ராவணன் மற்றும் சிங்கம் பாடல்கள் ஒரு பார்வை

ராவணன்

எந்திரனுக்கு பிறகு இந்திய அளவில் அதிகம் எதிர்பார்க்கப்படும் படம் என்றால் அது ராவணன் தான். நீண்ட காலமாக தயாரிப்பில் இருந்து ஒரு வழியாக ஜூன் மாதம் ஹிந்தி மற்றும் போனால் போகிறது என்று தமிழிலும் வருகிறது பல பிரச்சனைகளை தாண்டி ஒரு வழியா வருவதே ரொம்ப சந்தோசம். முதலில் ஒளிப்பதிவாளர் மணிகண்டனுடன் பிரச்சனை ஏற்பட்டது அதன் பிறகு அவரை மாற்றி விட்டு ஒளிப்பதிவாளர் சந்தோஷ்சிவனை நியமித்தார், இதனால் மணிகண்டன் எடுத்த காட்சிகளை நீக்கி விட்டு எடுக்கப்பட்ட காட்சிகள் அனைத்தையும் திரும்ப எடுத்தார். பிறகு கேரளா காடுகளில் படமெடுக்க அனுமதி கிடைப்பதில் பிரச்சனை, ஒரு வழியாக இவை அனைத்தும் சரியான பிறகு இந்த கடுப்புலையே என்னவோ மணிரத்னம் அவர்களுக்கு நெஞ்சு வலி வந்து விட்டது தற்போது அனைத்து பிரச்சனைகளும் முடிந்து பாடல்கள் வெளியாகி விட்டது.

ரகுமான் இந்தப்படத்திற்கு சிறப்பாக இசையமைத்து இருக்கிறார். பாடல்கள் வைரமுத்து எழுதி (கலக்கி) இருக்கிறார். நீண்ட நாட்களுக்கு பிறகு அழகான தமிழ் பாடல் வரிகளை கேட்க முடிகிறது (சில வரிகளை இசை ஆதிக்கம் செய்கிறது).

கெடாக்கறி

இந்தப்படத்தில் அதிகம் இசை சேனல்களில் கேட்கப்படும் பாடலாக இது இருக்கும். டிபிக்கல் ரகுமான் இசை. இந்தப்பாடல் திருமண விழாவில் பாடப்படுவதுபோல வரிகள் அமைந்துள்ளது. அலைபாயுதே படத்தில் வரும் யாரோ யாரோடி! பாடலை நினைவுபடுத்துகிறது (இசை அல்ல பாடலின் அமைப்பு). பாடல் இசையும் பாடலும் அதிரடியாக உள்ளது, முறுக்கேற்றும் பாடல். பாடலை பாடியவர்கள் Benny Dayal, Bhagyaraj, Rayhanah, Tanvi Shah.

காட்டுச்சிறுக்கி

ஷங்கர் மகாதேவன் மற்றும் அனுராதா ஸ்ரீராம் இந்தப்பாடலை பாடியிருக்கிறார்கள். இந்தப்பாடலும் பலரும் விரும்பி கேட்கும் பாடலாக இருக்கும். ஒருசிலருக்கு ஷங்கர் மகாதேவன் மற்றும் அனுராதா ஸ்ரீராம் குரல் பிடிக்கவில்லை, எனக்கு அப்படி ஒன்றும் தோன்றவில்லை. நன்றாகவே உள்ளது.

கள்வரே

இந்தப்படத்தின் மிக மெதுவான பாடல், ஸ்ரேயா கோஷல் இந்தப்பாடலை பாடியிருக்கிறார். அருமையான பாடகர், இவரது குரலில் பலப்பாடல்கள் சிறப்பாக வந்துள்ளன. இதிலும் சிறப்பாகவே செய்துள்ளார். ஆனால் என்னை அதிகம் கவரவில்லை (குரலை அல்ல பாடல் மற்றும் இசை). மெலோடி பாடல்களை அதிகம் விரும்புவர்களுக்கு பிடிக்கலாம். பாட்டை கேட்டால் தாலாட்டு பாட்டு போல அவ்வளவு மெதுவாக போகிறது.

கோடுபோட்டா

கெடாக்கறி போல இதுவும் வேகமான பாடல், Benny Dayal இந்தப்பாடலை பாடியிருக்கிறார். இதில் பாடல் வரிகள் பெரும்பாலும் இசையில் அமுங்கி விடுகிறது. சீரான வேகத்தில் செல்லும் பாடல் கடைசியில் ரொம்ப வேகமெடுக்கிறது. “நேற்றுவரைக்கும் உங்க சட்டம் இன்னைக்கு இருந்து எங்க சட்டம்” என்று போட்டிப்பாடலை போல உள்ளது.

உசுரே போகுது

இந்தப்படத்தின் மிக அருமையான மெலோடியான பாடல், அட்டகாசமாக உள்ளது. இதன் பின்னணியில் வரும் ட்ரம்ஸ் இசை இந்தப்பாடலுக்கு ஒரு கெத்தை கொடுக்கிறது. இந்தப்பாடலை பாடி இருக்கும் கார்த்திக் அசத்தி இருக்கிறார். இசைக்கேற்ற பொருத்தமான குரல். “உசுரே போகுது உசுரே போகுது உதட்டை நீ கொஞ்சம் சுழிக்கையிலே” என்று கார்த்திக் பாடும் போது இவரது குரலும் பின்னணி ட்ரம்ஸ் இசையும் வரிகளும் ஒன்றிணைந்து நம் உடலில் மின்சார அலைகளை ஏற்படுத்துகிறது, நம்ம உசுரு போய்டும் போல பாடலில் வைரமுத்து வரிகள் அருமை, எவ்வளோ நாள் ஆச்சு இதைப்போல வரிகளை கேட்டு. நிஜமாகவே பாடல் பட்டய கிளப்புகிறது.

வீரா வீரா

தீம் பாடலைப்போல உள்ளது. பாடலில் ஹிந்தி மொழி வரிகள் கூட வருகிறது. ஒருவேளை ஹிந்திப் பாடலை இங்கே பொருத்தமாக மாற்ற முடியவில்லையா! அல்லது ஹிந்தி பாடல் வரிகள் வரும் இடமாகவே உள்ளது . எனக்கு உண்மையில் ஹிந்தி நகி மாலும் தமிழில் இல்லாததால் நானே அது ஹிந்தி யாக இருக்கும் என்று முடிவு செய்து விட்டேன் பாடலைப்பாடியவர்கள் Vijay Prakash, Keerthi Sagathia

பாடல் எப்படி இருந்தாலும் அதை இன்னும் சிறப்பாக மணிரத்னம் எடுத்து இருப்பார் என்பதில் எந்த சந்தேகமுமில்லை. பாடல் நிச்சயமாய் எதிர்பார்ப்பை அதிகரிக்கவைத்து இருக்கிறது. முடிவாக ரகுமான் வைரமுத்து Rocks!

பாடல்களை தரவிறக்கம் செய்ய இங்கே செல்லவும்

சிங்கம்

சுறா தோல்வியடைந்ததால் சிங்கம் படத்தை சன் டிவி விரைவில் வெளியிட வேண்டிய கட்டாயத்திற்கு தள்ளப்பட்டு விட்டது. படத்தை ஹரி இயக்கி உள்ளார், DSP என்று செல்லமாக அழைக்கப்படும் தேவி ஸ்ரீ பிரசாத் இசையமைத்துள்ளார்.. மறுபடியும் ஹரி சூர்யா DSP ஆறு படத்திற்கு பிறகு இணைந்துள்ளார்கள். இது சூர்யாவிற்கு 25 வது படம்.

DSP மினிமம் கியாரண்டி இயக்குனர் மாதிரி மினிமம் கியாரண்டி இசையமைப்பாளர், எப்படியும் பாடலை ஹிட் செய்து விடுவார். இந்தப்படமும் விதிவிலக்கல்ல அனைத்து பாடல்களும் வழக்கமான அவரது ஸ்டைல் ல் உள்ளது. குறிப்பாக இளையதளபதி பாடலைப்போல உள்ளது (எடுத்துக்காட்டு வில்லு, இன்று வரை சலிக்காமல் கேட்கிறேன் படம் சங்கானாலும்). வழக்கமாக DSP பாடல்களில் ட்ரம்ஸ் அதிகம் இருக்கும், இதனால் வேகமான பாடலாக இருந்தாலும் ரொம்ப இரைச்சலாக இருக்காது. இதுவே இவரது பலம்.

ராவணன் படத்தில் பாடல் வரிகள் பெரும்பாலும் அழகு தமிழில் இருந்தால் இங்கு அதற்கு எதிர்மாறாக உள்ளது. ஒரு சில பாடல்கள் தமிழ் பாடலா! ஆங்கில பாடலா! என்று சந்தேகம் வரும் படி பாடல் வரிகள்.  இப்பெல்லாம் யாரு பாடலை கேட்கறாங்க இசை தான் அதிகம் ஆதிக்கம் செலுத்துகிறது. அதே போல வழக்கமான தெலுங்கு வாடை பாடல்களில்.

இதில் அனைத்து பாடல்களுமே கண்டிப்பாக ஹிட் ஆகும், சந்தேகமில்லை. அதனால் எனக்கு ரொம்ப பிடித்த இரு பாடலை மற்றும் கூறுகிறேன்.

நானே இந்திரன் நானே சந்திரன் இந்தப்பாடல் சரவெடியாக இருக்கும் துளிகூட சந்தேகமில்லை. சன் டிவி இதை ட்ரைலரில் போட்டு நொறுக்கப்போகிறார்கள். இந்தப்பாடலில் வரும் ட்ரம்ஸ் இசை நம்மை முறுக்கேற்றுகிறது.  துவக்கத்தில் மாணிக்க விநாயகமும் தொடர்ந்து Benny Dayal ம் தூள் கிளப்பி உள்ளார்கள். பலமுறை கேட்டு விட்டேன் இதன் ட்ரம்ஸ் இசைக்காகவும் பாடல் பாடும் ஸ்டைல்க்காகவும். பாட்டை நன்றாக காட்சிப்படுத்தி இருந்தால் இன்னும் மெருகேறும். டிபிக்கல் கதாநாயகன் அறிமுக பாடல்.

காதல் வந்தாலே இந்தப்பாடல் முதலில் கேட்டால் ஆப்ரிக்கா பாட்டை எங்காவது கேட்க ஆரம்பித்து விட்டோமா! என்று நமக்கு சந்தேகம் வந்து விடும் அந்த அளவிற்கு துவக்கம் உள்ளது. ட்ரம்ஸ் பீட் அதிகம் இருப்பதால் இந்தப்பாடல் எனக்கு அதிகம் பிடித்தது. உற்சாகமான பாடல். இன்னும் கொஞ்ச வருடம் சென்றால் DSP தமிழ் படங்களுக்கு ஆங்கில வரிகளை மட்டுமே பயன்படுத்துவார் போல இருக்கே!

ஆக மொத்தத்துல மெலடி ரசிகர்கள் கொஞ்சம் எட்டத்தான் நிற்க வேண்டும். அனைத்து பாடல்களும் வேகமான பாடல்கள் DSP பாடல்கள் உங்களுக்கு பிடிக்கும் என்றால் சிங்கம் பாடல்கள் பிடிக்கும் அவரது முந்தைய பாடல்கள் பிடிக்காது என்றால் இதுவும் பிடிக்காது.

படத்தின் பாடல்களும் பாடியவர்களும்

நானே இந்திரன் நானே சந்திரன் – மாணிக்க விநாயகம், Benny Dayal (பாடல் விவேகா)

காதல் வந்தாலே – Baba Segal, பிரியதர்ஷினி (பாடல் விவேகா)

என் இதயம் – சுசித்ரா, திப்பு (பாடல் நா முத்துகுமார்)

சிங்கம் சிங்கம் (தீம் பாடல்) – தேவி ஸ்ரீ பிரசாத் (பாடல் மேகா)

Stole My Heart – ஷான், மேகா (பாடல் விவேகா)

Stole My Heart (unplugged) – ஷான் (பாடல் ஹரி)

பாடல்களை தரவிறக்கம் செய்ய இங்கே செல்லவும்

கிரிக்கெட் கொசுறு

அமெரிக்காவுல மைக்கேல் ஜாக்சன் சொன்னாரு ஜப்பான்ல ஜாக்கிசான் சொன்னாருன்னு எல்லோரும் ஆளாளுக்கு ஒரு அணியை பற்றி பேசிட்டு இருந்த போது கடைசில நாங்க சிங்கம்ல! என்று சந்தடி கேப்ல, கிரிக்கெட்டை கண்டுபிடித்த இங்கிலாந்து முதல் முறையாக ஒரு உலகக்கோப்பையை ருசி பார்த்து இருக்கிறது. ஆஸ்திரேலியாவிற்கும் Twenty-20 க்கும் ராசியே இல்லை போல இருக்கு. அரையிறுதியில் பாகிஸ்தானை கடைசி இரண்டு ஓவர்களில் டோட்டல் டேமேஜ் செய்து பாகிஸ்தானியர்கள் அனைவருக்கும் இனிமா கொடுக்காமலே பேதி கிளப்பியவர்கள் இறுதி ஆட்டத்தில் சப்பையாக தோற்று விட்டார்கள். இந்தியாவும் பாகிஸ்தானும் எப்படி ரணகள பார்ட்டிகளோ அதே போல இங்கிலாந்தும் ஆஸ்திரேலியாவும். தற்போது இங்கிலாந்து ஆஸ்திரேலியாவை பொடிமாஸ் ஆக்கியதில் ஏக சந்தோசத்தில் இருப்பார்கள். ஒரு டெஸ்ட் தொடரில் ஆஸ்திரேலியாவை வெற்றி பெற்றதற்க்கே ஊரெல்லாம் ஊர்வலம் நடத்தினார்கள். தற்போது உலகக்கோப்பையே அதுவும் முதல் முறையாக பெற்று இருக்கிறார்கள்… சும்மா இருப்பார்களா!

No related posts.

Tagged as: பாடல் விமர்சனம்