எந்திரன் ரஜினி ஒரு மைக்ரோ முன்னோட்டம் – 1

எந்திரன் பாடல் வெளியீடு மற்றும் பட வெளியீடு பற்றி (அரைகுறையாக) அறிவித்தவுடன் எந்திரன் பற்றிய பரபரப்பு ஊடங்களிடமும் ரசிகர்களிடமும் தொற்றிக்கொண்டது. படத்தை பற்றிய அரசல்புரசலான செய்திகள் வேறு பலரின் ஆர்வத்தை அதிகரித்து வைத்து இருக்கிறது. எல்லோருக்கும் வயதாக வயதாக முதுமை முகத்தில் கூடும் தலைவருக்கு மட்டும் இளமை கூடிக்கொண்டே செல்கிறது அட! பொய் சொல்லலைங்க நீங்களே இங்க இருக்கிற எந்திரன் படங்களை பாருங்க அப்புறம் சொல்லுங்கள்.

ஷங்கர்

இயக்குனர் ஷங்கர் நடிப்பு எல்லாம் முயற்சித்து பின் மீசைக்கார தயாரிப்பாளர் K.T.குஞ்சுமோன் பார்வையில் பட்டு “ஜென்டில்மேன்” என்ற 1000 வாலா சரவெடியாக புறப்பட்டு தற்போது 150 கோடி பட்ஜெட்டில் எந்திரன் படத்தை எடுத்து முடித்து இருக்கிறார். முதல் படத்தில் இருந்து தற்போது வரை அதே வேகத்தில் பரபரப்பில் கவர்ச்சியில் இருக்கிறார் என்றால் சாதாரணமான விசயமாக தெரியவில்லை. தன்னுடைய கதையையே மாற்றி மாற்றி வேறு படப்பெயர்களில் எடுத்தாலும் இன்றும் ஷங்கர் படம் என்றால் அனைவரையும் எதிர்பார்ப்பில் இருக்க வைப்பது அவரோட திறமையே! இவருடன் வந்த பல இயக்குனர்கள் சரக்கு தீர்ந்து கம்முனு இருக்கிறார்கள். இவர் இருக்கிற சரக்கையே மாற்றி மாற்றி வித விதமாக கொடுத்து டாப்பில் இருக்கிறார்.

படத்தை ஃபேன்ஸியாக கொடுப்பதில் இன்று வரை இவரே கிங் ஆக இருக்கிறார். இவர் தான் படத்தின் பெயருக்கு கீழே போடும் வரியை (Caption) தனது “ஜென்டில்மேன்” படத்தில் Some thing special என்று ஆரம்பித்து வைத்தவர். கிராஃபிக்ஸ் மற்றும் பல தொழில்நுட்ப உத்திகளை காட்டி அசரவைத்தவர் உச்சமாக ரஜினியை சிவாஜியில் வெள்ளையாக காட்டி அனைவரையும் ஆச்சர்யப்படுத்தியவர். இவருக்கு உதித்த ஆசை தான் ரோபோ படம். இதை எப்படியாவது சிறப்பாக எடுக்க வேண்டும் என்பது இவரது கனவு. எனவே அவரே அறிவித்து இருக்கிறார் எந்திரன் என்னுடைய கனவுப்படம் என்று. ஆனால் பிரச்சனை எப்போதும் காஸ்ட்லி கனவாகவே காண்பவர் இதை அதிகப்படி காஸ்ட்லியாக கனவு கண்டு விட்டார்

கமல் மற்றும் ஷாருக்

தயாரிப்பாளர் கிடைப்பது பிரச்சனை என்றாலும் (இந்தப்படம் திட்டமிட்ட போது கூறப்பட்ட தயாரிப்பு மதிப்பு 50 கோடி, தற்போது 150 கோடி) படத்தின் பட்ஜெட் மற்றும் கதைக்கேற்ற வொர்த்தான நடிகரை பிடிப்பது அதைவிட பிரச்சனையாக இருந்தது. முதலில் இது குறித்து கமலிடம் பேசப்பட்டது பின் கதை விவாதம் நடந்து பின் ஏனோ அது தொடரவில்லை, கமல் நடிக்கவில்லை என்று கூறி விட்டார். கமலின் 50 ம் ஆண்டு திரையுலக விழாவில் கூட ரஜினி ஷங்கரிடம் “இந்தப்படத்துக்கு கமலுக்காக அமைத்து இருந்த காட்சிகளை மாற்றி விடுங்கள் என்று கூறி விட்டேன் கமல் அளவிற்கு என்னால் நடிக்க முடியாது” என்று கூறியதாக தன்னடக்கமாக குறிப்பிட்டார்.

இதன் பின் ஷங்கர் சென்றது ஷாருக்கிடம், காரணம் ஹிந்தி என்றால் பெரிய ரீச் கிடைக்கும் (ஹிந்தி படங்களுக்கு உலகம் முழுவதும் பெரிய வரவேற்புள்ளது), தயாரிப்பும் ஷாருக்கின் Red Chilly Company செய்வதாக கூறியதால் டபுள் ஓகே என்று ஷங்கர் குஷியாக இருந்தார். ஆனால் ஷாருக் கதையில் அதை மாற்று இதை மாற்று என்று கூறி ஷங்கரின் கனவை கலைக்க முயற்சித்ததாலும் அவர் நினைத்தபடி காட்சிகள் அமையாததாலும் அவருடன் பிரிய வேண்டியதாகி விட்டது. ஆனால் ஷாருக்கிடம் மொத்த திரைக்கதையையும் கூறி விட்டார் தற்போது எப்படி எடுத்து இருக்கிறார் என்று தெரியவில்லை. ஷாருக் இந்த சண்டையால் அல்லது பிரிவால் வேண்டும் என்றே Robo என்ற தலைப்பையும் அதுபோல இருக்கும் (The Robo, Robot) போன்ற தலைப்புகளையும் முன்பதிவு செய்து ஷங்கர் ஹிந்தியில் அதை பயன்படுத்த முடியாத மாதிரி செய்து கடுப்பை கிளப்பினார். தற்போது என்ன நிலைமை என்று தெரியவில்லை.

ஐஸ்

எந்திரனுக்கு கண்டிப்பாக சந்தேகமில்லாமல் கூடுதல் பலம் ஐஸ். ரஜினியின் எந்த படத்தையும் விட இந்தப்படத்திற்கு மிகப்பொருத்தமாக இருப்பார், காரணம் படத்தின் பட்ஜெட் மற்றும் கதை அப்படி. அதனால் தான் என்னவோ ரஜினியுடன் ஐஸ் சேர்ந்து நடிப்பது தள்ளிப்போய்க் கொண்டே இருந்து இருக்கிறது. வெளிநாடுகளில் ஏற்கனவே ரஜினியின் பாக்ஸ் ஃஆபிஸ் பலம் அறிந்தது தான். தோல்விப்படமான குசேலனின் வசூலையே இன்னும் இங்கே வெற்றி பெறும் பலரின் படங்கள் முறியடிக்கவில்லை கமலின் தசாவதாரம் தவிர. அப்படி இருக்கும் போது உடன் ஐஸ் இருப்பது படத்திற்கு கூடுதல் ரிச்னெஸ் கொடுக்கும்.

ரஜினி

இதன் பிறகு யாரும் எதிர்பாராமல் வந்தவர் தான் ரஜினி. ரஜினி முன்பு ஒரு விழாவில் “ஷங்கர் ரோபோ என்ற படம் பற்றி என்னிடம் பேசி இருக்கிறார் 50 கோடி பட்ஜெட் ஆண்டவன் அருள் இருந்தால் இணைந்து செய்வோம்” என்று கூறி இருந்தார். இந்த ரோபோ படம் ரஜினியின் சிவாஜிக்கு முன்னாலே பேசப்பட்ட படம் கிட்டத்தட்ட கமல் இந்தியன் படம் வெளி வந்த போதில் இருந்து பேசப்பபடுகிறது.

ஷங்கர் சிவாஜியில் ரஜினியுடன் பணிபுரிந்த பிறகு அவரது திறமை கமிட்மென்ட் முழுவதையும் அறிந்து இருப்பார் என்று நான் நினைக்கிறேன். ரஜினியும் மற்றவர்கள் ஒத்துக்கொள்ளாத கதையில் நான் என்ன நடிப்பது! என்று கவுரம் பார்க்காமல் ஷங்கர் மீது நம்பிக்கை வைத்து நீண்ட வருடங்களுக்கு பிறகு ஒரு இயக்குனர் முடிவு செய்த கதையில் நடிக்கிறார். நீண்ட வருடங்களாக ரஜினி தேர்வு செய்வதே இறுதியான கதை.

ஷங்கரின் இயக்கத்தில் எந்தவித தலையீடும் செய்யாமல் இயக்குனரின் பிள்ளையாக நடித்துள்ளார் என்று நான் கூறவில்லை ஷங்கர் கூறியுள்ளார். ரஜினி ஷங்கருக்கு தன் அனுபவத்தால் காட்சிகளில் சில டிப்ஸ் கொடுத்து இருக்கலாம் கண்டிப்பாக ஷங்கர் சுதந்திரத்தில் தலையிட்டு இருக்க மாட்டார். ரஜினியின் தொழில் பக்தி பலரும் அறிந்தது தான், அதனால் தான் காலங்கள் கடந்தும் இன்னும் அதே உச்ச நிலையில் இருக்கிறார்.

ரஜினியை இயக்குனர் பாலச்சந்தர் மகேந்திரன் போல தற்போது சரியாக யாரும் பயன்படுத்திக்கொள்ளவில்லை அதற்கு ரஜினி தேர்ந்தெடுக்கும் இயக்குனர்களும் கதையும் ஒரு காரணம். படம் விறுவிறுப்பாக பொழுது போக்கு அம்சமாக இருக்கிறது அனைத்து தரப்பு மக்களையும் கவர்கிறது என்பதில் எந்த சந்தேகமும் இல்லை என்றாலும் அவரது முழுமையான நடிப்பை வெளிக்கொணரும் படி ஒரு படம் அமைந்து நீண்ட வருடங்களாகி விட்டது என்பது என்னைப்போன்ற ரசிகர்களுக்கு ஏமாற்றம் தான். இதை எந்திரன் நிறைவு செய்யும் என்று நம்புகிறேன் குறிப்பாக வில்லன் ரஜினி. ரஜினியை வைத்து எப்படிப்பட்ட சண்டை காட்சிகளை அமைக்க முடியும்! ஆனால் வாய்ப்பு கிடைத்தும் அதை ஷங்கர் சிவாஜியில் வீணடித்து இருந்தார். இதை எந்திரனில் சரி செய்வார் என்று எதிர்பார்க்கிறேன். ரஜினி நடிக்கவில்லை என்பதை விட அவரை யாரும் சரியாக பயன்படுத்திக்கொள்ளவில்லை என்பதே உண்மை!

ரஜினி உண்மையில் மிகச்சிறந்த நடிகர் ஆனால் ரசிகர் வட்டம் என்ற வலையில் இருந்து வெளியே வரமுடியாமல் இருப்பவர். தன்னால் தயாரிப்பாளர் நஷ்டப்பட்டு விடக்கூடாது என்று நினைத்து புதிய முயற்சிகளில் ஈடுபடாமல் மினிமம் கியாரண்டி மசாலா படங்களில் நடித்துக்கொண்டு இருக்கிறார். ரஜினிக்கு நடிக்க தெரியாது! என்று கூறுபவர்கள் கூட பலர் கமலின் நடிப்போடு ஒப்பிட்டு குறை கூறலாமே தவிர மற்றபடி அவரின் நடிப்பை யாரும் குறை கூற முடியாது.

எத்தனை பெரிய நடிகராக இருக்கட்டும் எவ்வளவு சிறப்பான நடிப்பு திறமை உள்ளவராக இருக்கட்டும் ரஜினியின் பாட்ஷா கதாப்பாத்திரத்தில் ரஜினியை தவிர எவராலும் நடிக்க முடியாது, இதை எவராலும் மறுக்க முடியாது சவாலாகவே கூறுகிறேன். “நான் ஒரு தடவ சொன்னா நூறு தடவை சொன்ன மாதிரி” என்று ரஜினி கூறியதை வேறு யாராவது கூறி நடித்தால் குச்சி மிட்டாயும் குருவி ரொட்டியும் கையில் வைத்து இருக்கும் எஃபெக்ட் மட்டுமே கிடைக்கும் வேறு எந்த பாட்ஷா எஃபெக்ட்டும் கிடைக்காது சும்மா அதிருதுல்ல….

ஒரே இடுகையில் முடிக்க நினைத்தேன் தலைவரை பற்றி எழுதினால் தொடர்ந்து அருவி மாதிரி வந்துட்டே இருக்குது எந்திரன் பற்றிய முழுமையான தகவல்களை அடுத்த பகுதியில் நிறைவு செய்கிறேன். அடுத்த பகுதியில் சன் டிவி பற்றி, ரசூல் பூக்குட்டி ஒளிப்பதிவாளர் ரத்னவேலு ஆகியோர் கூறியது, ஊடகங்களுக்கு எந்திரன் பற்றிய செய்திகள் கொடுக்காமல் கடுப்படிக்கும் சன் டிவி, ரஜினியை பென்டெடுக்கும் ஷங்கர், சன் டிவி ஷங்கர் ஊடல் மற்றும் பல சுவாராசியமான விசயங்களை பற்றியும் பார்ப்போம்.

எந்திரன் ஆட்டம் தொடரும்!

No related posts.

Tagged as: ரஜினி