எந்திரன் பாடல்கள் பற்றி ஒரு பார்வை

ஒரு பிரபலமான படம் வெளிவந்தால் தான் அது பற்றிய விமர்சனங்கள் குவியும் ஆனால் எந்திரன் படத்தின் பாடல் பற்றிய விமர்சனங்களே ஒரு படத்தின் விமர்சனங்களை விட அதிகமாக வந்து விட்டன. பாடல் பற்றிய விமர்சனம் நான் கொஞ்சம் தாமதமாக எழுத நினைப்பேன் ஆனால் இந்த முறை சில காரணங்களால் எழுத முடியாமல் போய் விட்டது. அதன் பிறகு பாடல் வெளிவந்து நீண்ட நாட்கள் ஆகி விட்டதாலும் ஏற்கனவே பலர் பாராட்டி விமர்சித்து அக்குவேறு ஆணிவேராக பிரித்து மேய்ந்து விட்டதாலும் இனி புதிதாக நான் எழுத ஒன்றுமில்லை என்று விட்டு விட்டேன்.

என் தளத்தை நீண்டகாலமாக படிப்பவரும் ரஜினி ரசிகருமான அருண் மற்றும் சில ரஜினி ரசிகர்கள் என்னை பாடல் விமர்சனம் எழுதக்கேட்டு கொண்டு இருந்தார்கள் அதிலும் குறிப்பாக அருண் பலமுறை கேட்டு விட்டார். இதன் பிறகும் நான் எழுதாமல் இருந்தால் அது பந்தா செய்வதைப்போல இருக்கும் என்பதால் இதை எழுதுகிறேன். ஏற்கனவே பலமுறை விமர்சனம் படித்தவர்கள் ரஜினி ரசிகர் அல்லாதவர்கள் இதன் பிறகு தொடர்வது உங்கள் விருப்பம்.

அருண் மற்றும் நண்பர்களுக்கு.. நான் புதிதாக கூற எதுவுமில்லை ஏற்கனவே பலர் பாடலைப்பற்றி விமர்சித்து விட்டதால் பாடல் பற்றிய மற்ற விசயங்களை அதிகமாகவும் பாடல் பற்றி குறைவாகவும் எழுதுகிறேன்.

Think Music

இந்தியாவிலேயே இது வரை வந்த படங்களிலேயே அதிக விலைக்கு பாடல்கள் விற்கப்பட்டு சாதனை புரிந்த படம் எந்திரன். சன் பிக்சர்ஸ் இந்தப்படத்தின் பாடல் உரிமையை Think Music க்கிற்கு விற்று இருந்தார்கள் இந்நிறுவனத்தின் ப்ரியா என்பவர் இதை 8 கோடிக்கு வாங்கி இருந்தார். விலையை கேட்டதும் எனக்கு கொஞ்சம் கலவரமாக இருந்தது. இவ்வளோ விலைக்கு பாடல் உரிமையை வாங்கி இந்த MP3 உலகத்தில் எப்படி லாபம் பார்ப்பார்கள் Think Music ப்ரியா Think பண்ணாம வாங்கிட்டாங்களோ! என்று நினைத்தேன்

பாடல் வெளிவந்து ஒருவாரம் கூட ஆகவில்லை அசால்ட்டாக போட்ட பணத்தை எடுக்க கூடிய நிலைக்கு வந்து விட்டார்கள். இந்த MP3 யுகத்தில் CD விற்பனை என்பது சவாலான விஷயம் தான் அப்படி இருக்க பல லட்சம் CD கள் அதிகமாக அடிக்கவேண்டிய நிலைக்கு வந்து விட்டது உண்மையில் ரஜினி ரசிகன் என்பதை தாண்டி எனக்கு பெரிய ஆச்சர்யம். இது நான் எதிர்பாராதது! எந்திரன் படத்தை எடுத்த சன் பிக்சர்ச்க்கு முன்னாடி லாபம் பார்க்கப்போகிறவர்கள் இவர்களாகத்தான் இருப்பார்கள். எந்திரன் பாடல்களை Think Music வாங்கப்போகிறார்கள் என்று அதிகாரப்பூர்வமாக வந்த பிறகு இவர்கள் தளத்தை அன்று பார்வையிட்டவர்கள் மட்டும் ஒரு லட்சத்திற்கும் அதிகமானோர். இதை நான் கூறவில்லை செய்தி நிறுவனங்கள் கூறியது.

எப்போதுமே ஒரு படத்தின் பாடல் வெளியானவுடன் வாங்குபவர்கள் அந்தப்படத்தின் கதாநாயகனுக்காக, இசையமைப்பாளருக்காக, இயக்குனருக்காக வாங்குபவர்களாகத்தான் இருப்பார்கள். இது அல்லாமல் படத்தின் மீதுள்ள எதிர்பார்ப்பில் வாங்கும் யாருக்கும் ரசிகரல்லாத சராசரி பொதுமக்கள். இதிலேயே Think Music படம் வெளிவரும் முன்பே கிட்டத்தட்ட லாபம் பார்த்து விட்டார்கள்.

பொதுவாக படம் வெளிவந்த பிறகு காட்சியுடன் பாடலை பார்க்கும் போது அதுவரை நமக்கு பிடிக்காத பாடல்கள் கூட விருப்பப்பாடல்களாக மாற வாய்ப்புண்டு. முதலில் கேட்கும் போது பிடிக்காத பாடல்கள் கூட பலமுறை கேட்ட பிறகு மற்றும் படத்தின் காட்சியுடன் பார்க்கும் போது நமக்கு பிடித்து விடுகிறது. எடுத்துக்காட்டாக சிங்கம் படத்தின் பாடல்கள் வெளியான போது பலர் அதை மொக்கை குப்பை என்று விமர்சித்து இருந்தார்கள் ஆனால் படம் வெளிவந்த பிறகு அதில் அனைத்து பாடல்களும் சூப்பர் ஹிட் ஆகி விட்டது. அதனாலையே ஒரு படம் வெளியான பிறகு அதன் பாடல் CD விற்பனை சூடு பிடிக்கிறது. Think Music எந்திரன் படம் வெளிவந்த பிறகு இது வரை வாங்காத ரசிகர்கள் மற்றும் பொதுமக்கள் வாங்கினால் அதன் லாபம் எங்கேயோ சென்று விடும். இது பொய் கணக்கல்ல நடைமுறையில் உள்ளதை கூறியுள்ளேன் மற்றும் Think Music பல லட்சம் CD க்கள் ஆர்டர் கேட்டு வந்துள்ளதை அதிகாரப்பூர்வமாக தெரிவித்துள்ளார்கள்.

ரஜினியும் விமர்சனமும்

ரஜினி படம் என்றாலே அங்கு கண்டிப்பாக கடுமையான விமர்சனமும் உடன் வந்து விடும். இதற்காகவே காத்திருந்தது போல கண்டபடி விமர்சிக்க வந்து விடுவார்கள். விமர்சனத்திற்கு அப்பாற்ப்பட்டவர் என்று யாருமே கிடையாது. ரஜினி ஒன்றும் விமர்சிக்கப்படக்கூடாதவர் அல்ல ஆனால் ஏதாவது சொல்லியே ஆக வேண்டும் ரஜினியை திட்டியே ஆக வேண்டும் என்று எழுதுபவர்களை பற்றி கூற என்ன கூறுவது?

பாடல் வெளிவந்தவுடனே எந்திரன் இ(ம்)சை என்று விமர்சனம் வந்து விடுகிறது. இதிலே பரிதாபமாக மாட்டிக்கொண்டவர் ரகுமான் தான். ரஜினி படத்தை திட்ட வேண்டி இருப்பதால்!! அதற்கு இசையமைத்த ரகுமானும் சம்பந்தமே இல்லாமல் சிறப்பாக இசையமைத்தும் கடுமையாக விமர்சிக்கப்படுகிறார். ஆனால் இவர்கள் இப்படி விமர்சிப்பதால் ஒரு வெங்காயமும் ஆகப்போவதில்லை முன்னரே கூறியபடி பாடல்கள் பெரும்பாலானவர்களின் பாராட்டைப்பெற்று விற்பனையில் புதிய சாதனையை ஏற்படுத்தி விட்டது.

எந்திரன் பாடல் விற்பனை சாதனைக்கு காரணம் ரஜினியா! ரகுமானா!!

ரஜினியை பிடிக்காதவர்களுக்கு சாக்கு கூற இன்னொரு வாய்ப்பு இந்த தலைப்பு. ரகுமான் மிகத்திறமையானவர் என்று நான் புதிதாக கூறுவது நகைப்புக்குரிய விஷயம் காரணம் உங்களுக்கே தெரியும். இரண்டு ஆஸ்க்கர் விருதுகளை அசால்ட்டாக வாங்கியவர். பல புதிய புதிய முயற்சிகளை இசையில் செய்து கொண்டு இருப்பவர். இவை அனைத்தும் அனைவருக்கும் தெரியும். இருப்பினும் எந்திரன் பாடல் விற்பனைக்கு ரகுமான் இசை என்பதைத்தாண்டி ஒன்று உள்ளது என்றால் அது கண்டிப்பாக ரஜினி தான்.

ரகுமான் இந்தப்படத்திற்கு இசை அமைக்கவில்லை என்றால் கண்டிப்பாக இந்த அளவிற்கு வெற்றி வந்து இருக்காது அதில் எனக்கு சந்தேகமில்லை எனவே பாடல்களின் மிகப்பெரிய வெற்றிக்கு ரகுமானும் ஒரு காரணம் ஆனால் சதவீத அளவில் ரஜினியே முன்னணியில் இருக்கிறார்.

இதே ரகுமான் ராவணன் படத்திற்கு இசையமைத்துள்ளார், பிரபல இயக்குனர் மணிரத்னம் இயக்கியுள்ளார் எந்திரன் பட நாயகி ஐஸ் நடித்துள்ளார் எந்திரன் அளவிற்கு இல்லை என்றாலும் இதுவும் பல கோடி பட்ஜெட்டில் எடுக்கப்பட்ட படம். இவ்வளவும் இருந்தும் ஏன் ராவணன் எந்திரன் படப்பாடலைப்போல படம் வெளிவரும் முன்பு இவ்வளவு பெரிய வெற்றி அடையவில்லை? ஏன் இதைப்போல 8 கோடிக்கு விற்பனை ஆகவில்லை?

எந்திரன் படத்தால் நாட்டுக்கு என்ன நன்மை?

இது தான் ரஜினியை பிடிக்காதவர்களுக்கும் மற்றும் நாட்டை அடுத்த கட்டத்துக்கு! கொண்டு செல்லப் பாடுபடும் அறிவுஜீவிகளின் கேள்வி. பலர் வழக்கம் போல ரஜினி நாட்டுக்கு என்ன செய்தார்? நாற்று நட்டாரா? பயிர் செய்தாரா? எம்குல பெண்களுக்கு மஞ்சள் அரைத்து கொடுத்தாரா! என்கிற ரேஞ்சுக்கு எழுதிட்டு இருக்காங்க….சிரிப்பு தான் வருது. எதையோ பேசிட்டு இருங்க! என்று இப்போதெல்லாம் விட்டு விடுகிறேன். இது எந்த பாதிப்பையும் முன்பு போல ஏற்படுத்துவதில்லை. சரி எதோ அவங்க கருத்தை!! சொல்றாங்க சொல்லிட்டு போகட்டும் நமக்கென்ன! என்று இருந்து விடுகிறேன். நாமளும் சேர்ந்து “பொங்கறது” குறைந்து விட்டது ஆனால் நிற்கவில்லை

ரஜினி என்றால் உடனே சொம்பை தூக்கிட்டு வந்துடறாங்க…. இவர்களைப் போன்ற நாட்டு நலனுக்காகவே தங்கள் வாழ்வை அர்பணித்து கொண்டவர்களுக்கும் தங்கள் ஒவ்வொரு நடவடிக்கையையும் நொடியையும் பயனுள்ளதாக கழிப்பவர்களுக்கும் தங்கள் சொத்து முழுவதையும் தானமாகவே கொடுத்து பாரியாக திகழ்பவர்களுக்கும் ஈடாக என்னைப் போன்றவர்களால் முடியாது என்பதால்….

எந்திரன் இசை

எனக்கு பொதுவாக ஒரு படத்தின் அனைத்து பாடல்களும் பிடிக்காது ஏதாவது ஒரு பாடல் ஸ்கிப் செய்து விடுவேன். சிவாஜியில் கூட சஹானா பாட்டு ரொம்ப மெதுவாக உள்ளதை போல இருக்கும் அதனால் iPod ல் கேட்கும் போது அந்த பாடல் வரும் போது அதற்கடுத்த பாடலுக்கு தாவிவிடுவேன் (ஆனால் பலருக்கு இந்தப்பாடல் பிடித்துள்ளது). சமீபத்தில் ஒரு படத்தின் அனைத்து பாடல்களுமே ரொம்ப பிடித்து இருந்தது என்றால் அது “பையா” படம் தான். தற்போது எந்திரன் படத்தின் அனைத்து பாடல்களுமே பிடித்து இருக்கிறது.

எந்திரன் இசை யாரை குறி வைத்து?

எந்திரன் பாடல் இசை C வகுப்பு ரசிகர்களை அதிகம் கவராது அவர்களுக்கு தேவுடா தேவுடா! எம்பேரு படையப்பா! போன்ற பாடல்கள் தான் பிடிக்கும். எனவே கண்டிப்பாக இந்தப்பாடல்கள் (படமும் கூட) A மற்றும் B வகுப்பு ரசிகர்களுக்கு தான்.

ஏன் பாடல்கள் A மற்றும் B வகுப்பு ரசிகர்களை குறி வைத்துள்ளது?

150 கோடி பட்ஜெட் படம் மற்றும் விஞ்ஞான கதை இது தான் முக்கிய காரணம். இந்தப்படம் வெளிநாட்டு வசூலையும் வெளிநாட்டு பார்வையாளர்களையும் சேர்த்து கவர வேண்டும் என்ற நோக்கில் எடுக்கப்படுகிறது. எனவே அதற்கு தகுந்த மாதிரியான இசையை கொடுத்தால் மட்டுமே படத்திற்கு ஒரு பலம் இருக்கும் ரஜினி ரசிகர்கள் அல்லாதவர்களும் ரசிக்க முடியும். எனவே தான் ரகுமான் அதை மனதில் வைத்து மற்றவர்களையும் கவரும் விதத்தில் அட்டகாசமாக இசையமைத்துள்ளார் பாடல் வரிகளிலும் ரஜினி புகழ் பாடும் வரிகளையும் வழக்கமாக வரும் அறிவுரை வரிகளையும் தவிர்த்துள்ளனர். இதில் வரும் இசையை கவனித்து பார்த்தால் பல நுணுக்கமான இசைகளை அவர் புகுத்தி இருப்பது தெரியும். ஒரு பாடல் என்று இல்லாமல் அனைத்து பாடல்களிலும் ஒரு ரிச்சான இசையை கொடுத்து இருக்கிறார். இதைப்போல அட்டகாசமான இசையை கொடுத்ததற்கு ரகுமானை எத்தனை பாராட்டினாலும் தகும். இவ்வளோ கோடி பணம் போட்டு எடுத்து “டண்டனக்க டனுக்குனக்கா”னு இசை அமைக்க முடியாது. எனவே சரியான முறையில் இசை கையாளப்பட்டுள்ளது.

இனி பாடல்கள் சிறிய விமர்சனம்

எனக்கு கேட்டவுடன் பச்சக்குன்னு பிடித்துக்கொண்ட பாடல்கள் காதல் அணுக்கள், கிளிமாஞ்சாரோ மற்றும் பூம் பூம் ரோபோடா. பின்னர் அனைத்து பாடல்களும் பிடித்து விட்டது. முதலில் எனக்கு இரும்பிலே ஒரு இதயம் பாடல் பிடிக்கவில்லை. எனக்கு ரகுமான் குரலில் அவ்வளவாக ஈடுபாடில்லை ஒரே மாதிரியாக பாடுகிறார் என்று எனக்கு எப்போதும் தோன்றுவதுண்டு [Opinion differs So Rahman fans no hard feelings ] ஆனால் இந்த இரும்பிலே இதயம் பாடல் அட்டகாசம். இவருக்கு இந்த பாடலுக்கான பொருத்தமான குரலாக எனக்கு தோன்றுகிறது. இதை கூறும் போது ஒரு பதிவர் எழுதியது நினைவிற்கு வருகிறது…. “இரும்பிலே ஒரு இதயம் பாடலை கதற கதறக் கேட்டுக்கொண்டு இருக்கிறேன்” என்று [கஷ்டப்பட்டல்ல ] நானும் பல முறை தற்போது கேட்கிறேன் ரொம்ப நல்லா இருக்கு.

எனக்கு தீம் இசையாக வரும் ரோபோடா அவ்வளவாக பிடிக்கவில்லை. இன்னும் சிறப்பாக செய்து இருக்கலாம். நான் ரொம்ப எதிர்பார்த்தேன் ஆனால் எனக்கு ஏமாற்றம் தான். அதுவும் இதில் வரும் இசை Slum Dog Millionaire (Liquid Dance பாடல்) மற்றும் 7G ரெயின்போ காலனி இசையை நினைவு படுத்துகிறது. என் எதிர்பார்ப்பை நிறைவு செய்யவில்லை. இதைப்போல படத்திற்கு இன்னும் அட்டகாசமான தீம் பாடலை தர ரகுமானுக்கு அதிக வாய்ப்பிருந்தும் தவறவிட்டு விட்டார் என்பது என் கருத்து. அதை மற்றபாடல்களில் ஈடு செய்தமையால் இதன் பாதிப்பு ரொம்ப இல்லாமல் போய் விட்டது.

அரிமா அரிமா பாடலில் மட்டுமே ரஜினியை உயர்த்தி அதுவும் ரோபோவுக்காக வரிகள் வருகிறது மற்றபடி படத்தின் எந்த பாடலிலும் ரஜினி புகழ் பாடும் வரிகள் இல்லை. அரிமா என்றால் சிங்கமாம். பாடலை ஹரிஹரன் பட்டாசாகப் பாடியுள்ளார். இந்தப்பாடலுக்கு பல்வேறு விதமாக வித்யாசமாக நடனம் அமைத்து இருப்பதாக கூறி உள்ளார்கள். இதற்கு போட்டுள்ள செட்டிங் எல்லாம் மிரட்டுகிறது.

ரஜினி படம் என்றாலே SPB இல்லை என்றால் ரசிகர்கள் சென்டிமென்ட்டாக செம டென்ஷன் ஆகி விடுவார்கள் இந்த முறையும் ஷங்கர்(ரகுமான்) ஏமாற்றாமல் SPB யை புதிய மனிதா! பாடலுக்கு கொண்டு வந்து இருக்கிறார். இவர் குரலுக்கு வயசே ஆகாதா! என்று எண்ணத்தோன்றுகிறது. SPB வந்தவுடன் அடையாரில் சென்று கொண்டு இருந்த வண்டி ECR சுங்கச்சாவடி தாண்டுன மாதிரி பறக்குது. இந்தப்பாடலில் ரகுமானின் பொண்ணு கதீஜாவின் குரல் ஆச்சர்யப்படுத்துகிறது. காதல் அணுக்கள் பாடலை ரஜினி கிட்டாரை வைத்து பாடுவதை பார்த்தாலே அசத்தலாக உள்ளது, துவக்கம் அவ்வளவு நன்றாக உள்ளது. கிளிமாஞ்சாரோ பாடல் பழங்குடியின பாடலாம் படத்தின் ஹிட் பாடல் என்று பண்பலை அலைவரிசைகள் கூறுகிறது. இந்தப்பாடலுக்கு ஒரு சிறப்பு எந்திரன் படத்தில் முதல் முதலாக காட்சிபடுத்தப்பட்டது இதுவாகும்.

பூம் பூம் ரோபாடா இந்த வருடத்தின் குழந்தைகள் விருப்பப்பாடலாக இருக்கும். இசை சேனல்களில் குழந்தைகள் இந்தப்பாடலை அதில் வரும் ரோபோ ரஜினியின் சேட்டைக்காக அதிகம் விரும்பி கேட்பார்கள் என்று நினைக்கிறேன். இந்தப்பாடல் மற்றும் இரும்பிலே ஒரு இதயம் பாடலை எல்லாம் எப்படி இசைக்குழுவினர் பாடுவார்கள்! என்று நினைத்தாலே கலவரமாக இருக்கிறது. இசைக்குழுக்களுக்கு ரஜினி பாடல்கள் பெரிய பலம். கூட்டத்தை ஈர்க்க பெரிதும் உதவும். இவர்களுக்கு இந்தப்பாடலை பாடுவதும் இசைப்பதும் ரொம்ப ரொம்ப சிரமமான விஷயம். அப்படியே செய்தாலும் ரொம்ப கொடுமையாக இருக்கும் என்று நினைக்கிறேன். இவர்கள் நிலை இந்த முறை கொஞ்சம் பாவம் தான்

முன்னோட்டம்

மாணவிகளை எரித்தவர்களுக்கு தூக்கு தண்டனை தந்தது சரி தவறு என்று விவாதங்கள் நடந்து கொண்டுள்ளது. பலர் ஆதரவாகவும் சிலர் எதிர்ப்பாகவும் கருத்துகளை தெரிவித்துக் கொண்டுள்ளார்கள். நானும் என்னுடைய எண்ணத்தை விரைவில் ஒரு ரணகளமான பதிவில் தெரிவிக்கிறேன்

Related posts:

1. எந்திரன் ரஜினி ஒரு மைக்ரோ முன்னோட்டம் – 1
2. எந்திரன் ரஜினி ஒரு மைக்ரோ முன்னோட்டம் – 2
3. பயணக்குறிப்புகள் [03-08-2010]

Tagged as: பாடல் விமர்சனம், ரஜினி