சினி மசாலா மிக்ஸ் [22-12-2011]

திரைச்செய்திகள் எழுதி ரொம்ப நாள் (மாதம்) ஆச்சு! அதனால ஜாலியா ஒரு ரவுண்டு வருவோம் சென்ற வருடம் பதிவிட்டேன் அதன் பிறகு தற்போது தான்…

Power Star

சென்ற முறை சூப்பர் ஸ்டாருடன் துவங்கினால் இந்த முறை பவர் ஸ்டாருடன் துவங்குவோம் போகிற போக்கைப் பார்த்தால் பவர் ஸ்டார் அகில உலக ஸ்டார் ஆகி விடுவார் போல இருக்கு ஹி ஹி கொஞ்சம் (ரொம்பவே) ஓவரா இருக்கோ! இவர் பண்ணுற அட்டூழியத்தைப் பார்த்து பலரும் கதி கலங்கி போய் இருக்கிறார்கள். இவருடைய லத்திகா படத்தை 300 நாள் பக்கம் ஓட்டிட்டார்!!! வெற்றிகரமாக. பேட்டியில் எனக்கு சரியான போட்டி ரஜினிகாந்த் தான் மற்றவர்களோடு ஒப்பிட்டு என்னை அசிங்கப்படுத்தாதீர்கள் என்று கூறி பலருக்கும் பேதி கிளப்பி இருக்கிறார்.

சென்னையில் நடக்கும் உலகத்திரைப்பட விழாவில் இவருடன் புகைப்படம் எடுக்க ஒரே அடிதடியாம். எல்லோரும் இவரை காமெடி பீசாக நினைத்து இணையத்தில் வறுத்துக்கொண்டு இருக்க இவரோ தன்னை பிரபல ஸ்டாராக நினைத்து நாளுக்கு நாள் இவரது அட்டகாசத்தை அதிகம் செய்து கொண்டே இருக்கிறார். ஏம்பா! திரையுலகில் இந்த கொடுமையை தட்டிக்கேட்க யாருமே இல்லையா. இவருடைய அடுத்தப் படம் பேரு “ஆனந்தத் தொல்லை”!!! சரியாத்தான் வைத்து இருக்காரு

கொசுறு: இவரோட லத்திகா படம் பேரு இவரோட பொண்ணு பேராம்.. இப்படி தன்னோட பேரை நாஸ்தி செய்ததற்கு பவர் ஸ்டார் மேல அவரோட பொண்ணு கோபமாகி பேசவே மாட்டேங்குறாராம். இதை பவர் ஸ்டாரே கூறினார்! இது எப்படி இருக்கு

நண்பன்

ஷங்கர் படம் ஒன்று இவ்வளவு விரைவாக அதிக பரபரப்பு இல்லாமல் முடிந்து இருப்பது எனக்கு தெரிந்து இதுவே முதல் முறை. ஹிந்திப் படமான 3 இடியட்சை தமிழில் ரீமேக் செய்கிறார்கள் ஷங்கர் படம் என்பதால் எனக்கு முழு நம்பிக்கை உண்டு. 3 இடியட்ஸ் பார்த்த போதே இதை தமிழில் எடுத்தால் நன்றாக இருக்கும் ஆனால் மூன்று ஹீரோக்கள் எப்படி சேர்ந்து நடிப்பார்கள் தமிழில் என்று நினைத்து இருந்தேன் ஆனால் சமீபமாக ஹிந்திப் படங்கள் போல தமிழிலும் பலர் இணைந்து நடித்து வருவது நல்ல ஆரோக்கியமான சூழலாகத் தெரிகிறது. படம் பொங்கலுக்கு வெளியாகப்போகிறது, பாடல்களை கோவையில் வெளியிடப்போகிறார்களாம்.

Read: அனைவரும் பார்க்கவேண்டிய படம் “3 Idiots” (Hindi)

ஆரண்ய காண்டம்

இந்த ஆண்டு வெளியாகிய படங்களில் நான் பார்க்க வேண்டும் என்று ஆவலுடன் இருக்கும் படம் ஆரண்ய காண்டம் ஆனால் சிங்கப்பூரில் இந்தப்படம் வெளியாகவில்லை. DVD அனுமதியும் இல்லாததால் DVD யும் கிடைக்கவில்லை இணையத்திலும் பிரிண்ட் சரி இல்லை. விரைவில் எப்படியாவது பார்க்க வேண்டும். இந்தப்படத்தை சென்னை உலகத் திரைப்பட விழாவில் தேர்ந்தெடுக்காமல் போனதற்கு பலரும் கண்டனம் தெரிவித்து இருக்கிறார்கள் இதுவும் படத்தைப் பார்க்கும் ஆவலை தூண்டி விட்டது. இந்தப்படத்தின் இயக்குனர் பற்றிய ஆச்சர்யமான விஷயம் இதுவரை இவர் யாரிடமும் உதவி இயக்குனராக பணியாற்றவில்லையாம். உங்களால் நம்ப முடிகிறதா!

விஸ்வரூபம்

கமல் தன்னோட அடுத்த மெகாப் படமான “விஸ்வரூபம்” படத்தை விரைவாக எடுத்து வருகிறாராம். தசாவதாரம் படத்தை விட இது பிரம்மாண்டமாக இருக்கும் என்று கூறி இருக்கிறார். இதை இயக்குவதும் தயாரிப்பதும் கமல் தான் என்று அறிவீர்களே தானே! முன்பு அமெரிக்காவில் படப்பிடிப்பு நடத்த அனுமதி கிடைக்காமல் இருந்ததாம் தற்போது கிடைத்ததால் படக்குழுவினர் 73 பேரோட படப்பிடிப்பு நடத்திக்கொண்டு இருக்கிறாராம். ஒருத்தருக்கு US போய் வரவே செம செலவாகும் இதுல இத்தனை பேர் சென்று வந்தால்!! உண்மையிலேயே மெகா பட்ஜெட் தான் போல் இருக்கு. திரைப்படங்கள் படப்பிடிப்பு செலவுகள் பற்றி எல்லாம் நாம் கணக்கு போட்டால் மயக்கம் வந்துடும் என்று நினைக்கிறேன். தற்போது தமிழ்ப் படங்களின் வசூல் எல்லைகள் விரிவாகி உள்ளதால் இது சாத்தியமாகிறது.

தனுஷ்கான்

தனுஷ் ஹிந்திப் படம் இயக்கப்போகிறார் என்று செய்திகளில் வர ஆரம்பித்தது அந்த நேரம் பார்த்து கொலவெறி டி தாறுமாறாக உலகளவில் (நிஜமாத்தாங்க) ஹிட் ஆகி விட நம்ம ஆளு மும்பைலேயே செட்டில் ஆகிட்டாரு போல அமிதாப்புக்காக கொலவெறி டி ரீமிக்ஸ் டெடிகேட் பண்ணுறேங்கராறு, அபிஷேக் கூட டிஸ்கசன் என்று சொல்றாங்க, Zee டிவி ல ஹிந்தி வாலாக்கள் கூட கமான் கமான் னு கொலவெறி டி ஆடிட்டு இருக்காரு, பாலிவுட் பார்ட்டிகளில் கலந்துக்கறாரு, ஹ்ரிதிக் ஹீரோ னு!! செய்தி வருது.. அட! இதெல்லாம் கூட தாங்கிக்கலாம் இப்ப ரத்தன் டாடா கூட நின்னு போஸ் கொடுத்து இருக்காரு..இவர் கிட்ட என்ன பேசினாருன்னு அந்த ஆண்டவனுக்கே வெளிச்சம். பெரும்பாலும் பாலிவுட் பக்கம் தான் இப்ப சுற்றிக்கொண்டு இருக்கிறார் பெயரையும் தனுஷ்கான் என்று மாற்றாம இருந்தா சரி Image Credit vikatan.com

விஜய் Vs சூர்யா

விஜய் தொலைக்காட்சியில் கோடீஸ்வரன் நிகழ்ச்சி ஷோ செய்ய விஜய் ஒப்புக்கொண்டு இருந்தாராம் தற்போது அதை செய்யப்போவது சூர்யா. ஒரு நாளைக்கு ஒரு கோடி சம்பளம் என்று கிசுகிசுக்கிறார்கள்.. இவருக்கு ஒரு கோடி! பரிசுத்தொகை ஒரு கோடி!! அப்ப விளம்பரம் மூலம் வருமானம் எவ்வளோ இருக்கும்… லைட்டா கிறுகிறுன்னு இருக்கு.

இந்த செய்தி வெளிவந்த பிறகு விஜய் சூர்யா ரசிகர்கள் சண்டை மேலும் தீவிரமாகி இருக்கிறது. இணையத்தில் தற்போதைய ஹாட் விஜய் அஜித் ரசிகர்கள் சண்டையல்ல விஜய் சூர்யா ரசிகர்கள் சண்டை தான் சூர்யா தற்போது வேகமாக வளர்ந்து வரும் (அவரோட உயரத்தில் அல்ல) ஹீரோ என்பதால் விஜய்க்கு கடும் சவாலாகவே அனைத்து விசயங்களிலும் உள்ளார். சூர்யாக்கு உயரம் தான் பெரிய பிரச்சனையாக உள்ளது.

ரஜினி ஷங்கருடன் அடுத்த படம்?

தலைவரோட கோச்சடையான் படம் பற்றிய அறிவிப்பு தற்போது தான் வந்தது அதற்குள் தலைவர் ஷங்கருடன் இணைந்து அடுத்த படம் செய்யப்போகிறார் என்று பரபரப்பாக உள்ளது. கோச்சடையானுக்கு இல்லாத ஆர்வம் இந்தப்படத்திற்கு ரசிகர்களிடையே அதிக அளவில் உள்ளது காரணம் முன்னது அனிமேசன் படம் பின்னது வழக்கமான மசாலாப் படம். முதல்வன் மாதிரி ஒரு படம் வந்தால் பட்டாசாக இருக்கும் தலைவா! மாசம் ஒரு பட அறிவிப்பு வந்துட்டு இருக்கு ஏதாவது ஒண்ணுல நடித்து சீக்கிரம் வெளியிடுங்க

ஸ்னேகா

பிரசன்னா ஸ்னேகாவை திருமணம் செய்து கொள்ளப்போவதாக அறிவித்து இருக்கிறார் ஆனால் ஸ்னேகா இன்னும் எப்போது என்று உறுதிப் படுத்தவில்லை. திருமணத்திற்குப் பிறகு நடிப்பதை விட்டு விடுவார் என்று இணையத்தில் செய்திகள் உலவிக்கொண்டு இருக்கின்றன. சென்ற வருடம் சினி மசாலா மிக்ஸ் எழுதிய போது நண்பர் லோகன் “ஸ்னேகா பிரியாமணி ரீமாசென் பற்றி எழுதுங்க கிரி” என்று கூறினார். இனிமேல் தாமதம் செய்தால் ஸ்னேகாவிற்கு குழந்தையே பிறந்து விடும் என்பதால் இப்போதே அவரைப் பற்றி எழுதி விட்டேன்.. சாரி லோகன் ரொம்ப!!! தாமதம் ஆகிடுச்சு

கொசுறு: சினேகா கோச்சடையான் படத்துல தலைவருக்கு தங்கச்சியா நடிக்கறாங்க இதற்காக சேட்டன் படத்துல நடிக்காம வந்துட்டாங்களாம் இதனால் சேட்டனுக செம்ம டென்ஷனில் இருக்காங்க.

ரோஜா நகை திருட்டு

நடிகை ரோஜா ஆந்திராவில் ரயிலில் இரவில் பயணம் செய்யும் போது தூங்கிக் கொண்டு இருந்த சமயத்தில் அவருடைய வைரக் காதணி, ரூபி மற்றும் வைரக் கற்கள் பதித்த 5 பவுன் நெக்லஸ் ஆகியவற்றை யாரோ ஆட்டையைப் போட்டு விட்டார்களாம். வீட்டிற்குப் போன பிறகு தான் கவனித்து காவல்த் துறையில் புகார் செய்து இருக்கிறார். இவ்வளவு விலை மதிப்புள்ள பொருளை இப்படி அஜாக்கிரதையாகவா வைத்து இருப்பாங்க.. அரசியலுக்கு சென்றதுக்குப் பிறகு பணம் நிறைய சேர்ந்து இருக்கும் அதனால தான் கவனக்குறைவா இருந்து இருப்பாரு போல. நல்ல வேளை ரோஜாவையே தூக்கிட்டுப் போகாம இருந்தாங்களே! இப்ப ரோஜாவை தூக்குறது ரொம்பக் கஷ்டம் அதனால் அவரைப் விட்டுட்டுப் போய் இருப்பாங்க என்று நினைக்கிறேன்

மாளவிகா

கடந்த முறை போல இந்த முறையும் தலைவி மாளாவிகா பற்றி செய்தி.. ஹி ஹி கொஞ்சம் பொறுத்துக்குங்க. மாளவிகா வீட்டுக்காரர் மேல செம கடுப்புல இருக்கேன்.. பின்ன என்னங்க! தலைவியை நடிக்கவிடாம பண்ணிட்டு இருக்காரு. நானும் எத்தனை நாள் தான் மாளவிகா நடிக்க வருவாங்க என்று காத்து இருப்பது. சீரியல் ல நடிக்கப்போறாங்க என்று கூறினாங்க ஒன்றும் சத்தத்தையே காணோம். சீரியல் ல வந்தால் தவறாம பார்க்க தயாராக இருக்கேன் நம்ம கஷ்டம் எல்லாம் மாளவிகா வீட்டுக்காரருக்கு புரியுதா! யாராவது அவருக்கு எடுத்துச் சொல்லுங்களேன்

ஜீவா Vs சிம்பு

ஜீவா “முகமூடி” என்ற சூப்பர் ஹீரோ கதையில் மிஸ்கின் இயக்கத்தில் நடிக்கிறார் இதற்கான விழாவில் பேசும் போது “மிஸ்கின் என்னை அஞ்சாதே படத்திற்கே நரேன் நடித்த கதாப்பாத்திரத்தில் நடிக்க அழைத்தார் ஆனால் அப்போது எனக்கு மீசை கூட சரியாக முளைக்கவில்லை (இப்ப மட்டுமே நிறையா இருக்கா என்ன?) அதனால் இதற்கு நான் பொருத்தமாக இருக்க மாட்டேன் சின்ன பையன் போல இருப்பேன் அதனால் பின்னாளில் வாய்ப்பு கிடைத்தால் நடிக்கிறேன் என்று கூறிவிட்டேன்” என்று கூறி இருந்தார் அதாவது சிம்புவை வாரி இருந்ததாக இணையத்தில் செய்திகள் அடிப்பட்டன. சிம்பு ஒஸ்தியில் காவல் துறை அதிகாரி வேடத்தில் குச்சி மிட்டாயும் குருவி ரொட்டியும் விற்பவர் போல இருக்கிறாராம்

STR – TR

STR பற்றி பேசினதும் TR நினைவுக்கு வந்து விட்டார். ஒஸ்தி படம் பற்றிய சன் டிவி சிறப்பு நிகச்சியில் TR செய்த அலப்பரையை யாராவது பார்க்காமல் இருக்கிறீர்களா! மனுஷன் அந்த ஷோவையே நாஸ்தி செய்து விட்டார். அந்த நிகழ்ச்சி பெரும்பகுதி தன்னுடைய சுய புராணம் பற்றியே பேசி சிம்புவை கொலை வெறி ஆக்கி விட்டார். இந்த தரணியும் சும்மா இல்லாம ஏற்றி விட இவர் ஓடிஸா பாட்டுக்கு!!! எல்லாம் இசை அமைத்துப் பாடி பார்ப்பவர்களை கிடுகிடுக்க வைத்து விட்டார். VTV கணேஷ் பலி ஆடு மாதிரி உட்கார்ந்து இருந்தாரு பாவம். TR வாட்ச்சை கழட்டியதுமே எனக்கு புரிந்து விட்டது மவனே! இன்னைக்கு ரணகளம் தாண்டி என்று சிம்பு முகம் போன போக்கைப் பார்க்க வேண்டுமே! பாவம் நொந்து போய் இருப்பார்… “அடப்பாவி அப்பா! என்னோட படத்தை ப்ரொமோட் செய்யலாம்னு வந்தா காரியத்தையே கெடுத்து விட்டியே!” என்று பொறுமி இருப்பார் ஹி ஹி ஹி எல்லோரும் சொல்ற மாதிரி TR செய்வது தன்னம்பிக்கை அல்ல சுயதம்பட்டம்.

இந்தக் காணொளியைப் பாருங்க அப்புறம் நீங்களே முடிவு செய்துக்குங்க! TR சார் நீங்க மனுசனே இல்லை…. தெய்வம்னு சொல்ல வந்தேன் TR ரசிகப் பெருமக்களே! இதைப்பார்த்து குறிப்பா 9:14 TO 9:50 உங்களுக்கு வயிற்று வலி வந்தால் நான் பொறுப்பல்ல

Subscribe in a reader

Related posts:

1. பயணக்குறிப்புகள் [07-11-2011]
2. பயணக்குறிப்புகள் [09-02-2011]
3. இணையம் பற்றிய செய்திகள் [01-09-2011]
4. இணையம் பற்றிய செய்திகள் [12-04-2011]
5. இணையம் பற்றிய செய்திகள் [29-07-2011]

Tagged as: சினி மசாலா மிக்ஸ்