்கு இத்தனை வடை என்று பிரித்து கொடுத்து விடுவார்கள். கொஞ்சம் ஏமாந்தாலும் நம்ம பங்கை ஆட்டையைப் போட்டு விடுவார்கள் இதனால் பல இடங்களில் பதுக்கி வைக்க வேண்டியதாக இருக்கும் நான் சீக்கிரம் சாப்பிட்டு காலி செய்து விடுவேன் பிறகு என் அம்மாவிடம் அணத்தி என் அக்காவிடம் இருந்து கொஞ்சம் வாங்கிடுவேன் என் அக்காவின் புலம்பலுடன்.

நான் சென்னை வந்தும் சீசன் போது என் அப்பா கொண்டு வந்து கொடுத்து விடுவார்கள். சென்னை அறையில் என் நண்பர்களுக்கு இது பிடிக்காது அதனால் அப்பாடா! என்று இருக்கும். பங்குக்கு எவனும் வரவில்லை என்று பணம் கேட்டால் கூட கொடுத்து விடுவேன் இலந்த வடையைக் கேட்டால் முடியாது என்று கூறி விடுவேன். இதனுடைய சுவை ஒரு போதை மாதிரி ஆகி விட்டது.

சிங்கப்பூர் வந்தும் வருடாவருடம் கூரியர் ல அனுப்பக்கூறி பெற்றுக்கொண்டு இருக்கிறேன் என்றால் பார்த்துக்கொள்ளுங்கள். இதை செய்ய ஆகும் செலவை விட (செய்ய செலவு ஒன்றுமில்லை) இதை அனுப்ப ஆகும் செலவு பல மடங்கு இருக்கும். தெரியாமல் எங்க பக்கத்து வீட்டில் வேற கொடுத்துட்டேன் அவர்களுக்கு ரொம்பப் பிடித்து விட்டது.. இது என்னடா வம்பா போச்சு! என்று மண்டை காய்ந்து விட்டது… எண்ணி கொஞ்சம் கொடுத்து இதுக்கு மேல கிடையாது என்று கூறி விட்டேன். [இதை அவர்கள் படித்தால் மன்னித்தருள்க ]

தற்போது சீசன் உள்ளது என்னோட ஒரு அக்கா இதை செய்து எனக்கு எடுத்து வைத்து பின் அதை குடும்பத்தோட காலி செய்து விட்டார்கள் இதனால் தொலைபேசியில் அழைத்து திட்டி திரும்ப இடித்த பிறகு அதை என் அம்மா காய வைப்பதற்கு எங்கள் வீட்டிற்கு எடுத்து வந்து விட்டார்கள் இல்லை என்றால் காயும் முன்பே காலி செய்து விடுவார்கள்… பாருங்க! எப்படி எல்லாம் பாதுகாக்க வேண்டியதா இருக்கு. இதில் கைப்பக்குவமும் இருக்கிறது. எங்கள் குடும்பத்தில் என்னுடைய முதல் அக்கா செய்தால் செம சுவையாக இருக்கும். இலந்தப்பழம் இரண்டு வகை உள்ளது இதில் சிறியதாக உள்ளது தான் சுவையாக இருக்கும் ப்ளம்ஸ் மாதிரி இருப்பது நன்றாக இருக்காது அதில் இப்படி செய்ய முடியாது.

இந்த முறை ஊருக்குப் போகும் போது எடுத்து வந்து விடுவேன். நிறைய இருக்கும் போது ஒரு நாளைக்கு 8 , 10 னு சாப்பிடுவேன் எண்ணிக்கை குறைந்து விட்டால் பின் இரண்டு மூன்று என்று மெதுவாக சாப்பிடுவேன் இல்லை என்றால் விரைவில் தீர்ந்து விடும் என்று இது வரை ஒரு முறை கூட எடுத்த அளவோடு நிறுத்தியதில்லை ஒன்றோடு நிறுத்தவே முடியாது.. இது தான் பெரிய இம்சை. போதை மருந்து மாதிரி சாப்பிடக் தோன்றிக்கொண்டே இருக்கும். அதுவும் டிவி பார்த்துட்டு சாப்பிட்டால் அதுபாட்டுக்கும் உள்ளே போயிட்டே இருக்கும். புதிதாக சாப்பிடுகிறவர்கள் அளவோடு சாப்பிட வேண்டும் இல்லை என்றால் சிறுகுடல் பெருகுடல் எல்லாம் வெளியே வந்து விடுகிற மாதிரி புடுங்கிரும் பேதி நிற்கவே நிற்காது.

எல்லாவற்றையும் சாப்பிட்ட பிறகு அடடா! வடை போச்சே! என்று சோகமாகி விடுவேன் இது வருடத்திற்கு ஒரு முறை மட்டுமே கிடைக்கும்.

கொசுறு 1

நம்ம ஆளுங்க தர்ம அடியும் வாங்குவாங்க அதே மாதிரி கொடுப்பாங்க என்று மீண்டும் ஒரு முறை நிரூபித்து இருக்காங்க. 37 ஓவரில் 320 எல்லாம் உண்மையிலேயே பாராட்ட வேண்டிய ஆட்டம் தான் ஆனால் பிரச்சனை என்னவென்றால் இதை ஆடிக்கொருமுறை அம்மாவசைக்கு ஒருமுறை செய்கிறார்கள். இந்த சேவக் மனசுல என்னதான் நினைச்சுட்டு இருக்கானே தெரியல.. வரான்… இரண்டு ஃபோர் அடிக்கிறான் போயிட்டே இருக்கான். மண்டைக்கு வெளியேயும் இல்ல உள்ளேயும் இல்ல. கொஞ்சம் கூட கவலைப்பட்ட மாதிரியே தெரியல. கோலி ஆட்டம் பற்றி சொல்லவே வேண்டாம்..அடி தூள் தான்.

பாவம் மலிங்கா நிலை தான் பரிதாபம் ஆகி விட்டது. சச்சினை காலி பண்ணிட்டு இவர் 100 எடுக்கலாம்னு முயற்சி செய்து இருப்பார் போல கோலி சாத்தியதில் 96 தான் எடுக்க முடிந்தது இன்னும் நாலு ஓட்டம் எடுத்து இருந்தால் மலிங்கா பௌலிங் போட்டே செஞ்சுரி போட்டு இருப்பாரு நாளைக்கு ஆஸி இலங்கை கிட்ட தோற்று விட்டால் நம்ம கூட விளையாட பயந்துட்டு இலங்கை கிட்ட தோற்று விட்டார்கள் என்று கிளப்பி விட்டுடலாம் என்ன சொல்றீங்க? ஹி ஹி ஹி எப்பூடி

Image Credit : Cricinfo.com

கொசுறு 2

எனக்கு ஒரு மாபெரும் சந்தேகம். “ழ” க்கு ஆங்கிலத்தில் “ZHA” என்று யார் வைத்தது? இந்த ஸ்பெல்லிங்ல வருகிற பெயரை வெளிநாட்டினர் எப்படி கூறுவது என்று தெரியாமல் கொலை செய்து உச்சரித்துக்கொண்டு இருக்கிறார்கள் அவர்களை தவறாகவும் கூற முடியாது. இதை தெரியாதவங்க கூறினால் வாய் சுளுக்கிக்கும் போல இருக்கு

Related posts:

1. சில நினைவுகளும் நன்றியும்
2. எதிர்பார்ப்புகளும் தமிழ்மணம் நட்சத்திரமும்!
3. குலு(க்)ங்கிய விமானம்
4. துவங்கிவிட்டது “Layoff”
5. facebook 1000+ மற்றும் சில அனுபவங்கள்

Tagged as: அனுபவம்