தமிழ்நாட்டைப் பிடித்து உலுக்கும் “இலவசம்”

இலவசம் இந்தத்தேர்தலில் தமிழ்நாட்டையே கலக்கிக்கொண்டு இருக்கிறது. இரு பெரிய அரசியல் கட்சிகளும் போட்டிபோட்டுக்கொண்டு இலவசத்தை அறிவித்து இருக்கின்றன.

இலவசம் அவசியமா!

இலவசம் அவசியமா இல்லையா என்பது ஒவ்வொருவரின் தனிப்பட்ட பார்வை. கீழ்த்தட்டு மக்கள் இலவசங்களை அதிகம் எதிர்பார்க்கிறார்கள் சரி! அவர்கள் தான் இல்லாதவர்கள் எதிர்பார்க்கிறார்கள் என்றால் நல்ல நிலைமையில் உள்ளவர்கள் கூட இதற்க்கு ஆசைப்பட்டுக்கொண்டு இருக்கிறார்கள் என்பது தான் வருத்தமளிக்கும் விசயமாக உள்ளது. இலவசம் என்றால் பெனாயில் குடிக்க சொன்னால் கூட ஓகே! என்பது நமக்குத்தான் பொருந்தும் போல இருக்கு. நாம் வாங்கும் பொருளால் பயன் இருக்கிறதோ இல்லையோ ஆனால் அவன் வாங்குறானா! அப்ப எனக்கும் வேண்டும். இது தான் ஒவ்வொருவரின் எண்ணவோட்டம்.

ஜெ முதலில் மாணவர்களுக்கு இலவச சைக்கிள் கொடுத்தது தான் இதன் ஆரம்பம் இதை சமாளிக்க கலைஞர் கையில் எடுத்த ஆயுதம் தான் இலவச தொலைக்காட்சி. இந்த சைக்கிளாவது மாணவர்களுக்கு தான் பயன்படுகிறது அப்படியே மற்றவர்கள் பயன்படுத்தினாலும் சரி சைக்கிள் தானே என்று இருந்தது அதுவுமில்லாமல் அது எண்ணிக்கையில் குறைவாக இருந்ததால் யாரிடமும் பெரிய பாதிப்பை ஏற்படுத்தவில்லை. மக்களிடம் என்ன கூறினால் அசைந்து கொடுப்பார்கள் என்பதை அறியாதவரா கலைஞர்! இத்தனை வருஷம் அரசியலில் இருந்து இது கூடவா தெரிந்து இருக்க மாட்டார் அதனால் அவர் அறிவித்த அதிரடி அறிவிப்புத் தான் இலவச வண்ண தொலைக்காட்சி.

தொலைக்காட்சி என்பது அவசியமான ஒன்று தான் மறுக்கவில்லை ஆடம்பரத்தில் இருந்து அத்யாவசிய தேவைக்கு எப்போதோ மாறி விட்டது தொலைபேசி போல ஆனால் மக்களுக்கு அதை விட முக்கிய சேவைகளை அரசு செய்ய வேண்டியிருக்கிறது. தொலைக்காட்சி எல்லாம் எப்படியும் மக்கள் வாங்கி விடுவார்கள் அப்படியே அவை இல்லை என்றாலும் ஒன்றும் குடி முழுகி விடப்போவதில்லை ஆனாலும் மக்களுக்கு அதன் (இலவசம்) மேல் கவர்ச்சி. இதில் ஏழை பணக்காரன் என்ற எந்த வித்தியாசமுமில்லை.

<Image Credit>

சரி இதனால் ஏதாவது மக்களுக்கு பயன் உண்டா?

ஒரு வெங்காய பயனும் கிடையாது ஒரே பயன் இவர்கள் செய்த ஸ்பெக்ட்ரம் ஊழல் இவர்கள் கொடுத்த இலவச தொலைக்காட்சியாலையே எல்லோரிடமும் சென்று சேர்ந்து விட்டது. இதற்காக செலவிட்ட தொகையை எத்தனை ஆக்க பூர்வமான செயல்களுக்கு அரசு செயல்படுத்தியிருக்கலாம்… அத்தனையும் அல்லது பெரும்பான்மை வீண்.

யாருமே அப்போது இதனால் பயனடையவில்லையா?

அதெப்படி ஒரேயடியாக கூற முடியும். நிச்சயம் இதனால் ஒரு சிலர் பயனடைந்து இருப்பார்கள். உண்மையிலே மிக ஏழ்மை நிலையில் உள்ளவர்கள் இதனால் மகிழ்ந்து இருப்பார்கள் என்பதில் சந்தேகமில்லை ஆனால் இதற்க்கு மின்சாரம் அதன் பிறகு தொலைக்காட்சி என்றாலே கேபிள் டிவி இல்லாமல் இருக்க முடியாது ஆக மொத்தம் இதனால் அவர்களுக்கு இன்னும் கூடுதல் செலவு தான். இதனால் பயனடைந்தவர்கள் தொலைக்காட்சி தயாரிப்பாளர்கள் தான்.

ஒண்ணுமில்லாதவன் தான் இதை வாங்குகிறான் என்றால் நல்ல இருக்கிறவனும் இதை வாங்க அடிதடியே போடுறான். முதலில் கொஞ்சம் பேருக்கு இந்த வண்ணதொலைக்காட்சி என்றவர்கள் பெரும்பான்மையானவருக்கு கொடுக்க முடிவு செய்தார்கள் காரணம் அவனுக்கு மட்டும் கொடுத்து தனக்கு வரவில்லை என்று மற்றவர்கள் கோபித்து அதனால் பிரச்சனை ஆனால் என்ன செய்வது என்ற பயம். வாங்குவதால் நமக்கு பயனா! அது பற்றி எல்லாம் கவலை இல்லை. அவனுக்கு கொடுக்கிறியா அப்ப எனக்கும் வேண்டும். அதை நான் பயன்படுத்துகிறேனா அல்லது பெட்டியில் வைத்து இருக்கிறேனா என்பது விசயமில்லை.

அரசு காண்ட்ராக்ட் என்றாலே அங்கே லஞ்சம் இல்லாமல் இருக்க 100% வாய்ப்பில்லை என்பது சிறுவனுக்குக்கூட தெரிந்த ஒரு விஷயம். நம்ம பகுதியில் சாலை போடுகிறார்களா, கட்டிடம் கட்டுகிறார்களா, தண்ணீர் தொட்டி அமைக்கிறார்களா, குழாய் பதிக்கிறார்களா என்று எந்த விஷயம் வேண்டும் என்றாலும் எடுத்துக்கொள்ளுங்கள் அங்கே லஞ்சம் இல்லாமல் இருக்காது. ஒரு சில இடங்களில் நீங்கள் கண்டிப்பாக கவனித்து இருப்பீர்கள் சாலை போட்ட சில நாளிலேயே மோசமாகி விடும் இதற்குக்காரணம் சாலை அமைத்தவர்கள் திறமையில்லாதவர்கள் என்பதல்ல. காண்ட்ராக்ட் எடுத்தவர் அதிக லஞ்சப்பணம் கொடுத்ததால் அவரால் ஒதுக்கப்பட்ட தொகையில் தரமான பொருட்களை பயன்படுத்த முடியாததே காரணமாகும். சுருக்கமாக கூறுவது என்றால் ஒரு சாலை போட ஒதுக்கப்பட்ட பணம் 1000 ருபாய் அதில் 300 ருபாய் காண்ட்ராக்டர் லஞ்சமாக கொடுத்து விட்டால் அவரால் எப்படி 700 ரூபாயில் சாலை அமைக்க முடியும்?

இதே போல தான் வண்ண தொலைக்காட்சி வழங்குவதிலும் நடந்து இருக்கும். எத்தனை வண்ண தொலைக்காட்சிகள் கொடுத்து இருக்கிறார்கள் என்று தெரியவில்லை குறைந்த பட்சமாக ஒரு கோடி மக்களுக்கு கொடுக்கப்பட்டதாக வைத்துக்கொள்வோம். ஒரு தொலைக்காட்சி விலை 1200 ருபாய் என்று வைத்துக்கொண்டால் அதற்கு ஒரு தொலைக்காட்சிக்கு 100 ருபாய் கமிசன் என்று வைத்தாலே கணக்கு எங்கேயோ போகிறது. நான் கூறியது குறைந்த பட்ச கணக்காகும்.

மக்களின் அடிப்படை தேவைகள் சாலை, பேருந்து, தண்ணீர், மின்சாரம் போன்றவை தானே தவிர அரசு தரும் இலவச தொலைக்காட்சியோ, மிக்சியோ அல்லது கிரைண்டரோ அல்ல. இவற்றை எல்லாம் மக்களால் வாங்க முடியும் ஆனால் சாலை பேருந்து தண்ணீர் மின்சாரம் போன்றவற்றை அரசு மட்டுமே செய்து தர முடியும். கிராமங்களில் மின்சாரம் இல்லாமல் படும் மக்கள் படும் வேதனை சொல்லி மாளாது. சென்னையில் இருப்பவர்களுக்கு இதன் முழு வலி புரியாது காரணம் இங்கே அதிகம் மின்சார தட்டுப்பாடில்லை கிராமங்கள் மற்றும் சிறு நகரங்களை ஒப்பிடும் போது.

மின்சார தட்டுப்பாட்டிற்க்குக்காரணம் புதிதாக ஆரம்பிக்கப்பட்ட தொழிற்சாலைகள் என்கிறார்கள் அப்படி என்றால் சரியான கட்டமைப்பை நிறுவாமல் ஏன் தொழிற்சாலைகளுக்கு அனுமதி வழங்கினார்கள்? பற்றாக்குறை வரும் என்று கூட தெரியாமல் எப்படி அரசு வழங்கியது? தொழிற்சாலைகள் அதிகம் வருவது நல்ல விஷயம் தான் வேலைவாய்ப்பு அதிகரிக்கும் அதன் சுற்றுப் பகுதிகள் வளர்ச்சி அடையும் ஆனால் அதற்க்குண்டான கட்டமைப்பை நிறுவாமல் அனுமதி வழங்கி மக்களை எப்படி சிரமப்படுத்தலாம்!

Read: என்னங்கையா நடக்குது இங்கே? – மின் தடை ஒரு அலசல்

கலைஞர் இலவச அறிவிப்பை எல்லாம் தூக்கிசாப்பிடுற மாதிரி ஜெ இலவசங்களை தனது தேர்தல் அறிக்கையில் வாரி வழங்கி இருக்கிறார். எவனும் வேலை செய்யவே தேவையில்லை அரசு கொடுப்பதை வைத்துக்கொண்டு ஜாலியாக இருக்கலாம் அந்த அளவிற்கு உள்ளது. இதை எல்லாம் செயல்படுத்த முடியாது என்பது நன்றாகத்தெரிகிறது இருப்பினும் இவற்றை கூறக்காரணம் இப்படி கூறவில்லை என்றால் தேர்தலில் கடந்த முறை தொலைக்காட்சி விசயத்தில் கோட்டை விட்டது போல இந்த தேர்தலிலும் ஆகி விடும் என்று நன்றாக தெரிந்து இருக்கிறார் ஜெ. எனவே எனக்கு இதில் எந்த வித ஆச்சர்யமுமில்லை. என்ன… நான் அளவோடு எதிர்பார்த்தேன் இதைப்பார்த்தால் கண்ணை கட்டுகிறது. புதிதாக எவரிடமும் இதை காண்பித்தால் நம்மை காமெடி செய்கிறார்கள் என்று நினைத்து விடுவார்கள் அந்த அளவிற்கு இலவசம் இலவசம் இலவசம்.

ஜெ விற்கே நன்றாகத்தெரியும் இதை எல்லாம் நிச்சயம் செய்ய முடியாது என்று அப்படி இருந்தும் கூறக்காரணம் கலைஞர் அறிவிப்புகள் தான். கண்டிப்பாக வேறு எந்த எதிர்க்கட்சியாக இருந்தாலும் இதைத்தான் செய்து இருப்பார்கள் கொஞ்சம் கூட குறைவாக இருக்கும் அவ்வளவே. ஜெ அறிவித்து இருப்பதை எல்லாம் செய்தால்… (முடியாது அது வேறு விஷயம்) நினைத்தாலே கிறுகிறுப்பாக உள்ளது.

இலவசத்தால் தகுதியானவர்களை விட தகுதியில்லாதவர்களே அதிகம் பயனடைந்து வருகிறார்கள் மற்றும் அதை தவறாக பிரயோகித்து வருகிறார்கள் எனவே இலவசம் என்று கொடுப்பதை விட மக்களின் அன்றாட பிரச்சனைகளில் அரசு கவனம் செலுத்தாத வரை நமக்கு எந்த விடிவு காலமும் இல்லை. ஏற்கனவே இலவசம் அதிகம் ஆனதால் பலரும் வேலைக்கு செல்லவே யோசிக்கிறார்கள் இதனால் கிராமங்களில் விவசாயக் கூலி வேலைக்கு ஆள் கிடைப்பதே பெரும்பாடாக உள்ளது. உழைக்காமலே அனைத்தும் கிடைக்கும் போது யாருக்கு கஷ்டப்பட்டு வேலை செய்யத்தோன்றும்.

இப்படி எல்லாம் இலவசங்களை தேர்தல் அறிக்கையில் அறிவிக்கக்கூடாது என்று ஏதாவது சட்டம் வராதவரை இவை தொடர்ந்துகொண்டே தான் இருக்கும். இவை எல்லாம் எங்கே சென்று முடியுமோ! தற்போதெல்லாம் வெறுத்துப் போய் விட்டது. போங்கடா! என்னத்தையோ பண்ணித்தொலைங்க! என்று தான் நினைக்கத்தோன்றுகிறது.

கொசுறு 1

கேப்டன் வடிவேல் பிரச்சனை ஊர் அறிந்தது. கேப்டன் தன்னை மிரட்டுவதாக ஆரம்பம் முதல் கூறிக்கொண்டு இருக்கிறார் இந்தத்தேர்தலில் கேப்டனை எதிர்த்து நிற்கப்போவதாக அறிவித்து இருந்து கடைசியில்!! வாபஸ் பெற்று விட்டார். தற்போது தன்னை திமுக கூட்டணியில் இணைத்துக்கொண்டுள்ளார். இவர் சமீபத்தில் பேசிய பேச்சைப் பார்த்தால் அவர் திமுகவில் இணைந்ததே கேப்டனை தாக்குவதற்க்காகத்தான் என்பதைப்போல சகட்டுமேனிக்கு கேப்டனை பேசி வருகிறார். தண்ணி போடுறவன், அவன் இவன், லூசு, நீ ஜனாதிபதின்னா நான் ஒபாமா!! என்று இஷ்டத்திற்கும் உளறிக்கொண்டு இருக்கிறார்.

இது எப்படி இருக்கு என்றால் கவியரசர் பாடலான “பரமசிவன்” பாடல் தான் நினைவிற்கு வருகிறது. கலைஞர் ஆதரவு உள்ளது என்கிற தைரியத்தில் பேசி வருகிறார் நாளைக்கு ஒருவேளை காட்சி மாறினால் இவர் நிலை என்னவாகும் என்று நினைத்துப்பார்த்தாரா! கேப்டனை விடுங்கள் அம்மா சும்மா விடுவாரா. இந்திய அரசியலின் மூத்த தலைவர்களுள் ஒருவர், வயதானவர், முன்னாள் முதல்வர் என்றும் பாராமால் குண்டு கட்டாக தூக்கி ஜெயிலுக்குக் கொண்டு போனவருக்கு வடிவேல் எல்லாம் சுண்டைக்காய் மாதிரி. வடிவேல் கற்பனை செய்து இராத நிகழ்வை எல்லாம் அவர் வாழ்வில் நடத்தி டரியல் ஆக்கி விடுவார்.

கேப்டன் இது வரை வாயை திறக்காமல் இருக்கிறார் ஒருவேளை சரிக்கு சமமாக பேசினால் டேமேஜ் ஆகி விடும் என்று யோசிக்கிறாரோ என்னவோ! ஊர் இரண்டு பட்டால் கூத்தாடிக்கு கொண்டாட்டம் என்பார்கள்.. இங்கே நிலைமையே வேறாக இருக்கிறது. வடிவேல் கொஞ்சம் அடக்கி வாசிப்பது அவருக்கு நலம் இல்லை என்றால் பின்னால் அவர் வாழ்க்கை நிஜமாகவே காமெடி ஆக வாய்ப்புள்ளது.

கொசுறு 2

நேற்றைய ஆட்டத்தில் இந்தியர்களின் நீண்ட நாள் கனவு நிறைவேறியது அசைக்க முடியாத அணியாக இருந்த ஆஸியை காலிறுதியோடு வீட்டிற்கு அனுப்பி விட்டார்கள். நிச்சயம் இது அவர்களுக்கு கடும் அதிர்ச்சியாக இருக்கும் மற்றும் அனைத்து கிரிக்கெட் ரசிகர்களிடமும் இதே பேச்சாகவே இருந்து இருக்கும். வார்ன், மெக்ராத் போன்றவர்கள் இல்லாததால் பலம் குன்றிய அணியாகவே இருந்தது. எனவே கடந்த முறை போல எளிதாகவெல்லாம் வெற்றி பெற முடியாது என்பது பலரின் கருத்தாக இருந்தது. அதை நிரூபிக்கும் வகையில் நேற்றைய போட்டி இருந்தது. நம்மவர்கள் பேட்டிங் ஃபீல்டிங் பவுலிங் என்று அனைத்திலும் கலக்கினார்கள். இதுவும் நாம் வெற்றி பெற முக்கிய காரணம். நம்மவர்கள் திறமையானவர்கள் தான் ஆனால் தெனாவெட்டு சோம்பேறித்தனத்தால் தான் தோல்வி அடைகின்றனர். <Image Credit>

நேற்றையப்போட்டி நிச்சயம் பலருடைய இதயத்துடிப்பை எகிற வைத்து இருக்கும் தோனி மற்றும் முனாப் தவிர அனைவரும் சிறப்பாக விளையாடினார்கள். மீண்டும் ஒரு முறை ஆட்டநாயகனாக யுவராஜ் கலக்கினார். முன்பெல்லாம் பாக் உடன் விளையாடும் போது தான் பரபரப்பாக இருக்கும் தற்போது ஆஸிக்கு மாறி விட்டது. என்ன வாய்டா சாமி! ஒவ்வொருத்தனும் என்னா பேச்சு பேசுறானுக! சேர்த்து வைத்து அடிச்சாச்சு. பாண்டிங் நேற்று எந்த டிவியை உடைத்தார் என்று தெரியவில்லை இந்த உலகக்கோப்பையில் எந்த அணி வெற்றி பெற்றாலும் சந்தோசமே! இந்திய அணிக்கு வாழ்த்துக்கள். இன்று முழுவதும் கிரிக்கெட் பேச்சாகவே இருக்கும் வெள்ளிகிழமை வேற என்ஜாய் மாடி

Subscribe in a reader

Related posts:

1. ஊழல்! ஊழல்!! ஊழல்!!!
2. “பஸ் டே” என்ற …..
3. நண்பர்களுக்கு….

Tagged as: அரசியல், விமர்சனம்