எந்திரன் ரஜினி ஒரு மைக்ரோ முன்னோட்டம் – 2

எந்திரன் படம் ரஜினி என்று முடிவான பிறகு படப்பெயருக்கு முதலில் தேர்வு செய்யப்பட பெயர் Robo ஆனால் தமிழில் பெயர் வைத்தால் வரிவிலக்கு என்பதால் “இயந்திரம்” என்று பெயர் தேர்வு செய்யப்பட்டது ஆனால் ரசிகர்களுக்கு படப்பெயர் பிடிக்கவில்லை “எந்திரன்” என்று மாற்றம் செய்யும்படி கோரிக்கைகள் வந்தன. பிறகு “எந்திரன்” என்று இறுதியாக பெயர் மாற்றம் செய்யப்பட்டது. ஒரு ரோபோ ரோஜாப் பூவை வைத்து இருக்கும்படி வித்யாசமான முறையில் படத்தின் விளம்பரமும் செய்யப்பட்டது.

தயாரிப்பாளர்

படத்தை தயாரிக்க பெரிய நிறுவனமாக தேவை என்பதால் முடிவானது தான் ஐங்கரன் இண்டர்நேஷனல் – ஈராஸ். இவர்கள் தான் பெரும்பாலான தமிழ் படங்கள் வெளிநாடுகளில் வெளியிடும் உரிமை பெறுபவர்கள். ரஜினியின் சிவாஜி படத்தை வாங்கி வெளியிட்டதில் 200% லாபம் அடைந்ததாக ஐங்கரன் இண்டர்நேஷனல் நிறுவனத்தின் உரிமையாளர்களில் ஒருவரான கருணாமூர்த்தி அதிகாரப்பூர்வமாக அறிவித்து இருந்தார். தோல்வியடைந்த குசேலன் படத்தில் கூட ஓரளவு லாபம் பார்த்தவர்கள். கிட்டத்தட்ட 30% படப்பிடிப்பு முடிந்த நிலையில் உலகம் முழுவதும் பொருளாதார சரிவு ஏற்பட்டது இதனால் பல தொழில்கள் நிறுவனங்கள் முடங்கின மற்ற நிறுவனங்களை போல ஐங்கரனும் பாதிக்கப்பட்டது இதனால் எந்திரன் படப்பிடிப்பு தொடருமா! என்று செய்திகள் பரவத்தொடங்கின. ஒரு சிலர் எந்திரன் பாதியில் நிறுத்தம் என்று கூறத்தொடங்கினார்கள் இருந்தாலும் படப்பிடிப்பு மெதுவாக நடந்துகொண்டு தான் இருந்தது.

சன் டிவி

இந்நிலையில் தான் படத்தை வாங்கி கொள்வதாக சன் அறிவித்தது. ஐங்கரன் இண்டர்நேஷனலுக்கு அவர்கள் செலவிட்ட தொகை மற்றும் அதற்கு மேல் பணம் கொடுக்கப்பட்டு சன் தயாரிப்பு உரிமையை பெற்றுக்கொண்டது. இந்தப்படத்தை தயாரிக்க சன்னை விட பொருத்தமான நபர் இருக்க முடியாது என்பதால் ஷங்கரும் ஒத்துக்கொண்டார். ஷங்கர் ஒத்துக்கொண்டார் என்பதை விட ஒத்துக்கொள்ள வேண்டிய நிலை. ரஜினி ஷங்கர் கலாநிதிமாறன் முன்னிலையில் ஒப்பந்தம் நிறைவேற்றப்பட்டது.

இதே சன் தான் தனக்கு குசேலன் படத்தின் தொலைக்காட்சி உரிமை கிடைக்காத ஆத்திரத்தில் (அப்போது கலைஞர் டிவி உரிமை பெற்று இருந்தது மற்றும் கலைஞர் மாறன் குடும்பத்தினர் சண்டை நிகழ்ந்து கொண்டிருந்தது) குசேலன் படத்தை என்னவெல்லாம் செய்து டேமேஜ் செய்ய முடியுமோ அத்தனையையும் செய்தார்கள். திரையரங்கு உரிமையாளர்களை தூண்டி விட்டு வேண்டும் என்றே பிரச்சனை செய்தார்கள். படம் வெளிவந்த மூன்றாம் நாளே நஷ்ட ஈடு கேட்டு அவர்கள் போராட்டம் செய்தார்கள். இதை சன் டிவி நன்றாக ப்ரொஜெக்ட் செய்தது, படமும் ரசிகர்கள் வரவேற்ப்பை பெறாததால் இன்னும் கொஞ்ச நாள் ஓடி இருக்க வேண்டியது இவர்கள் செய்த அட்டூழியத்தால் விரைவிலேயே காலி ஆனது. இது பற்றி எழுதினால் ஏகப்பட்டது வரும்… இதனால் எந்திரனுக்கே வருகிறேன்.

எந்திரன் படத்தை சன் டிவி வாங்குகிறது என்றால் சும்மா அல்ல! தண்ணீரிலே வெண்ணை எடுப்பவர்கள் திமிங்கலத்தை வாங்குகிறார்கள் என்றால் சும்மாவா! பல கணக்கு போடாமலா வாங்குவார்கள். எந்திரனை வைத்து எவ்வளவு சம்பாதிக்கலாம் என்று எப்போதோ திட்டமிட்டு இருப்பார்கள். அதன் தொடக்கமாக அவர்களே எதிர்பாராமல் அவர்களுக்கு கிடைத்த ஜாக்பாட் தான் எந்திரன் புகைப்படங்கள் வெளியீடு. எந்திரன் படத்தின் புகைப்படங்களை தினகரனில் வெளியிடுவதாக அறிவித்து அதற்கு நன்கு மார்க்கெட்டிங் செய்து பின் வெளியிட்டார்கள். அவர்களே எதிர்பார்க்காத அளவிற்கு பல லட்சம் பிரதிகள் அதிகமாக தினகரன் விற்பனையாகி நல்ல லாபம் பார்த்தது. பல இடங்களில் தினகரன் காலையில் வழக்கமான நேரத்தை விட வெகு சீக்கிரத்திலே தீர்ந்து விட்டது. அதன் பிறகு அவர்களுடைய நாளிதல்களான குங்குமம் வண்ணத்திரை போன்றவற்றில் அவ்வப்போது துணுக்குகள் மாதிரி வெளியிட்டு படம் வெளிவரும் முன்பே எந்திரனை வைத்து சம்பாதிக்க ஆரம்பித்து விட்டார்கள். பணம் போட்டவர்கள் செய்கிறார்கள்! இதில் தவறாக நினைக்க எதுவுமில்லை.

இன்னும் இதன் பிறகு பாடல்கள் வெளியீடு விழா, ரஜினி, ஷங்கர், ஐஸ் மற்றும் தொழில்நுட்ப கலைஞர்கள் பேட்டி என்று பல விஷயங்கள் இருக்கிறது. இதெல்லாம் படம் வெளிவரும் முன்பு இவர்கள் சம்பாதிக்கப்போவது. இந்தப்படத்தை வெளிநாட்டில் HBO துணையுடன் அதிகளவில் வெளியிடுவதாக செய்திகளில் வந்தது. சன் டிவி பல படங்களை வாங்கி வெளியிட்டு இருந்தாலும் அவர்களின் சன் பிக்சர்சுக்கு எந்திரன் படமே முதல் தயாரிப்பு.

சாதாரண படத்தின் விளம்பரங்களையே நிமிடத்திற்கு ஒருமுறை ஒளிபரப்பும் சன் டிவி எந்திரனுக்கு செய்யப்போவதை நினைத்தால் மயக்கம் வருகிறது. ரஜினி ரசிகர்களுக்கு வேண்டும் என்றால் எத்தனை முறை ஒளிபரப்பினாலும் சலிக்காமல் பார்க்க முடியும் இதுவே அனைத்து ரசிகர்களுக்கும் பொருந்துமா என்பது சந்தேகம்! அப்படி இருக்கும் போது பொதுமக்கள் ஏற்றுக்கொள்வார்கள் என்று கூற முடியாது. எனவே சன் டிவி இந்த விசயத்தில் கொஞ்சம் அடக்கி வாசிப்பது நலம் இல்லை என்றால் பொதுமக்களிடையே எரிச்சலையே இது வரவழைக்கும். படம் வெளியாகும் முதல் வாரம் இவர்கள் செய்வது கண்டிப்பாக ஓவர் டோஸாக இருக்கும். இது என்னுடைய தனிப்பட்ட கருத்து.

படத்தின் முக்கியத்துவம்

எந்திரன் யாருக்கு முக்கியமோ இல்லையோ ரஜினியை விட ஷங்கருக்கு அதிக முக்கியத்துவம் வாய்ந்த படம். காரணம் இந்தப்படம் பற்றி பல வருடங்களாக கூறிக்கொண்டு இருப்பவர். கமல் ஷாருக் என்று முயற்சித்து அவர்கள் ஒதுக்கியதால் தன் கதையை திறமையை நிரூபிக்க வேண்டிய கட்டாயத்தில் இருக்கிறார் அதுவும் குறிப்பாக ஷாருக்கிடம். ரஜினிக்கும் குசேலன் படம் தோல்வி அடைந்ததால் இதை வெற்றி பெற வைக்க வேண்டும் என்பதற்காக கடுமையாக உழைத்துக்கொண்டு இருக்கிறார். பாபா படம் தோல்வி அடைந்த போது நான் யானை அல்ல குதிரை, விழுந்தால் எழ நேரமெடுக்காது என்று கூறி அதை சந்திரமுகியில் நிரூபித்தவர். தனக்கு கிடைக்கும் தோல்விகளை என்றும் அலட்சியப்படுத்தாதவர் அனுபவங்களை பாடமாக எடுத்துக்கொண்டு தன்னை மீண்டும் நிரூபித்துக்காட்ட வேண்டும் என்பதில் முனைப்பாக இருப்பவர். எனவே இவர்களின் உணர்வுப்பூர்வமான பங்களிப்பு இந்தப்படத்தில் கண்டிப்பாக இருக்கும்.

அமரர் சுஜாதா

இந்தப்படம் துவங்கி கொஞ்ச நாட்களுக்கு பிறகு இந்தப்படத்தில் கதை வசனம் எழுதியவரும் ஷங்கர் தன் தந்தையை போல மதிப்பவருமான சுஜாதா அவர்கள் காலமாகி விட்டார். இது ஷங்கருக்கு பேரதிர்ச்சியை கொடுத்தது. ஒரு பேட்டியில் கூட “சுஜாதா அவர்கள் ஒருவர் செய்யும் வேலையை 200 பேர் செய்ய வேண்டியுள்ளது” என்று குறிப்பிட்டு இருந்தார். சுஜாதா தான் இறக்கும் முன்பே படத்தின் கதை வசனம் மற்றும் குறிப்புகளை எழுதி ஷங்கருக்கு தந்து விட்டார். இருந்தாலும் இவரின் இழப்பு ஷங்கருக்கு ஈடு செய்ய முடியாததே. சுஜாதா அவர்கள் தற்போது இருந்து இருந்தால் தற்போது எடுக்கப்பட்டுள்ள எந்திரனை விட சிறப்பாக ஷங்கரால் எடுத்து இருக்க முடியும் அந்த அளவிற்கு விஞ்ஞானத்தில் புகுந்து விளையாடுபவர். பல புதிய உத்திகளை தொழில்நுட்பங்களை எப்படி புகுத்தலாம் என்று கூறி இருப்பார். இந்தப்படத்தின் மூலக்கதையே சுஜாதா அவர்கள் கொடுத்தது தான். சுருக்கமாக கூறினால் எந்திரனின் இதயம் அமரர் சுஜாதா அவர்கள். படத்தின் துவக்கத்தில் சுஜாதா அவர்களுக்கு ஷங்கர் தகுந்த மரியாதை செய்வார் என்று எதிர்பார்க்கிறேன் அதற்கு சன் டிவி யின் அனுமதியும் முக்கியம்.

ஒலிச்சேர்ப்பாளர் ரசூல் பூக்குட்டி

ரசூல் பூக்குட்டி பேட்மேன் படத்தில் வரும் ஜாக் நிக்கல்சனை போல வில்லன் ரஜினியின் நடிப்பு பயங்கரமாக உள்ளதாக கூறி இருக்கிறார். வில்லன் ரஜினியை பற்றி யாருக்கும் சொல்ல வேண்டுமா என்ன! மூன்று முடிச்சில் கமல் ஆற்றுக்குள் விழுந்த பிறகு வசந்த கால நதிகளிலே பாடலைப்பாடி போவாரே அந்த காட்சி ஒன்றே போதும் வில்லன் நடிப்புக்கு. சிவாஜியில் கூட மொட்டை பாஸ் ஆன பிறகு சுமன் அலுவலகத்தில் வந்து அவரை நாற்காலியில் அமர வைத்து இருபுறமும் காலை வைத்து சிரித்து பேசும் காட்சி ஒன்றே போதும் இன்னும் ரஜினியிடம் இருக்கும் வில்லத்தனமான நடிப்புக்கு.

ரசூல் பூக்குட்டி இந்தப்படத்தில் இயற்கையான சத்தங்களையே பயன்படுத்தி இருக்கிறார், அதாவது ஸ்லம் டாக் மில்லியனர் படம் போல. இன்னும் கூற வேண்டும் என்றால் நடைமுறை வாழ்க்கையில் பொது இடங்களில் பேசும் போது உடன் என்னென்ன சத்தம் வருமோ அந்த சத்தங்களை மியுட் செய்யாமல் இரைச்சல் இல்லாமல் கொடுப்பது. நீங்கள் பெரும்பாலான படங்களில் கவனித்து இருக்கலாம் ரயில் நிலையத்தில் காதலன் காதலி பேசிக்கொண்டு இருப்பார்கள் ஆனால் பின்னணியில் எந்த சத்தமும் இருக்காது. இதில் இருக்கும் ஆனால் இரைச்சல் இல்லாமல், அந்த ஒரிஜினாலிட்டி கெடாமல். இந்த விசயத்திற்க்காகத்தான ரசூல் பூக்குட்டிக்கு ஆஸ்கார் விருது கிடைத்தது.

ஒளிப்பதிவாளர் ரத்னவேலு

இவர் பிரம்மாண்டமாக எடுக்கப்பட்ட ரயில் சண்டை காட்சிகள் பற்றி சிலாகித்து கூறினார். இந்தியப் படங்களிலேயே பிரம்மாண்டமாக எடுக்கப்பட்ட ரயில் சண்டை காட்சிகளாக இதில் வரும் சண்டை காட்சியை கூறலாம் என்று குறிப்பிட்டு இருக்கிறார். பல காட்சிகள் சிறப்பான ஒளித்தரத்துடன் எடுக்கப்பட்டுள்ளது மற்றும் இதற்கு பல ஹாலிவுட் தொழில்நுட்ப கலைஞர்கள் உதவி புரிந்துள்ளதையும் குறிப்பிட்டுள்ளார். இவர் கடைசியாக சொன்னது…. “நான் எதோ சொல்ல வேண்டும் என்பதற்காக கூறவில்லை தற்போது படத்தில் இருந்து ஒரே ஒரு டீசர் காட்சியை மட்டும் முன்னோட்டமாக (Trailer) வெளியிட்டால் எல்லோரும் மிரண்டு விடுவார்கள் அந்த அளவிற்கு உள்ளது” என்று.

இசையமைப்பாளர் A.R.ரகுமான்

ரகுமான் ஷங்கர் கூட்டணி பற்றி கூறத்தேவையில்லை, இவர்களது கூட்டணியில் அனைத்து படங்களின் பாடல்களும் சூப்பர் ஹிட். தனது கனவுப்படமான எந்திரனுக்கு ரகுமானை சும்மா விடுவாரா! நன்கு வேலை வாங்கி இருப்பார். ரகுமான் படம் சிறப்பாக வந்துள்ளதாக கூறியுள்ளார். பொதுவாக ஒரு படத்தில் பணியாற்றும் தொழில்நுட்ப கலைஞர்கள் படத்தை பற்றி உயர்வாகவே கூறுவார்கள். அது தான் நியாயம் கூட. எனவே படம் வெளிவந்த பிறகு தான் இவர்கள் கூறியது எந்த அளவு உண்மை என்று தெரிய வரும். எனவே இவர்கள் கூறுவதை வைத்து அதிக எதிர்பார்ப்பை ஏற்படுத்திக்கொள்ளாமல் இருப்பது ரசிகர்களுக்கு நல்லது.

ஷங்கர் Vs சன் டிவி

எந்திரன் படத்தின் பட்ஜெட் 150 கோடி என்று கூறப்பட்டாலும் சன் டிவி பெரும்பாலும் படத்தை இந்தியாவிலேயே தான் எடுக்க அனுமதித்து இருக்கிறது வெளிநாடு காட்சிகள் அதிகம் இல்லை. அதே போல ஷங்கர் வழக்கம் போல செலவு அதிகம் வைத்ததாகவும் கூறப்படுகிறது. எது உண்மை என்று தெரியவில்லை! சன் டிவி படத்தின் செய்திகளை எந்த ஊடகத்திற்கும் தரவில்லை படங்களை கூட இவர்கள் ஊடகங்களே வெளியிட்டன. இது ஷங்கருக்கு அதிருப்தியை தந்ததாகவும் அதனால் தான் கடுப்பில் ஷங்கர் தனது தளத்தில் படங்களை வெளியிட்டார் என்றும் கூறுகிறார்கள், இதனால் சன் டிவி கடுப்பாகி விட்டதாம். சன் டிவி எந்த செய்தியையும் மற்ற ஊடகங்களுக்கு தர மறுப்பதால் மற்றவர்கள் கடுப்பில் உள்ளதாகவும் கூறுகிறார்கள், மீறி வெளியிட்டால் சட்ட நடவடிக்கை எடுத்ததாகவும் கூறப்படுகிறது. ஷங்கர் சன் டிவியிடையே பனிப்போர் நிலவி வந்தாலும் படத்தின் ரஷ் பாத்து விட்டு சன் டிவி மகிழ்ச்சியாக உள்ளதாக தெரிகிறது.

வில்லன் டேனி டென்சொங்கப்பா (Danny Denzongpa)

ரஜினி படத்தில் யாருக்கு முக்கியத்துவம் இருக்கிறதோ இல்லையோ வில்லனுக்கு கண்டிப்பாக முக்கியத்துவம் இருக்கும். என்னுடைய விருப்ப நடிகரும் ரஜினியின் ஆஸ்தான வில்லனுமான அமரர் ரகுவரன் இல்லாதது எனக்கு பெரும் ஏமாற்றம். பாட்ஷாவில் எப்படி ரஜினி இடத்தை வேறு யாரும் நிரப்ப முடியாதோ அதே போல ரகுவரன் இடத்தையும் யாராலும் நிரப்ப முடியாது. ரஜினி படத்தில் எப்போதும் வில்லனுக்கு நடிக்க நன்கு வாய்ப்பு இருக்கும். சிறு எடுத்துக்காட்டு தளபதி அம்ரீஷ்பூரி, பாட்ஷா ரகுவரன், அண்ணாமலை ராதாரவி, படையப்பா ரம்யா கிருஷ்ணன், சிவாஜி சுமன் போன்றோர்.

வில்லனை ஹீரோவிற்கு நிகராக காட்டுவதன் மூலமே அந்தப்படத்திற்கு ஒரு கெத்து கொண்டு வர முடியும். வில்லனை சொத்தையாக காண்பித்தால் படமும் எடுபடாமல் போய் விடும். எனவே தான் ரஜினி தன் படத்தில் வில்லனுக்கு அதிக முக்கியத்துவம் கொடுக்கிறார். பலர் கொடுக்க மறுப்பதற்கு காரணம் நம்மை விட அவர் அதிகம் பெயர் வாங்கி விட்டால் என்ன செய்வது என்பது தான்.

டேனி ஹிந்தி திரையுலகில் மிகப்பெரிய நடிகர், ரொம்ப மூத்த நடிகர். அமிதாப் காலத்தில் மிகப்பிரபலமாக இருந்தவர், இவர் ஹிந்தியில் பிரபலப் படமான குர்பானியில் நடித்து இருக்கிறார் தற்போது நடிப்பதில்லை. எந்திரனில் யார் வரப்போகிறார்களோ என்று நினைத்து இருந்தேன் நல்ல வேளை எதோ மொக்கை வில்லனாக இல்லாமல் படத்தின் பட்ஜெட்டிற்கு தகுந்த மாதிரி ரிச்சான, சீனா பட வில்லன் மாதிரி நச்சுனு ஒருவரை போட்டு இருக்கிறார்கள். ஆளும் சும்மா கும்முன்னு பர்சனாலிட்டியாக இருக்கிறார். ரஜினிக்கு பயங்கரமாக குடைச்சல் குடுக்கணும் அப்போது தான் படம் பட்டாசாக இருக்கும்

இதில் இவரோட நம்ம ரோபோ வில்லன் ரஜினியும் சேர்ந்து ஹீரோ ரஜினியை பஜ்ஜி ஆக்க போகிறார்கள், தலைவர் என்ன செய்து இருக்கிறார் என்று பார்க்க ரொம்ப ஆவலாக உள்ளேன். ஹீரோ ரஜினியை விட வில்லன் ரஜினியை அதிகம் எதிர்பார்க்கிறேன். ரோபோ ரஜினி முதல் பாதியில் காமெடியாகவும் இரண்டாம் பாதியில் வில்லனாகவும் நடித்துள்ளதாக செய்திகளில் வந்தது.

ஷங்கர் படம் எப்போதும் வேகமான திரைக்கதை தான், படத்தின் ஆரம்பித்தில் இருந்து முடிவு வரை படம் பார்ப்பவர்களை பரபரப்புடன் வைத்து தொய்வில்லாமல் படத்தை கொண்டு செல்வதில் இவர் கிங். இதில் தான் நினைக்கும்படி காட்சி வர வேண்டும் என்பதற்காக ரஜினியை பல டேக்குகள் எடுக்க வைத்து கிறுகிறுக்க வைத்துக்கொண்டு இருக்கிறார். தனக்கு காட்சி திருப்தியாக வரும்வரை ரஜினியை விடுவதில்லை. ரஜினி ஒப்பனைக்காக மட்டும் பல மணி நேரம் எடுத்துக்கொண்டு இருக்கிறார் தனது முழு ஈடுபாட்டுடன். பேட்டியின் போது ஷங்கர் தன்னை எப்படி வேலை வாங்கினார் என்பதை ரஜினி குறிப்பிடுவார் என்று நினைக்கிறேன். உண்மையான ஈடுபாடும் வெற்றிக்கான முனைப்பும் இருந்தால் எந்தக்காரியமும் வெற்றி பெறும். அது இந்தப் படத்தில் ரஜினியிடமும் ஷங்கரிடமும் அதிகமாகவே உள்ளது. ஷங்கர் எந்திரனை பற்றி கூறிய போது “முதல் பாதி வேகம் என்றால் இரண்டாம் பாதி ரோலர் கோஸ்டர்” என்று

எதிர்பார்ப்புகளை அதிகம் வைத்துக்கொள்ளக்கூடாது என்று நினைத்தாலும் ஒரு ரசிகனாக ஏற்படும் ஆர்வத்தை தவிர்க்க முடியவில்லை. ஷங்கர் பாணியிலே கூற வேண்டும் என்றால் அறிவுக்கு தெரிவது மனதுக்கு புரிவதில்லை. எந்திரன் படம் பல சாதனைகள் படைக்க லட்சக்கணக்கான ரசிகர்களில் ஒருவனாக வாழ்த்துகிறேன். சீக்கிரம் படத்தை வெளியிடுங்கப்பா!

எந்திரன் பற்றி பதிவு எழுதுங்கள் என்று ரொம்ப நாட்களாக கேட்டுக்கொண்டு இருக்கும் என்னுடைய தளத்தை தொடர்ந்து படிக்கும் ரஜினி ரசிகர்களான அருண் மற்றும் சங்கர் ஆகியோருக்கும் ரஜினியை ரசிக்கும் அனைவருக்கும் இந்தபதிவு சமர்ப்பணம். பதிவு ரொம்பப் பெரிதாகி விட்டது போர் அடிக்காமல் எழுதி இருக்கிறேன் என்று நம்புகிறேன்.

கொசுறு

எத்தனை புகழ் வந்தாலும் எதையும் தன் தலையில் ஏற்றிக்கொள்ளாமல், எங்கு பேசினாலும் தன் நிலை மறக்காமல் பேச்சில் எப்போதும் தலைக்கனம் காட்டாமல் எப்போதும் தன்னடக்கமாக வெளிப்படையாக பேசும் எங்கள் சூப்பர் ஸ்டாரின் பேச்சுக்கு மற்றுமொரு சான்று இந்தக் காணொளி.

Related posts:

1. எந்திரன் ரஜினி ஒரு மைக்ரோ முன்னோட்டம் – 1

Tagged as: ரஜினி