சீரியல் பாடல்கள் வாழ்க! வாழ்க!!

சீரியலால் பலர் நொந்து நூடுல்ஸ் ஆகிக்கொண்டு இருக்கும் போது சீரியலே கதி என்று இல்லாமல் இருப்பவர்களும் சீரியலால் சந்தோசப்படுகிறார்கள் என்றால் நம்புவீர்களா! நம்பலைனா இனி நீங்க நம்பித்தான் ஆகணும்

சீரியல் பார்த்து நான் நொந்து போய் எழுதிய என்னுடைய சோகக்கதையை படித்து விட்டு அப்புறமா எதா இருந்தாலும் உங்க முடிவ சொல்லுங்க. இப்ப என்ன ஆச்சு புகழ ஆரம்பித்து விட்டாரே! என்று பார்க்கறீங்களா.. தொடர்ந்து படிங்க.

என்னோட நண்பர் லோகன் ஒருநாள் தொலைபேசியில் அழைத்து “கிரி நீங்க செட்டப் பாக்ஸ் வைத்து இருக்கீங்கல்ல அதுல இருந்து சீரியல் பாடல்களை எல்லாம் எனக்கு ரெகார்ட் செய்து கொடுங்க.. என் பையன் அந்த பாடல்களை கேட்டால் ஒழுங்கா சாப்பிடுகிறான்” என்று கூறினார். என்னடா இது! பசங்க சின்ன வயசுலையே கெட்டுப் போயிட்டாங்களா! என்று நினைத்தேன். என்னோட செட்டப் பாக்ஸ் மாற்றி விட்டதால் தற்போதுள்ள வசதியில் அதை செய்ய முடியாது என்று கூறி விட்டேன். அவரும் சரி நான் வேற யார் கிட்டயாவது கேட்டுக்கொள்கிறேன் என்று கூறி விட்டார். அதன் பிறகு நானும் மறந்து விட்டேன்.

சரி அதற்கு என்ன இப்ப என்கிறீர்களா! விசயமே அது தாங்க… இப்ப என்னோட பையன் இந்தப்பாடல்களை கேட்டால் குறும்பு செய்யாமல் சாப்பிடுகிறான்.. என்ன கொடுமை சார் இது! பாடல் கேட்டு அடம்பிடிப்பதில்லை என்றாலும் இந்தப்பாடல் ஓடும் போது அமைதியாக இருக்கிறான். ஆனால் என்னோட அக்கா வீட்டிற்கு பக்கத்துக்கு வீட்டில் ஒரு குழந்தை பாட்டு போட்டால் தான் சாப்பிடவே செய்கிறான் என்று என் மனைவி கூறியவுடன் பீதி ஆகி விட்டேன். ஆஹா! அடுத்த பலி நாமாக இருக்குமோ என்று பல்பு பிரகாசமாக எரிந்தது. ஏற்கனவே கிடைத்த அனுபவத்தால்! கற்பனை குதிரை பறக்க ஆரம்பித்து விட்டது.

என் மனைவியும் இணையத்தில் டைட்டில் பாடல் கிடைத்தால் தரவிறக்கம் செய்து கொடுங்கள் என்று கூறினார். சரி என்று நானும் கூகிளில் தேடினால் எல்லாம் சீரியல் ஆக வர பாடலே கிடைக்கவில்லை கடைசியில் ஒருவழியாக என்னைப்போன்றவர்களின் மனதறிந்து! ஒரு புண்ணியவான் அனைத்து சீரியல் பாடல்களையும் ஒரு வலைதளத்தில் வைத்து இருந்தார் YouTube உதவியுடன். ஒட்டுமொத்தமாக அனைத்தையும் தரவிறக்கம் செய்து விட்டேன்.

சரி சோதனை!! செய்து பார்ப்போம் என்று என்னோட லேப்டாப்பில் மதியம் இவன் சாப்பிடும் போது பாட்டை போட்டால்…. பையன் ஒரு பிரச்சனையும் செய்யாமல் சாப்பிட்டு விட்டான். ஆஹா! எப்படி எல்லாம் டெக்னிக்கலா ஹேண்டில் பண்ண வேண்டி இருக்கு! (வடிவேல் ஸ்டைல் ல் படிக்கவும்) என்று நினைத்துக்கொண்டேன். இந்தப்பிரச்சனை எங்களுக்கு மட்டுமில்லைங்க பலருக்கும் இருப்பதாக கேள்விப்பட்டேன்

இந்த சீரியல் பாடல்களில் இவனுக்கு கஸ்தூரி மற்றும் செல்லமே பாட்டுத்தான் ரொம்ப பிடிக்குது. செல்லமே பாட்டுல மத்தாப்பு மற்றும் வெடி வெடிப்பது காட்டப்படுவதால் பட்டா பட்டா என்று கூறி குஷி ஆகி விடுகிறான். கஸ் கஸ் ன்னு எதோ கூற எனக்கு ஒன்றும் புரியவில்லை. பின் அவனோட மொழி பெயர்ப்பாளரான என் மனைவி கஸ்தூரி சீரியல் பாட்டு போட சொல்றாங்க!! என்று கூறியவுடன் தான் இவன் கூறியதே புரிந்தது. கஸ்தூரி பாட்டை லேப்டாப்பில் போட்ட நேரம் பார்த்து டிவியிலும் அந்த சீரியல் விளம்பரம் வர திருதிருன்னு விழித்து விட்டு இவனுக்கு தலைகால் புரியல, தைய தக்கான்னு குதிக்க ஆரம்பித்து விட்டான் சீரியல் மேல கடுப்புகள் இருந்தாலும் இதைப்போல காணும் போது மனதிற்கு சந்தோசமாகவே உள்ளது.

அதனால் என் மகனை போன்ற பலரின் குழந்தைகளை மகிழ்விக்கும் சீரியல் பாடல்கள் வாழ்க! வாழ்க!!

உங்கள் வீட்டில் இதைப்போல பிரச்சனைகள் இருந்தால் பாடலை தரவிறக்கம் செய்ய இங்கே செல்லவும்

YouTube ல் இருந்து எப்படி பாடலை தரவிறக்கம் செய்வது என்பது பற்றி இந்தப்பதிவின் இறுதியில் விளக்கப்பட்டுள்ளது.

 

கொசுறு 1

சன் டிவி ல வருகிற ஹனிமூன் ஜோடி நிகழ்ச்சியை தொகுத்து வழங்கும் பிரசன்னா பந்தா செய்யாமல் நிகழ்ச்சியை வழங்குகிறார். நீண்ட நாட்களுக்கு பிறகு கடுப்பாகாமல் ஒரு நிகழ்ச்சியை முழுவதும் பார்த்தேன். ஆனால் இன்னும் கொஞ்சம் உற்சாகமாக வழங்க வேண்டியது அவருக்கு அவசியம். இல்லை என்றால் சுவாராசியம் குறைந்து விடும். இதுல உள்ள பிரச்சனை ரொம்ப பேசுனா அலப்பறை செய்வதை போல தெரிகிறது அமைதியாக நடத்தினாலும் சுவாராசியம் குறைவாக தெரிகிறது. இவை இரண்டும் இல்லாமல் நடுநிலையில் தொகுத்து வழங்குவது உண்மையிலேயே சவாலான விஷயம் தான். இதனாலே தற்போதெல்லாம் எந்த நிகழ்ச்சியையும் பார்ப்பதில்லை. நான் பார்க்கிற ஒரு தொலைகாட்சி K டிவி தான், அதுல தான் படமா போட்டு தள்ளுவாங்க பழைய மற்றும் 70, 80 ம் ஆண்டு படங்களை ரொம்ப விரும்பி பார்ப்பேன். இங்கே (சிங்கை) K டிவி தெரிவதில்லை என்பதால்.. மண்டை காய்ந்து போய் இருக்கிறேன்.

கொசுறு 2

விஜய் டிவி ல சூப்பர் சிங்கர் சீசன் 3 ஆரம்பித்துட்டாங்க! இனி நிகழ்ச்சியை போட்டு ஜவ்வ்வ்வவ்வ்வ்வு இழுப்பு இழுத்து முடிக்கிறதுக்குள்ள….. அடபோங்கப்பா!

 

ரீடரில் படித்துக்கொண்டு இருப்பவர்கள் என்னுடைய புதிய Feed முகவரியை அப்டேட் செய்துகொள்ளவும். புதிய முகவரி : http://feeds.feedburner.com/girirajnet

No related posts.

Tagged as: சீரியல்