பயணக்குறிப்புகள் [03-08-2010]

புது வேலை மாற்றலில் இடையில் கிடைத்த ஒரு வார விடுமுறையில் ஊருக்கு வந்து (சென்று) இருந்தேன். விடுமுறை முழுவதும் சொந்தக்காரங்க வீட்டிற்கு செல்லவே சரியாகி விட்டது. கல்யாணம் ஆன பிறகு இது பெரிய இம்சையா இருக்கு. வீட்டில் இருக்கவே நேரம் இருப்பதில்லை. கல்யாணம் பண்ணப்போறவங்க தயவு செய்து சொந்தக்காரங்க குறைவாக உள்ள இடமா பார்த்து கல்யாணம் பண்ணிக்குங்க

கோவை

தமிழ் செம்மொழி மாநாடு நடந்த பிறகு கோவை எப்படி உள்ளது என்று பார்க்க ஆவலாக இருந்தேன். கோவை செல்லவேண்டிய வேலையும் வந்ததால் சரி ஒரு ரவுண்டு அடித்து விடலாம் என்று சென்றேன். மாநாட்டிற்காக பலர் சந்தோசப்பட்டாலும் சாலை அகலகப்படுத்தலில் மரங்கள் பலவற்றை வெட்டியதால் பலர் அதிருப்தி அடைந்து இருந்தனர். இதனால் இந்த வருடம் வழக்கமான குளிர்ச்சி இல்லாமல் அனல் காற்று வீசியதாக பலரும் குறைப்பட்டுக்கொண்டனர். எனக்கும் மரங்கள் இல்லாததால் பல இடங்கள் குழம்பி விட்டது, அந்தப்பகுதியே மாறியது போல இருந்தது.

அதுவும் PSG கலைக்கல்லூரி சாலை எல்லாம் மொட்டையாக இருந்தது. அதற்கு மாற்று மரங்கள் சில இடங்களில் வைத்து இருந்தார்கள்.. ஒழுங்காக பராமரிப்பார்கள் என்று நம்புகிறேன். சாலைகள் நன்கு அகலமாக சிறப்பாக இருந்தது. ஒரு நல்லது நடக்கணும் என்றால் சில கெட்டதையும் சகிச்சுத்தான் ஆக வேண்டி இருக்கு மரங்கள் வெட்டப்பட்டது போன்ற குறைகள் இருந்தாலும் பல வளர்ச்சி பணிகள் நடந்துள்ளன என்பதை மறுக்க முடியவில்லை. மரங்களை வளர்க்க இனி சிறுதுளி அமைப்பு போன்றவர்கள் முன் வருவார்கள் என்ற நம்பிக்கை உள்ளது.

சென்னை

சென்னையில் இரண்டு நாள் இருந்தேன் என்னுடைய சென்னை (அறை) நண்பர்களை மட்டும் சந்தித்தேன் சங்கர் சரவணன் ராஜ் போன்ற சில பதிவுலக நண்பர்களிடம் தொலைபேசியில் பேசினேன். எப்போதும் சென்னை சென்றால் சத்யம் திரையரங்கில் படம் பார்க்காமல் செல்ல மாட்டேன். இந்த முறை எவ்வளவோ முயன்றும் செல்ல முடியவில்லை. நண்பர்கள் அனைவருக்கும் திருமணம் ஆகி விட்டதால் ஒவ்வொருவரையும் பிடிப்பதே பெரிய லொள்ளாக இருக்கிறது. படம் தான் போனதே தவிர.. ஹி ஹி ஹி வழக்கமாக செல்லும் சவேரா மூங்கில் பாருக்கு சென்று என் நண்பனுடன் “உற்சாகமாக” இருந்து வந்து விட்டேன். அப்பாடா! ரொம்ப மாசம் ஆச்சு!

எக்ஸ்பிரஸ் அவென்யு

சட்டை எடுக்க வேண்டும் என்று என் நண்பனிடம் கூறி இருந்ததால் அவன் கூட சென்று சுற்றி விட்டு அவன் எக்ஸ்பிரஸ் அவென்யு நல்லா இருக்கு அங்கே போகலாம் என்று சொன்னான் என்று அங்கே சென்றோம். மிகப் பெரிய வணிக வளாகம். ஸ்பென்சர் ப்ளாசாக்கு பிறகு இங்கு தான் மிகப்பெரிய வாகனம் நிறுத்தும் இடத்தை பார்க்கிறேன் செம பெருசு. சென்னையில் வாகனங்களை நிறுத்த இடம் இல்லாததாலே பலர் ஒரு சில கடைகளுக்கு செல்வதை தவிர்க்கிறார்கள் அதனால் தற்போது வாகனம் நிறுத்தும் இடத்திற்கு அதிக முக்கியத்துவம் தருகிறார்கள். இங்கே (தற்போது பெரும்பாலான இடங்களில்) மணி கணக்கில் கட்டணம் வசூலிப்பதால் இதற்கே பெரும்பணம் போய் விடுகிறது. குறிப்பாக இதைப்போன்ற இடங்களில் உள்ள திரையங்கிற்கு வந்தால் 40 ருபாய் வாகன நிறுத்தக் கட்டணத்திற்க்கே சென்று விடும் போல உள்ளது.

கோபி

எங்கள் ஊர் கோபி பகுதியில் தேசிய நெடுஞ்சாலை சார்பில் பல இடங்களில் பாலங்கள் அமைத்து இருக்கிறார்கள். குறிப்பாக கோபியில் இருந்து அந்தியூர் செல்லும் வழியாக. பள்ளமாக இருந்த பல இடங்கள் உயரப்படுத்தப்பட்டு சீராக தார்ச்சாலை போடப்பட்டு இருந்தது. ஏற்கனவே ஈரோடு மாவட்ட பகுதியில் நெடுஞ்சாலைகள் சிறப்பாக இருக்கும் தற்போது இந்த சாலை நிஜமாகவே கலக்கலாக உள்ளது. சாலையில் வண்டி ஒட்டி செல்லவே ரொம்ப விருப்பமாக உள்ளது. கோபியில் நகராட்சி தலைவர் அதிமுக அதனால் திமுக அதிமுக சண்டையில் கோபியில் எந்த வளர்ச்சி பணியும் ஒழுங்காக நடைபெறவில்லை. சாலைகள் பல மிக மோசமாக உள்ளது. மத்தியில் ஒரு ஆட்சி மாநிலத்தில் ஒரு ஆட்சி இருந்தால் எப்படி வேலைக்காகாதோ அதே மாதிரி மாநிலத்தில் ஒரு ஆட்சி நகராட்சியில் வேற ஆட்சி இருந்தால் விளங்காம போய்டும். அது தான் இப்ப கோபியில் நடக்கிறது. இவங்க சண்டையில் பாதிக்கப்படுவது என்னவோ பொதுமக்கள் தான். இது இப்படி இருந்தாலும் கோபியின் மதிப்பு நாளுக்கு நாள் அதிரித்துக்கொண்டே செல்கிறது. தற்போது ஒரு சென்ட்டின் நில மதிப்பு மூன்று லட்சத்து பத்தாயிரம்

கோபியில் வள்ளி திரையரங்கில் நீண்ட வருடங்களுக்கு பிறகு தற்போது படம் பார்த்தேன் மதராசப்பட்டினம். படம் அருமை ஒரு சில குறைகள் இருந்தாலும் படம் ரொம்ப நன்றாக இருந்தது. படத்தில் G.V.பிரகாஷ் இசை அவ்வளவாக ..இல்லை சுத்தமாகவே பொருத்தமாக இல்லை. ஆர்யா மற்றும் அமி நடிப்பு நன்றாக இருந்தது. இவர்கள் அனைவரையும் விட கலக்கியது அந்த பாட்டி தான். எதுவுமே பேசாமல் ஆனால் அற்புதமாக முகபாவனைகளை வெளிப்படுத்தி அசத்தி இருந்தார்கள். அதுவும் கடைசியில் அவரின் நடிப்பு அட்டகாசம். இது வரை நீங்கள் இந்தப்படத்தை பார்க்காமல் இருந்தால் கண்டிப்பாக படத்தைப்பாருங்கள். நன்றாக உள்ளது. களவாணி படம் பார்க்க நினைத்தேன் ஆனால் எங்கள் ஊரில் அந்தப்படம் வெளியாகவில்லை.

தற்போது இந்திய அரசு டாலர் ஈரோ போன்றவற்றிக்கு இருக்கும் சிம்பளை போன்று நமது இந்திய ரூபாய்க்கும் கொண்டு வந்து விட்டது நம் அனைவருக்கும் தெரிந்ததே. எனக்கு சிம்பள் அவ்வளவா பிடிக்கவில்லை ஏனோ.. ஆனால் இதைப்போல அறிவித்தது ரொம்ப சந்தோசமாகவும் பெருமையாகவும் இருந்தது. திடீரென நம்முடைய மதிப்பு உயர்ந்து விட்டதைப்போல உணர்வு பலருடன் நாமும் போட்டிக்கு வந்து விட்டதைப்போல ஒரு பெருமிதம். இந்த முறையை அறிவித்த பிறகு அடுத்த நாள் செய்தித்தாள்களில் ருபாய் என்பதற்கு பதிலாக இந்த சிம்பளை பார்த்த போது ஆச்சர்யமாகவும் அதே சமயம் மிக மிக மகிழ்ச்சியாகவும் உணர்ந்தேன். இந்த சிம்பளை உருவாக்கியவர் ஒரு தமிழர் எனும் போது மகிழ்ச்சி இரு மடங்காகிறது.

விர்ர்ர்ர்ர்ர்ரர்ர்ர்ர்ரும்

ஊர்ல எந்த பைக் இருந்தாலும் எனக்கு ஸ்ப்லெண்டர் ப்ளஸ் மேல அளவு கடந்த காதல். சென்னையில் இருந்த போது இதே வண்டி தான் வாங்குவேன் என்று பல வருடம் முன்பே கூறி எந்த மாற்றமும் இல்லாமல் அதே நீலக்கலர் வண்டியை வாங்கினேன். நாங்க ஒரு வாட்டி முடிவு பண்ணிட்டா… சரி சரி ). அதை ஓட்டுறதுன்னா எனக்கு ரொம்ப விருப்பம் அதுவும் போக்குவரத்து குறைவாக உள்ள சாலை என்றால் குஷி ஆகி விடும். சிங்கப்பூர் சென்ற போது அதை என்னோட மச்சானிடம் கொடுத்து விட்டு சென்று விட்டேன். ஊருக்கு சென்றால் இதை எடுத்துக்கொள்வேன். இந்த முறை என்னோட அக்கா பையனை ஈரோடில் உள்ள பள்ளியில் ஹாஸ்டலில் சேர்த்துள்ளார்கள் எனவே அவனை பார்ப்பதற்காக இதே பைக்கில் சென்றோம். நீண்ட மாதங்களுக்கு பிறகு இந்த வண்டியை ஓட்டப்போவதால் சந்தோசமாக இருந்தது. ஹெல்மெட் அணியாமல் வண்டி ஓட்ட மாட்டேன். ஹெல்மெட்டை மாட்டிக்கொண்டு கோபியில் இருந்து ஈரோடு வரை சென்றது செம ஜாலியாக இருந்தது. அதுவும் சித்தோடு சென்றவுடன் அங்கே இருந்து புதிதாக போடப்பட்டுள்ள புறவழிச்சாலையில் சென்றோம். பட்டாசாக இருந்தது சாலை… அதில் வண்டி ஓட்டும் சந்தோசமே தனி தான். செம!

ஈரோடு

ஈரோடில் ஒரு முறை அருணை (வால்பையன்) சந்தித்து இருந்தாலும் அதன் பிறகு சென்ற போதெல்லாம் சந்திக்க முடியவில்லை இந்த முறை நேரமிருந்ததால் அருண் மற்றும் அவரது நண்பர் பிலால் மற்றும் பதிவை மட்டும் படிக்கும் கார்த்திக்கையும் சந்தித்தேன். பிலால் ஏற்கனவே அறிமுகமானவர் கார்த்திக் புதியவர் எனக்கு. ரொம்ப நன்றாக பழகினார் புதிதாக ஒருவரிடம் பழகும் உணர்வே இல்லாமல் ரொம்ப நாள் பழகியவர் போல அவரிடம் பேசிக்கொண்டு இருந்தேன். பின்னர் வீட்டிற்கு செல்ல இரவு நேரம் ஆகி விட்டதால் செல்லவேண்டியதாகி விட்டது. அருண் அடம்பிடித்து அங்கே உள்ள கடையில் மீன் சாப்பிட்டே ஆக வேண்டும் என்று அன்பு கட்டளை இட்டதால் எனக்கு சாப்பிட விருப்பம் இல்லை என்றாலும் அவரது விருப்பத்திற்காக சென்றேன். கடைசியில் நானே எதிர்பார்க்காத அளவிற்கு சாப்பிட்டு விட்டேன், ரொம்ப நன்றாக இருந்தது. நன்றி அருண் பரிசல் வெயிலான் வேலன் ஆகியோரிடம் பேச மட்டுமே முடிந்தது நேரில் சந்திக்க முடியவில்லை.

எந்திரன்

என் மனைவி மற்றும் மகன் ஊரில் உள்ளார்கள் அவர்களை அழைத்து வர செப்டெம்பரில் சிறு விடுமுறையில் வருவேன் (என்னோட பையன் இங்கே இல்லாம செம போர்).. ஹி ஹி அப்படியே எந்திரன் வெளியாகும் நேரமாக பார்த்து. தாமதம் செய்தால் மனதை தேத்திக்கொண்டே சிங்கையில் பார்க்க வேண்டியது தான். எங்கே பார்த்தாலும் சென்னையில் பார்ப்பதை போல வரவே வராது. இணையத்தில் உலவும் எந்திரன் பன்ச் வசனம் இது. படத்தில் இருக்கும் என்ற நம்பிக்கை இல்லை ஆனால் நன்றாக இருந்தது. “Buddy… if i beat you, even Google won’t be able to find you” இது எப்படி இருக்கு

நட்பு

எந்திரன் பாடல்கள் அகிலமெங்கும் கலக்கிட்டு இருக்கு படமும் பட்டயக் கிளப்ப போகப்போகிறது. வெற்றிக்கு பிறகு வைத்துக்கொள்கிறேன் கச்சேரிய Lol. குசேலனில் பல்பு வாங்கி விட்டதால் கொஞ்சம் உஷாராக இருக்க வேண்டியதாக இருக்கிறது எதிரிகளே! ஜெலுசில் வாங்கி வைத்துக்கொள்வதை தவிர உங்களுக்கு வேறு வழி இல்லை ஹி ஹி ஹி. சிங்கப்பூர் ல் உள்ள மகேஷ் என்ற ரஜினி ரசிகர் என்னை மின்னஞ்சலில் தொடர்பு கொண்டார் நேரமிருந்தால் சந்திக்கலாம் என்று கூறி இருந்தேன். எந்திரன் பாடல் வெளியான சமயம் லிட்டில் இந்தியா பகுதி சென்று இருந்தேன் அவரும் எந்திரன் CD வாங்க வந்து இருந்தார். பார்த்து பேசியவுடன் எவ்வளவோ மறுத்தும் அண்ணா! நீங்க எந்திரன் CD வாங்கியே ஆக வேண்டும் என்று அவருக்கு வாங்கியதை வறுபுறுத்தி எவ்வளவோ மறுத்தும் கேட்காமல் எனக்கு கொடுத்து பணம் வாங்க மறுத்து விட்டார். கொஞ்ச நேரம் அவருடைய அன்பில் திணறி விட்டேன், காரணம் இந்த CD வாங்க எவ்வளவு நேரம் காத்து இருந்தார் என்று எனக்கு தெரியும். இவ்வளவுக்கும் அன்று தான் அவருடன் தொலைபேசியிலே பேசினேன். ரஜினி என்ற ஒரு நபரால் பல நபர்களை நண்பர்களாக பெற்று இருக்கிறேன் என்றால் கண்டிப்பாக மிகையில்லை. ரொம்ப நன்றி மகேஷ்.

வருத்தம்

நான் முன்பு இருந்த வேலையில் ஷிப்டில் இருந்ததால் பல நாட்கள் விடுமுறை கிடைத்தது அதனால் பதிவு எழுத நேரமிருந்தது. தற்போது புது வேலையில் வழக்கமான முறையில் நேரம் வந்து விட்டதால் சுத்தமாக நேரமில்லை. நிறைய பேரு இடுகை படிக்க நேரமில்லாம அப்படியே இருக்குது…. மெதுவா வருகிறேன். காலையில் எழுந்து அலுவலகம் செல்லவும் திரும்ப வந்து கொஞ்ச நேரம் இணையத்தில் இருந்து விட்டு தூங்கவுமே நேரமுள்ளது. வார இறுதி நாட்களான சனி ஞாயிறு மட்டுமே இனி ஓய்வு. எனவே பதிவு எழுதும் எண்ணிக்கையும் குறைந்து விடும். நான் எழுதாமல் இருப்பதால் பூமி வேறு பாதையில் சுற்றப்போவதில்லை இருந்தாலும் ஆசை ஆசையாக எழுத நினைக்கும் விஷயங்கள் பலவற்றை இனி அவ்வளவாக எழுத முடியாது என்று நினைக்கும் போது எனக்கு ஏற்படும் சிறு வருத்தம் மற்றும் ஏமாற்றத்தை தவிர்க்க முடியவில்லை. என்னமோ போங்க!

No related posts.