இந்த 3D படத்தில் என்ன உள்ளது? கண்டுபிடியுங்கள் :-)

3D படங்கள் எனக்கு அறிமுகம் ஆனது ஆனந்த விகடனில் தான். 90 களில் என்று நினைக்கிறேன் அப்போது பின் அட்டைப் படத்தில் வாராவாரம் 3D படம் வெளியிடுவார்கள். இதற்காகவே இவர்களின் விற்பனை வெகுவாக அதிகரித்தது. புத்தகத்தை வாங்கி அவனவன் பல கோணத்தில் பார்த்து சாலையிலேயே காமெடி பண்ணிட்டு இருப்பானுக! பார்க்கவே செம சிரிப்பாக இருக்கும்.

எனக்கும் இதில் படத்தைக் கண்டு பிடிக்க ஒரு நாளே ஆனது. கண்ணை அப்படி வைத்து இப்படி வைத்து கண் வலி வந்தது தான் மிச்சம். அப்புறம் எப்படியோ அந்த டெக்னிக்கை கண்டு பிடித்து விட்டேன் இதில் என்ன சிறப்பு என்றால் ஒரு முறை இதை எப்படி கண்டுபிடிப்பது என்பதை அறிந்து கொண்டால் அதன் பிறகு எந்த படமாக இருந்தாலும் வெகு சுலபமாக ஐந்து நொடியில் கண்டறிந்து விடலாம்.

இதை எல்லாம் பாதுகாப்பாக எடுத்து வைத்து இருந்தேன் பின் வழக்கம் போல எங்கே வைத்தேன் என்று மறந்து விட்டேன். தற்போது இவை இருக்கிறதா என்றும் தெரியவில்லை விகடன் திரும்ப ஒருமுறை இதை ஒரு ரவுண்டு விடலாம்.. பொக்கிஷம் மாதிரி. மக்களும் ரசிப்பார்கள் என்று நினைக்கிறேன்.

இந்தப்படத்தை பார்த்தவுடன் என்ன என்று கண்டுபிடித்து விட்டேன். இதில் என்ன ஆச்சர்யம் என்றால் இதில் உள்ளதை காணும் போது மிகவும் அற்புதமான அனுபவமாக இருக்கும். அட! எப்படி எல்லாம் வடிவமைக்கறாங்க என்று ஆச்சர்யமாக இருக்கும். எங்கள் வீட்டில் ஒரு அழகான 3D படத்தை சுவரில் ஃபிரேம் செய்து மாட்டி வைக்க வேண்டும் என்று விருப்பம்… வீட்டுக்கு வருகிறவர்களை எல்லாம் இதைக் கண்டுபிடிக்கக் கூறி திணறடிக்க வைக்க வேண்டும் என்று ஒரு அல்ப ஆசை

இந்தப்படத்தில் என்ன உள்ளது என்பதற்கு ஒரு சிறு க்ளு நம் முகத்தில் உள்ள ஒரு உறுப்பு

Image Credit : Singapore Pizza Hut

கொசுறு 1

சச்சின் நிலைமை இப்படி பரிதாபமாக போய் விட்டதே! பான்ட்டிங்கை வீட்டுக்கு அனுப்பினாலும் அனுப்பினார்கள் ஆளாளுக்கு சச்சினை நொங்கு எடுக்கிறார்கள். மிக நெருக்கடியான நிலையில் இருக்கிறார். இதை இவரே தேடிக்கொண்டது தான் அதனால் நாம் சொல்வதற்கு ஒன்றுமில்லை.

கொசுறு 2

அநியாங்க அநியாயம்! இரண்டு வாரமா ஒரு படத்துக்கும் போகலை தோனி மெரினா காதலில் சொதப்புவது எப்படி? னு ஒரு படமும் பார்க்க முடியவில்லை. இந்த வாரம் ஏதாவது ஒரு படமாவது பார்த்துட வேண்டியது தான். மூன்றுமே பார்க்கும் பட்டியலில் தான் உள்ளது ஆனால் இங்க (சிங்கப்பூர்) எந்த படம் ஓடுகிறது என்று தெரியவில்லை.

கொசுறு 3

எங்க வீட்டுல சன் டிவி மட்டும் தான் இருக்கு அதனால் திருமதி செல்வம், தங்கம், தென்றல் மற்றும் செல்லமே போன்ற காலத்தால் அழிக்க முடியாத சீரியல் காவியங்களை பார்க்க வேண்டிய துர்பாக்கிய நிலையில் உள்ளேன். திருமதி செல்வம் இயக்குனருக்கு என்ன பிரச்சனையோ நல்லவங்களை எல்லாம் சம்பந்தமே இல்லாமல் வில்லனாக்கிட்டாரு மவனே! இதை நாங்க இன்னும் நாலு வருசத்துக்கு இழுக்கப் போகிறோம் அதனால அப்படி எல்லாம் உங்களை அவ்வளவு சீக்கிரம் தப்பிக்க விட மாட்டோம் சாவுங்கடா! என்று படுத்தி எடுத்துட்டு இருக்காரு.

தங்கம் இரண்டு கெட்டான், தென்றல் யப்பா சாமி! உலகத்துலேயே அந்தப் பெண்ணுக்குத் தான் பிரச்சனை போல (பேரு மறந்துட்டேன்) காட்டிட்டு இருந்தாங்க.. எங்க பக்கத்து வீட்டு பாட்டியே இதைப் பார்த்து டென்ஷன் ஆகிட்டாங்கன்னா பார்த்துக்குங்க இயக்குனர் மட்டும் இந்தப் பக்கம் வந்தா அவருக்கு சங்கு தான். இன்னொருத்தியோட புருஷனை கரக்ட் பண்ணுறது னு இதுல தான் அப்படின்னா செல்லமே ல ஒட்டு மொத்த சீரியலே அப்படித் தான் இருக்கு. அடுத்தவன் பொண்டாட்டியை கரக்ட் பண்ணுறது புருஷனை கரக்ட் பண்ணுறது.. ங்கொய்யாலே டேய்! என்ன கருமாந்தரத்தடா எடுத்து தொலையறீங்க!

கடைசியா “ஆண் பாவம் ஆண் பாவம் உண்மையிலயே ஆண்கள் பாவம்” என்று பாடுவதை காத்து குளிர கேட்டு விட்டு சீரியலை பார்க்காமல் தூங்கிட வேண்டியது தான் விரைவில் என்னுடைய கனவுல இந்த சீரியல் இயக்குனர்களுக்கு கீழே நாட்டு வெடிகுண்டு நாலு வைக்கிற மாதிரி கனவு வரப்போகிறது என்று நினைக்கிறேன்

கொசுறு 4

சமீபமாக பல தளங்களில் இது போல் ஒவ்வொரு வார்த்தைக்கு இடையேயும் வருகிறது. படிக்கவே கடுப்பாக இருக்கிறது. திடீரென்று இது போல ஏன் ஆனது என்று தெரியவில்லை. இதை சரி செய்ய ஒரு வழி இருக்கிறது தட்டச்சு செய்ததை நோட் பேடில் காபி செய்து பின் அதை திரும்ப காபி செய்து உங்கள் தளத்தில் பேஸ்ட் செய்தால் இது போல ஆகாது. என்னுடைய தளத்தில் பாருங்கள் இது போல இல்லாமல் படிக்க எளிதாக இருக்கும். எனக்கு இது போல செய்தால் எந்தப் பிரச்சனையும் இல்லை (முதலில் இருந்தே நான் இப்படித் தான் செய்கிறேன்) உங்களுக்கு இவ்வாறு செய்தால் சரியாகிறதா பாருங்கள்.

Related posts:

1. மயக்கம் என்ன
2. ஜன்லோக்பால் – என்ன நடக்கிறது?
3. இது எப்படி சாத்தியமாகிறது?
4. கிரிக்கெட்டை நேசிப்பவர்களுக்கு மட்டும் :-) [படங்கள்]
5. அலறப்போகும் சிங்கப்பூர் – F1 Grand Prix 2010 கோலாகலம்

Tagged as: படங்கள்