ஒப்பனை இல்லாத “அங்காடித்தெரு” – திரைவிமர்சனம்

இயல்பான படங்களை கொடுக்கும் இயக்குனர்கள் வரிசையில் (வரிசை ரொம்ப சின்னது தான்) முக்கிய இடத்தை இயக்குனர் வசந்தபாலன் பிடித்து விட்டார் என்று சந்தேகத்திற்கு இடமின்றி கூறலாம். சென்னை சரவணா ஸ்டோர்ஸ் போன்ற கடைகளின் நிஜ முகங்களை நார் நாராக கிழித்து தொங்க விட்டு விட்டார்.

படத்தின் கதை சுருக்கமானது தான் குடும்ப சூழ்நிலை காரணமாக சென்னையில் ரங்கநாதன் தெருவில் உள்ள ஸ்டோர்ஸ்ல் வேலைக்கு சேரும் பலரது நிலையை எந்த ஒரு ஒளிவு மறைவும் இல்லாமல் அப்படியே காண்பித்துள்ளார்கள். கதை என்னவோ சுருக்கமானது தான் அதில் கூறப்பட்டுள்ள காட்டப்பட்டுள்ள செய்திகள் கல் நெஞ்சை தவிர மற்ற அனைவரையும் உலுக்கி விடும்.

வசந்தபாலன் ஏற்கனவே தனது வெயில் படம் மூலம் தன்னை நிரூபித்து இருந்தார், அவரது வெயில் படத்திற்கு நான் தீவிர ரசிகன். எந்த ஒரு அலங்கார பூச்சும் இல்லாமல் இருப்பதை அப்படியே காட்டி இருப்பார். அதன் காரணமாகவே எனக்கு இவரது அங்காடித்தெரு படத்தின் மீது அதிக எதிர்பார்ப்பு இருந்தது, இது பற்றி எதிர்பார்ப்பில் இருக்கும் படங்கள் வரிசையில் கூட குறிப்பிட்டு இருந்தேன். பொதுவாக அதிகம் எதிர்பார்க்கும் படங்கள் பெரும்பாலும் ஏமாற்றத்தையே தரும் அல்லது முழுதும் திருப்தி அளிக்காமல் இருக்கும். ஆனால் இந்தப்படம் 100% க்கு 150% திருப்தியை கொடுத்தது என்றால் மிகையில்லை. படம் பார்த்து முடித்த போது ம்ம்ம் வசந்த பாலன் போன்ற இயக்குனர்கள் இருக்கும் வரை தமிழ் சினிமாவை ஹீரோயிசம் மற்றும் எந்த குத்துபாட்டு மசாலா படங்களாலும் அழித்து விட முடியாது என்றே தோன்றியது.

எனக்கு இந்தப்படத்தில் மிகப்பெரிய ஆச்சர்யம் மற்றும் நம்ப முடியாத விஷயம் என்னவென்றால்.. சென்னை எவ்வளவு பெரிய நகரம்! அது எத்தனை கோடி மக்களை கொண்டது!! அப்படிப்பட்ட நகரில் மக்கள் கூடும் பொது இடங்களில் பல காட்சிகளை எடுத்து உள்ளார்கள். காட்சிகளை எடுப்பது பெரிய விஷயமில்லைங்க.. என்னால் நம்பவே முடியவில்லை ஒருவர் கூட கேமரா பார்க்கவில்லை, அப்படியே இருந்தாலும் இதற்காக தேடிக்கண்டு பிடித்தால் தான் உண்டு. எப்படி இதை சாதித்தார்கள் என்றே எனக்கு புரியவில்லை, நிஜமாவே அசத்தல் தான். இதில் நடித்த பலர் மக்களுக்கு அறிமுகம் இல்லாதவர்களாக இருந்தாலும் கூட இது பெரிய விஷயம் தான். ஒரு காட்சியில் கூட செயற்கைத் தனத்தை பார்க்கவே முடியாது, இதை உறுதியாக கூற முடியும். இது நடிப்பாகட்டும் படத்தில் வரும் இடங்களாகட்டும்.

இது வரை சரவணா ஸ்டோர்ஸ் போன்ற கடைகளுக்கு சென்றவர்கள் அங்கு வேலை செய்பவர்களை பார்ப்பதற்கும் இந்தப் படம் பார்த்த பிறகு அவர்களை பார்க்கும் பார்வைக்கும் நிறைய வித்யாசம் இருக்கும், குறைந்த பட்சம் கொஞ்ச நாட்களுக்காவது. அந்த அளவிற்கு அவர்களது வாழ்க்கையை!! படம் பிடித்துக்காட்டியுள்ளார்கள். எனக்கு இதைப்போன்ற கடைகளில் ரொம்ப அநியாயமாக நடந்து கொள்வார்கள் என்று தெரியும் மற்றும் செய்திகளிலும் சரவணா ஸ்டோர்ஸ் பற்றிய சர்ச்சைகள் வந்து அமுங்கி போனதும் தெரிந்தது தான். ஆனால் இதைக் காட்சியில் பார்த்த போது மிரண்டு போய் விட்டேன். இப்படிக்கூட நடக்குமா என்று! வசந்த பாலன் இதில் ஒரு சில காட்சிகளை நடப்பதில் பாதியைத் தான் காட்டியுள்ளேன் என்று கூறியுள்ளது வயிற்றை புரட்டி விட்டது.

இந்தப்படமே ஃப்ளாஷ் பேக்கில் நடப்பதாகத்தான் வருகிறது (வெயில் படம் போல) இந்தப்பட துவக்கத்தில் ஒரு ரணகளமான விபத்து நடப்பதை காட்டி இருப்பார்கள்.. நிஜமாகவே ஒரு விபத்தை நேரில் பார்த்தது போல இருந்தது. மிகைப்படுத்தி கூறவில்லை நீங்கள் படம் பார்க்கும் போது நிச்சயம் உணர்வீர்கள். அதற்கு கொடுக்கப்பட்ட பின்னணி இசையும் இரு வாகனங்கள் மோதும் வேகமும் என்னால் இன்னும் மறக்க முடியவில்லை, தத்ரூபமாக எடுக்கப்பட்டுள்ளது. இதில் நடித்த முகம் தெரியாத சண்டை நடிகர்களுக்கு தான் அத்தனை பெருமையும் போய்ச்சேரும் உடன் காட்சிப்படுத்திய ஒளிப்பதிவாளருக்கும்.

இதில் முக்கிய கதாப்பாத்திரங்களான மகேஷ், அஞ்சலி, பாண்டி (கனாக்காணும் காலங்கள் விஜய் டிவி), A.வெங்கடேஷ் மற்றும் பழ கருப்பையா அனைவருமே நடிப்பில் அசத்தி இருக்கிறார்கள். குறிப்பாக அஞ்சலியும் கடையின் மூன்றாவது தள சூப்பர்வைசராக வரும் A.வெங்கடேஷும் நடிப்பில் மிரட்டி இருக்கிறார்கள். மகேஷ்க்கு இது முதல் படமாம் நம்ப முடியவில்லை. பாவமாக நடித்து இருக்கும் காட்சியானாலும் சரி கோபமாக நடித்து இருக்கும் காட்சியானாலும் சரி சிறப்பாக செய்து இருக்கிறார் குறிப்பாக கடைசியில் அதிகம் மதிப்பெண் பெறுகிறார்.

பாண்டி வழக்கமான நகைச்சுவையுடன் படத்தை இறுக்கத்தில் இருந்து கொஞ்சம் தளர்த்துகிறார். ஒரு சில காட்சிகளில் கொஞ்சம் ஓவர் நடிப்போ (இந்தப்படத்திற்கு) என்று எண்ணத்தோன்றியது, மற்றபடி தனக்கு கிடைத்த வாய்ப்பை சிறப்பாக பயன்படுத்தி இருக்கிறார். குறிப்பாக சினேகா அவர்கள் கடைக்கு ஷூட்டிங்கிற்காக வர அதை மற்றவர்களிடம் கூறி அலப்பறை செய்வது எனக்கு குசேலன் படத்தில் வடிவேல் ரஜினியை பார்த்து விட்டு செய்யும் காட்சி நினைவிற்கு வந்தது, சிறப்பாக நடித்து இருந்தார். இது தவிர சில மனதை தொடும் காட்சிகளிலும் தன் பங்கை சிறப்பாகவே வெளிப்படுத்தி இருக்கிறார்.

அஞ்சலி காட்சிக்கு காட்சி மிரட்டல் நடிப்பில் அசத்துகிறார், எந்தக் காட்சியையும் குறிப்பிட்டு கூற முடியவில்லை அனைத்துமே சிறப்பு தான். ஒரு துடிப்பான ஏழ்மைக் குடும்பப் பெண்ணின் மன நிலையை முக பாவனையை அப்படியே பிரதிபலித்துள்ளார். இவரை பாராட்டுவதா அல்லது அவரை அப்படி நடிக்க வைத்த வசந்தபாலனை பாராட்டுவதா என்று தெரியவில்லை. பல இடங்களில் நம்மை கண்கலங்கவும் வைத்து விடுகிறார்.

அடுத்த டெர்ரர் நடிப்பு A.வெங்கடேஷ் தான், ஒட்டு மொத்த பார்வையாளர்களின் ஏகோபித்த வெறுப்பை சம்பாதித்து தன் நடிப்பிற்கு பெருமை தேடிக்கொண்டார். இவரை வெளியே யாராவது பார்த்தால் கூட அடித்து விடுவார்கள் போல.. அந்த அளவிற்கு ரணகளமாக நடித்துள்ளார். அங்கு வேலை செய்யும் அனைவருக்கும் சிம்ம சொப்பனம் என்றால் அது இவர் தான். இவர் பார்வையில் இருந்து எவரும் தப்ப முடியாது..மாட்டினால் தர்ம அடி தான். பெண்களாக இருந்தால் விசாரிக்கும் முறை!!! வேறு. பலரின் வயித்தெரிச்சலை கொட்டி இருப்பார் கண்டிப்பாக மக்கள் எவ்வளவுக்கெவ்வளவு அவரை திட்டுகிறார்களோ அந்த அளவிற்கு நடிப்பில் வெற்றி பெற்று இருக்கிறார் என்றே அர்த்தம்.

பட துவக்கத்தில் அங்கு பணிபுரிபவர்கள் சாப்பிட்டிற்கு அடித்து கொள்வதைப்போல காட்டி இருப்பார்கள், ஆனால் ஒரு கட்டத்திற்கு பிறகு அது போல இல்லாமல் அமைதியான முறையில் இருக்கும். இது முதலில் அவர்கள் கஷ்டப்படுவதை காண்பிக்க வேண்டும் என்பதற்காக எடுக்கப்பட்டு இருக்கும் ஆனால் அதன் பிறகு ஏனோ அதன் தொடர்ச்சியாக இல்லாமல் இருந்தது இதற்காக கொஞ்சம் திணிக்கப்பட்டது போலவே இருந்தது என்ற எண்ணம் வந்ததை தவிர்க்க முடியவில்லை. வசந்தபாலன் தான் காட்டி இருப்பது பாதி தான் என்று கூறி இருந்தார் ஆனால் நான் கூறுவது ஒரு பகுதி ஒரு மாதிரியாகவும் மறு பகுதி வேறு மாதிரியாகவும் இருப்பது ஒட்டவில்லை. அதே போல படத்தின் முடிவு வழக்கமான முடிவாக இல்லாமல் இருந்தாலும் வேறு மாதிரி இருந்து இருக்கலாமோ! என்று தோன்றியது. இவை மட்டுமே எனக்கு படத்தில் குறைகளாக தென்பட்டது.

படத்தில் இவர்கள் கதை மட்டுமல்லாது ரங்கநாதன் தெருவில் உள்ள பலரின் கதையையும் உறுத்தாமல் காட்சி அமைப்பை மீறாமல் எடுத்துள்ளார்கள். எனக்கு படம் பார்த்த பிறகு வந்த ஒரு சந்தேகம்.. நிஜமாலுமே சரவணா ஸ்டோர்ஸ் போன்ற கடைகளில் வேலை செய்பவர்களின் பெற்றோர்கள் இந்தப்படத்தை பார்த்தால் அவர்கள் மன நிலை எப்படி இருக்கும், இந்தப்படத்தை இதைப்போல கடைகளில் வேலை செய்பவர்கள் பார்க்கும் போது அவர்கள் மன நிலை எப்படி இருக்கும் என்பது தான். வசந்தபாலன் ஒருவராவது நம் கஷ்டத்தை உலகறிய வைத்தாரே! என்று நினைத்து இருப்பார்களோ! பலர் படத்தின் காட்சியமைப்பை தங்களுடன் ஒப்பிட்டு பார்த்து கண்ணீர் விட்டு இருப்பார்கள் என்பது உறுதி.

உண்மையில் இந்தப்படத்தை இந்தக்கடைகளில் சம்பந்தப்பட்டவர்களை தவிர வேறு யாரும் சரியாக விமர்சிக்க முடியாது. காரணம் அவர்களுக்கு மட்டுமே என்ன நடக்கிறது என்று தெரியும்! மற்றவர்கள் (என்னையும் சேர்த்து) எல்லாம் ஒரு ஊகத்திலும், பார்வையாளராகவும், ஒரு சில சம்பவங்களை வைத்துமே எழுதுவார்கள். இதில் கூட குறைவாக இருக்கலாம் ஆனால் இதைப்போல நடக்கிறது என்பது உண்மை தான் யாராலும் மறுக்க முடியாது. வசந்த பாலன் இதற்காக ஹோம் வொர்க் செய்ததாக கேள்விப்பட்டேன். வசந்தபாலன் சார்! உங்களை எத்தனை பாராட்டினாலும் போதாது.. உங்களை அந்த கடைகளில் வேலை செய்பவர்கள் பலர் கண்ணீர் விட்டு பாராட்டி இருப்பார்கள், மானசீகமாக நன்றி தெரிவித்து இருப்பார்கள். இதுவே நீங்கள் பெற்ற பெரிய விருது. இதை விடவா உங்களுக்கு ஒரு பெரிய விருது கிடைத்து விடப்போகிறது!

இந்தப்படம் எடுக்கப்பட்டு ஒருவருடமாகியும் வெளியிடாமல் வைத்து இருந்து தற்போது தான் வெளியிட்டு இருக்கிறார்கள், இவர்களது அடுத்த தயாரிப்பான நந்தலாவும் என் எதிர்பார்ப்பில் உள்ளது. இவ்வளவு அருமையான படத்தை ஏன் இவ்வளவு தாமதமாக வெளியிட்டார்கள் என்று எனக்கு புரியவில்லை. ஆனால் ஐங்கரன் நிறுவனம் இந்தப்படத்தை தயாரித்தமைக்காக கண்டிப்பாக பெருமைப்பட்டுக்கொள்ளலாம். லேட் ஆக வந்தாலும் லேட்டஸ்டாக வந்து அனைவரையும் உலுக்கி விட்டது.

இந்தப்படத்தை அனைவரும் பார்க்கும்படி பரிந்துரைக்கிறேன். திருட்டு DVD தவிர்த்து திரையரங்கில் சென்று பாருங்கள் (வெளிநாடுகளில் மற்ற மாநிலங்களில் திரையரங்கில் பார்க்க வாய்ப்பில்லாதவர்கள் தவிர), இதைப்போல படங்களை நாம் ஊக்குவிக்காவிட்டால் தமிழில் நல்ல படம் வருவதில்லை என்ற குற்றச்சாட்டை வைக்க நமக்கெல்லாம் எந்த தகுதியும் கிடையாது. பலரது குற்றச்சாட்டே… வருவது எல்லாம் குப்பை படம் என்று! எப்படி வராமல் இருக்கும் இதைப்போல படங்களை திரையரங்கில் சென்று பார்த்து ஊக்குவிக்காவிட்டால். வாய்ச்சொல் வீரனாக இல்லாமல் கொஞ்சம் நீங்கள் நினைப்பது நடப்பதற்கும் துணை புரியுங்கள்.

Starring Mahesh, Anjali, Pandi, A. Venkatesh, Pazha Karuppaiah, Sneha (Cameo)

Music by Vijay Antony, G. V. Prakash Kumar

Directed by Vasanthabalan

Written by Vasanthabalan

Cinematography Richard Maria Nathan

Editing by A. Sreekar Prasad

Studio Ayngaran International

Distributed by Ayngaran International

Produced by K. Karunamoorthy C. Arunpandiyan

Release date(s) 26 March 2010

Subscribe to கிரி Blog by Email

Subscribe to கிரி Blog by Google Reader

No related posts.

Tagged as: திரைவிமர்சனம்