இயக்குனர் விக்ரமன் பட “லாலா” இசை மற்றும் The Karate Kid

ரொம்ப நாகரீகமாக ஆபாசம் இல்லாமல் குடும்பத்துடன் பார்க்கக்கூடிய படங்கள் எடுப்பவர்கள் தற்போது மிகக்குறைவு. பலரது படங்களில் கவர்ச்சி நடிகையின் வேலையையும் சேர்த்து கதாநாயகிகளே பிடுங்கிக் கொண்டதால் கவர்ச்சி நடிகைகளுக்கு தற்போது வேலையில்லாமல் போய்விட்டது. இன்றும் ஒரு சில இயக்குனர்களே தங்களது படங்களில் வரம்பு மீறாமல் இருக்கிறார்கள். இதை கால மாற்றம் என்று கூறலாம். இனி வரும் காலங்களில் இது அதிகரிக்குமே தவிர கண்டிப்பாக குறையாது.

குடும்பப்பாங்கான படங்களை எடுப்பவர்கள் யார் என்று கேட்டால் கண்டிப்பாக அனைவருக்கும் யோசனை கூட செய்யாமல் நினைவிற்கு வருவது இயக்குனர் விக்ரமன் அவர்கள் தான். இவரது படங்களில் பெரும்பாலும் எல்லோரும் ரொம்ப நல்லவர்களாக இருப்பார்கள் படமும் எப்போதும் பாசிடிவாகவே இருக்கும். எனவே தான் அவருடைய பல படங்கள் பெரும் வெற்றியை பெற்றுள்ளன. இவரது படமான சூர்ய வம்சம் இவரது படங்களில் பெரும் வெற்றி பெற்ற படம் அதே போல் வானத்தைப்போல படமும்.

அவரது சமீபத்திய படங்களான ப்ரியமான தோழி மற்றும் சென்னைக்காதல் சரியாக போகவில்லை. ப்ரியமான தோழி ரொம்ப ஓவர்டோசாக போனதும் ஒரு காரணமாக இருக்கலாம். அநியாயத்திற்கு நல்லவர்களாக காட்டி இருந்ததால் மக்களுக்கு பிடிக்காமல் போய் விட்டது. நடைமுறையில் இது சாத்தியம் இல்லை என்று நினைத்ததால் படமும் ஓடவில்லை. சரி தனது பாணியை விட்டு வேறு முறையில் எடுக்கலாம் என்று பரத்தை வைத்து எடுத்த சென்னைக்காதலும் ஊத்திக்கொண்டது. இதனால் இதன் பிறகு படம் எடுக்காமல் தாமதித்து வருகிறார்.

என்னோட பிரச்சனை என்னவென்றால் இவரது படங்களில் அனைவரும் ரொம்ப நல்லவராக காட்டுவது ஒரு விதத்தில் சலிப்பை தந்தாலும் திரைக்கதை சரியாக இருந்தால் அது ஒரு பெரிய குறையாக தெரிவதில்லை. ஆனால் இவரது படங்களில் வரும் வழக்கமான இசை தான் தற்போது என்னால் தாங்க முடியவில்லை. தற்போது இவரது படங்களை போடும் போது படம் பார்க்க பிடித்தாலும் வழக்கமான இசையான லாலா லாலா மற்றும் டொட்டைங் டொட்டைங் இசை சகிக்க முடியாததாக இருக்கிறது.

இதைகேட்க பிடிக்காமலே அல்லது தாங்க முடியாமலே வேறு சேனலை திருப்பி விடுகிறேன். உண்மையாகவே ரொம்ப கொடுமையாக உள்ளது. இவரது உதவியாளர் எடுத்த படம் (நீ வருவாய் என) கூட இதைப்போலவே இசை உள்ளது (படமும் அதே போல தான்). இந்தப்படம் சமீபத்தில் டிவியில் பார்த்து இசையை கேட்டு நொந்து போய் வேறு சேனலுக்கு மாறி விட்டேன். இந்தப்படத்திற்கும் விக்ரமனின் ஆஸ்தான இசையமைப்பாளர் S.A.ராஜ்குமார் தான். விக்ரமன் படம் வெளிவந்த போது இந்த இசை பெரிய பாதிப்பை ஏற்படுத்தவில்லை என்றாலும் தொலைக்காட்சியில் தற்போது அடிக்கடி பார்க்கும் (கேட்கும்) போது செம கடுப்பை வரவழைக்கிறது.

இயக்குனர் விக்ரமன் அவர்கள் இனிமேலாவது இந்த (கொடுமையான) இசையை தவிர்த்து இயல்பான இசையை கொடுக்கும் படி ஒரு ரசிகனாக அவருக்கு வேண்டுகோள் வைக்கிறேன். அதே போல ப்ரியமான தோழி போல ஓவர்டோஸ் நல்லவராக காட்டாமல் கொஞ்சமாவது நம்பும்படி படம் எடுக்க வேண்டும் என்று அவரது சூர்ய வம்சம் படங்களை போல ரசிக்கும்படியான படங்களை தர வேண்டும் என்று வேண்டுகிறேன்.

The Karate Kid

ஹாலிவுட் நடிகர் Will Smith மகன் Jaden Smith நம்ம ஜாக்கி சான் கூட நடித்து உலகம் முழுவதும் சக்கை போடு போட்டுக்கொண்டு இருக்கிறது. சிங்கையில் இந்தப்படம் ஒரு திரைவளாகத்தில் ஒரு நாளைக்கு ஆறு காட்சிகள் ஓடிக்கொண்டு இருக்கிறது அதுவும் கூட்டமாக என்பது எனக்கு ஆச்சர்யம் அளிக்கும் விஷயம். நம்ம தமிழ் படங்களின் வசூலை விட இந்தப்படத்தின் வசூல் நம்ம ஊரில் தூள் கிளப்புதாம். தமிழ் பட தயாரிப்பாளர்களும் இயக்குனர்களும் நடிகர்களும் தலையை சொறிந்து கொண்டுள்ளதாக கேள்வி. ஏற்கனவே 2012 படமும் அவதார் படமும் சரவெடியாக ஓடி தமிழ் திரையுலகினரின் வயிற்றில் புளியை கரைத்தது நினைவிருக்கலாம்.

கதை என்னவென்றால் ஜேடன் ஸ்மித் தன்னுடைய அம்மாவின் வேலை மாறுதல் காரணமாக சீனாவிற்கு அம்மாவுடன் குடி வருகிறான். அங்கே அவனுக்கும் அங்குள்ள சிறுவர்களுக்கும் சண்டை ஏற்படுகிறது. இந்தப்பிரச்சனையை எப்படி ஜாக்கி சான் துணைகொண்டு சமாளிக்கிறான் என்பதே கதை. 1984 ஆண்டு ஒரு The Karate Kid படம் வந்தது அதனோட ரீமேக் இந்தப்படம் என்று கூறப்படுகிறது.

ஜேடன் ஸ்மித் சண்டை போடும் காட்சிகள் தவிர மற்ற இடங்களில் சிறப்பாக நடித்துள்ளான். சண்டைக் காட்சிகளில் சோபிக்க முடியாமல் போனதற்கு அவனை விட மற்ற சிறுவர்கள் சிறப்பாக சண்டை இட்டது ஒரு காரணமாக இருக்கலாம் அதுவும் குறிப்பாக ஜேடன் ஸ்மித்துடன் தகராறு செய்யும் சிறுவன், அவனது நடிப்பு ரொம்ப அருமை. மிகவும் முரட்டுத்தனமாக அதே சமயம் சிறப்பான நடிப்பை வெளிப்படுத்தி இருக்கிறான்.

ஜேடன் ஸ்மித் சண்டை காட்சிகளில் தான் எனக்கு திருப்தி தரவில்லையே தவிர மற்ற காட்சிகளில் அடி பின்னி பெடலெடுக்கிறான். அதுவும் ஜாக்கி சானுடன் அவன் செய்யும் சேட்டைகள் ரசிக்கும்படி உள்ளது. ஜாக்கியின் பயிற்சியை கிண்டலடிக்கும் போதும் அவருடைய பயிற்சியின் கடுமை தாங்காமல் விழிப்பதும் நல்ல நடிப்பு. ஜாக்கி சான் ஜேடன் ஸ்மித்தை ஒரு கராத்தே பள்ளியில் சேர்க்கப் போவார் அப்போது அங்குள்ள பயிற்சியாளரால் மிரட்டப்படும் போது ஜேடன் ஸ்மித் பயப்படாமல் இருக்க அவன் கையை ஜாக்கி சான் பிடிப்பார் அப்போது ஜேடன் ஸ்மித் பயத்தில் சிறிது நடுக்கம் காட்டுவது அருமை. இது நடிப்பா அல்லது சாதாரண நிகழ்வா என்பது எனக்கு இன்னும் சந்தேகம். இது நடிப்பு என்றால் அட்டகாசம்.

படத்தில் காட்டப்படும் சீனாவின் பல இடங்கள் அருமையாக உள்ளது, இயற்கை தாண்டவமாடுகிறது. பழமையான இடங்கள் பல காண்பிக்கப்படுகிறது. இதில் காண்பிக்கப்படும் கராத்தே பயிற்சி இடங்கள் ரொம்ப நன்றாக உள்ளது. இந்தப்படத்தின் சம்பவங்கள் பெய்ஜிங்கில் நடப்பதாக காட்டப்படுகிறது, ஆங்கிலம் பெரும்பாலனவர்களுக்கு இங்கே சுத்தமாக தெரியாது. என்னுடைய அடுத்த வேலையில் இங்கே செல்ல வேண்டியது இருக்கும் என்று கூறி இருக்கிறார்கள் எனக்கு படம் பார்த்த பிறகு வயிற்றுக்குள் நூடுல்ஸ் சுற்றுகிறது (நம்ம ஊருக்கு தான் புளி கரைக்கிறது)

ஜேடன் ஸ்மித் தோழியாக வரும் சிறுமி (பெண்!) நன்றாக நடித்துள்ளார் அவர்களுடனான நட்பு ரசிக்கும்படி உள்ளது. ஆனாலும் எனக்கு பிரச்சனை செய்யும் சிறுவனாக வருபவன் நடிப்பு ரொம்ப கவர்ந்தது. அந்த கோபத்தை எப்படி முகத்தில் பிரதிபலிக்கிறான்! அடேங்கப்பா!! அதே போல கடைசியில் தன் தவறை உணர்ந்து பெரிய மனிதனை போல நடந்து கொள்ளும் காட்சியில் அதுவரை அவன் மீது இருந்த வெறுப்பு வெயில் கண்ட பனியாக மறைந்து விடுகிறது.

இவர்களுக்கு தவறான குங்க்பூ கலையை கற்பிக்கும் பயிற்சியாளரின் முகத்திரையை கிழித்து தனது நேர்மையான பயிற்சியினால் நிரூபித்துக்காட்டும் காட்சியில் ஜாக்கி சான் நடிப்பில் மிளிர்கிறார். எந்தவித பந்தாவும் செய்யாமல் அடக்கமாக நடித்து இந்தப்படத்திற்க்கான உண்மையான கதையமைப்பை சிதைக்காமல் பேருதவி புரிந்து இருக்கிறார். மிகச்சாதாரணமாக வந்து போகிறார்…. எவ்வளவு பெரிய உலக சூப்பர் ஸ்டார்! இவ்வளவு அடக்கமாக நடிப்பது உண்மையிலே மிகவும் ஆச்சர்யம் அளிக்கிறது. நிறைகுடம் தளும்பாது என்பது இதுதானோ!

ஜேடன் ஸ்மித்திற்கு வயது 12 தான் ஆகிறதாம்.. என்னமா பேசுறான்! என்ன ஒரு அசத்தலான உடல்மொழி! சென்டிமென்ட்டான காட்சியில் கண்ணீர் விடும் காட்சியில் நிஜமாகவே அசத்தி இருக்கிறான். சண்டைக்காட்சியில் இவன் சின்னப்பையன் என்பதாலும் சீனா சிறுவர்கள் சிறு வயது முதலே சண்டைப் பயிற்சி பெறுபவர்கள் என்பதாலும் அவர்களுடன் ஒப்பிட்டு பார்க்க வேண்டிய அவசியமில்லை, அவனளவில் சண்டை காட்சியில் முயற்சி செய்துள்ளான்.

படம் கொஞ்சம் கூட சலிப்பில்லாமல் போகிறது. திரைக்கதை சிறப்பாக உள்ளது. அடுத்தது என்ன காட்சி என்று ஊகிக்க முடிகிறது என்றாலும் வரும் காட்சியை எதிர்பார்த்து நம்மை ஆர்வமாக வைத்து இருப்பது திரைக்கதையின் வெற்றியே! இந்தப்படத்திற்கு தயாரிப்பாளர்களில் ஜேடன் ஸ்மித்தின் தந்தையான வில் ஸ்மித் மற்றும் அவரது மனைவியும் அடங்குவர். குறைந்த முதலீடு அதிக லாபம்

இந்தப்படத்தோட தலைப்பை பார்த்தவுடன் ஒரு காமெடி SMS நினைவு வருகிறது. அழகிய தமிழ் மகன் என்று படம் பெயர் வைத்தார்கள் கடைசி வரை அது யார் என்றே காட்டவில்லை என்று நக்கலடித்து வந்து இருந்தது அது மாதிரி The Karate Kid என்று படம் பெயர் வைத்தார்கள் கடைசி வரை குங்க்பூ மட்டுமே பிரதானமாக இருந்தது

உண்மையில் இந்தப்படத்தைப் பற்றி சிறு அளவிலே எழுத நினைத்தேன், படத்தின் நல்ல காட்சிகளை விவரிக்க நினைத்து அது ஒரு விமர்சனம் அளவிற்கு வந்து விட்டது

சன் டிவி மார்க்கெட்டிங்ல ஜெகஜால கில்லாடிகன்னு எல்லோருக்கும் தெரியும். நித்தியானந்தர் விஷயம் பரபரப்பா இருந்த போது ரஞ்சிதா நடித்த ஜெய்ஹிந்த் படம் போட்டார்கள் தற்போது கால்பந்து போட்டிகள் பரபரப்பா இருக்கும் போது Goal என்ற ஆங்கிலப்படத்தை ஹாலிவுட் திரைப்பட வரிசையில் கடந்த வாரம் போட்டு இருந்தார்கள். படம் ரொம்ப நல்லா இருந்தது. நிஜபோட்டியை பார்ப்பது போல இருந்தது, போட்டியின் விறுவிறுப்பு காரணமாக நானே கைதட்டி விட்டேன் என்றால் பாருங்களேன்! (ஓவரா இருக்குனு சொல்லாதீங்க, நிஜமாத்தான்… நம்புங்கப்பா!).  இந்தப்படம் பார்க்காதவர்கள் திரும்ப ஒளிபரப்பும் போது (இவங்க தான் பந்து தேய்ந்து பிஞ்சு போகிற அளவிற்கு படத்தை திரும்ப திரும்ப போடுவாங்களே!) மறக்காம பாருங்க!

Related posts:

1. ராவணன் – சத்தியமாக திரைவிமர்சனம் அல்ல :-)

Tagged as: திரைவிமர்சனம், விமர்சனம்