சிங்கப்பூரை அலற வைத்த "Formula 1"

நாட்டோட நிலப்பரப்புல சுள்ளானா இருந்தாலும் எதை வேணா எங்க நாட்டுல சும்மா கில்லி மாதிரி சாதித்து காட்டுவோம், எங்களால நடத்த முடியாத நிகழ்ச்சி எதுவுமில்லை என்று தற்போது இரண்டாவது முறையாக அசத்தலாக Fourmula 1 கார் பந்தயத்தை வெற்றிகரமாக நடத்தி முடித்துள்ளது சிங்கப்பூர் அரசு.

சிங்கப்பூர் மிகவும் குட்டி நாடு சுருக்கமா சொல்லப்போனா நம்ம சென்னையை விட ரொம்ப குட்டி, மொத்தமே கிட்டத்தட்ட 200 கிலோமீட்டர் சுற்றளவு தான். ஆனால் அவர்கள் இந்த சிறிய இடத்தில் கொடுக்கும் வசதி பெரிய நாடுகளையே வாயை பிளக்க வைக்கும்..

எப்படியா! இந்த மாதிரி குட்டி இடத்தை வைத்துக்கொண்டு இப்படி அசத்தலான வசதி தாராங்க என்று மண்டை காயாதவங்களே இருக்க மாட்டாங்க...குறிப்பாக சாலை எல்லாம் நன்கு அகலமாக திட்டமிடப்பட்டு நெரிசல் ஏற்படாதவாறு அமைக்கப்பட்டு இருக்கும்.

இவர்கள் முதலில் Formula 1 நடத்தப்போவதாக அறிவித்தவுடன் இங்கே எப்படி நடத்துவார்கள் என்று குழம்பியபோது கார்பந்தயம் என்றால் இதற்கு என்று உள்ள தனி இடத்தில் தான் நடத்த வேண்டுமா! அந்த அளவிற்கு ஈடு கொடுக்கும் சாலையை நகரத்தில் நாங்களே தருகிறோம் என்று உலகிலேயே முதல் முறையாக நகரத்தின் உள்ளே அதுவும் இரவில் நடத்தி காட்டி சாதனை புரிந்தது, தற்போது இரண்டாவது முறையாக.

Formula 1 அப்படின்னா... ஒரு குட்டி விளக்கம்

Formula 1 என்பது பிரபலமான உலக கார் பந்தயம், உலகிலேயே அதிக பில்லியன்கள் புழங்கும் ஒரு விளையாட்டு. ஃபுட்பால், கிரிக்கெட் போன்ற விளையாட்டுக்கு எப்படி வெறித்தனமான ரசிகர்கள் இருக்கிறார்களோ அதே போல இதற்கும் சற்றும் குறையாமல் இருக்கிறார்கள். இதில் கலந்து கொள்வது என்பது மிகவும் சிரமமான விஷயம் அதே போல இதில் ஓட்ட வாய்ப்பு கிடைப்பது அவ்வளவு சுலபமான காரியம் அல்ல.

குத்துச்சண்டைக்கு சூப்பர் ஸ்டார் முகமது அலி, கிரிக்கெட்டிற்கு சூப்பர் ஸ்டார் பிராட்மேன், ஃபுட்பாலுக்கு சூப்பர் ஸ்டார் மரடோனா, இசை உலகின் சூப்பர் ஸ்டார் மைக்கேல் ஜாக்சன் என்றால் F1 கார்பந்தயத்தின் சூப்பர் ஸ்டார் மைக்கேல் ஷுமேக்கர் (michael schumacher). இவர் அடையாத வெற்றிகளே இல்லை, தற்போது இவர் ஓய்வு பெற்று விட்டார், இவரது இடத்தை அடைய பலர் கடுமையாக முயற்சிக்கிறார்கள் ஆனால் இவரை போல அந்த இடத்தை தொடர்ந்து தக்க வைப்பது என்பது அவ்வளவு எளிதான காரியமாக இல்லை.

பயிற்சி ஆட்டம் கடந்த சனிக்கிழமை (26-09-09) நடந்தது, நிஜ போட்டி ஞாயிற்று கிழமை நடந்தது, இதில் மெக்ளேரன் மெர்சிடிஸ் அணியை சேர்ந்த லூயிஸ் ஹாமில்ட்டன் (24) வென்றார். இவர் இங்கிலாந்து நாட்டை சேர்ந்தவர்.

இவரே பெற்றி பெறுவார் என்று அனைவராலும் எதிர்பார்க்கப்பட்டது, பயிற்சி ஆட்டத்திலும் இவரே முதலாவதாக வந்து இருந்தார். அதே போல அனைவரின் எதிர்பார்ப்பையும் பொய்யாக்காமல் ஆட்டத்தின் முதலில் இருந்து கடைசி வரை மின்னலாக பாய்ந்து வந்து முதலிடத்தை பிடித்தார்.

இரண்டாவது இடத்தை டொயோட்டோவை சார்ந்த டிமோ குளோக் என்பவரும், கடந்த ஆண்டு போட்டியில் சர்ச்சையில் சிக்கிய ரெனோல்ட் அணியை சார்ந்த பெர்னாண்டோ அலான்சோ மூன்றாவது இடத்தையும பெற்றனர்.

சில சுவாராசிய தகவல்கள்

நம்ம விஜய் மல்லையா அவரது அணிக்காக வந்து இருந்தார்..வழக்கபோல ஃபிகர்களோட நின்று குஜாலாக ஒரு போஸ் கொடுத்தார் ;-)

பந்தயத்தில் கார் சராசரியாக 350 கிலோ மீட்டர் வேகத்தில் செல்லும், உதாரணத்திற்கு சென்னையில் இருந்து ஈரோட்டிற்கு 1 மணி 10 நிமிடத்தில் வந்து விடலாம்.

பந்தயத்தின் போது வரும் விர்ர்ர்ர்ரும் விர்ர்ர்ர்ரும் சத்தம் கேட்டு காது (கார் டயர் அல்ல) பஞ்சர் ஆக அதிக வாய்ப்பு, அதனால் காதுக்கு பாதுகாப்போடு போவது நல்லது :-)

எங்கள் அலுவலகத்தில் மின்னஞ்சல் வந்தது (போட்டி நடக்கும் இடம் அருகில் எங்கள் அலுவலக கிளை ஒன்று உள்ளது, எங்கள் அலுவலக கிளை வேறு பக்கம்.. வடை போச்சே!) அதாவது அலுவல் வேலையாக வந்தால் காதுக்கு பாதுகாப்போடு வந்துக்குங்க என்று எச்சரித்து இல்லைனா வரவேற்பறையில் கேட்டு காது பாதுகாப்பு சாதனம் வாங்கிக்குங்க என்று!

நகரத்தின் உள்ளே நடந்ததால் அருகில் உள்ள அலுவலகங்கள் வீடுகள் மற்றும் உயரமான இடத்தில் உள்ளவர்கள் ஓ சியில் பார்த்துக்கொண்டு இருந்தார்கள், அதுக்காக பாலத்தின் மீது சாலையின் அருகில் நின்று பார்க்கலாம் என்று நினைத்துக்காதீங்க.. டின்னு கட்டிருவானுக :-)

நான் என்ன பண்ணுனேன்னு கேட்கறீங்களா! ஹி ஹி வழக்கம் போல தொலைக்காட்சி நேரலை தான்.

டிக்கெட் விலையை கேட்டதும் பேன்ட்டை உருவிட்டு தான் விடுவானுக போல இருக்குன்னு மனதை தேத்திக்கிட்டு விட்டுட்டேன், குறைந்த விலையிலும் கிடைக்கும் ஆனா அதுக்கு அடிதடியாக இருக்கும் ரொம்ப முன்னாடியே முன்பதிவு செய்யவேண்டும்.

உண்மையில் சொல்லப்போனால் போன வருடம் போட்டி நடந்த போது எனக்கு அதிக ஆர்வம் இல்லை, இந்த வருடம் இது பற்றி தெரிந்து கொள்ள வேண்டும் என்ற ஆர்வம் அதிகம் ஆகி விட்டது அல்லது சிங்கப்பூர் அரசாங்கம் அவர்கள் செய்த விளம்பரம் மற்றும் முன் ஏற்பாட்டின் மூலம் ஆர்வத்தை உருவாக்கி விட்டது.

Formula 1 கார் பந்தயம் உலகிலேயே முதன் முதலாக இரவில் நடப்பது சிங்கப்பூர் ல் தான், ஒளி விளக்கால் போட்டி பாதையை பகலாக்கி விட்டார்கள். நகரத்தின் உள்ளே நடந்து இருந்தாலும் மாற்று ஏற்பாடுகளை பக்காவாக செய்து இருந்தார்கள், அது பற்றிய அறிவிப்பை போட்டி நடக்கும் நாளுக்கு ரொம்ப நாள் முன்பு இருந்தே செய்து கொண்டு இருந்தார்கள். சரியான திட்டம்= சிங்கப்பூர்

பிரபல வீரர்களுடன் குறிப்பாக ஹாமில்ட்டனுடன் போட்டோ எடுக்க அடிதடியே நடந்தது, விட்டால் அவர்களை பிய்த்து எடுத்து விடுவார்கள் போல.. குறிப்பாக பெண்கள்..ம்ம்ம்..கொடுத்த வச்சவங்க

பந்தயத்தை பார்க்க பல நாடுகளில் இருந்தும் ரசிகர்கள் வந்ததால் அனைத்து ஹோட்டல்களும் நிரம்பி வழிந்தது. எவ்வளோ பணம் கொடுத்தாலும் அந்த பகுதியில் ஹோட்டலில் இடம் கிடைக்காது என்கிற அளவிற்கு வந்து குவிந்து விட்டார்கள்.

பொருளாதார மந்தம் காரணமாக இந்த ஆண்டு போட்டிக்கு ஆதரவு குறைவாக இருக்கும் என்று எதிர்பார்த்தார்கள் ஆனால் ஏமாற்றாமல் பலர் வந்து இருந்தார்கள்.

பயிற்சி ஆட்டம் முடிந்த பிறகு போட்டியில் வெற்றி பெற்ற ஹாமில்ட்டன் சாலை சரியாக இல்லை குதிக்கிறது என்று கூறி டென்ஷன் செய்து விட்டார், போட்டியில் நல்ல வேளை வெற்றி பெற்று விட்டார் இல்லைனா சாலை சரி இல்லாததால் தான் தோல்வி அடைந்து விட்டேன் என்று கூறி இருப்பாரோ! உஷாராகத்தான் இருக்காங்கையா! ;-)

போட்டியின் போது கார் தாறுமாறான வேகத்தில் செல்வதால் காரின் உள்ளே கடும் வெப்பம் உருவாகும் அதிகபட்சமாக 60 டிகிரி செல்சியஸ் வரை, எனவே அதற்கான பாதுகாப்பு ஏற்பாடோடு இருப்பார்கள், அதுவும் சிங்கப்பூர் ஓரளவு வெப்பமான நாடு தான். எனவே வெப்பம் சற்று கூடுதலாகவே இங்கு இருந்து இருக்கும்.

தலை பாதுகாப்பு கவசம் கவனம் எடுத்து இதற்கு தயாரிக்கப்படுகிறது, காரணம் 350 கிலோ மீட்டர் வேகத்தில் செல்வதால் தலையை பின்னோக்கி அதிக அழுத்தத்தில் தள்ளும் எனவே அதை தாங்கக்கூடிய அளவில் தலைக்கவசம் இருக்க வேண்டும்.

சாதாரண கவசத்துடன் சென்றால் முகம் எல்லாம் பிஞ்சுட்டு போய்டும், நம்ம தமிழ் படத்தில் பார்த்து இருப்பீர்களே ஹீரோ அடிக்கும் போது முகத்தின் சதை அலைபாயும் காற்றில்!! :-) அது மாதிரி

F1 கார் பந்தயம் என்பது தனி நபர் விளையாட்டு அல்ல இது ஒரு குழு விளையாட்டு. ஓட்டுனர் மட்டுமே திறமையானவராக இருந்தால் பத்தாது அந்த காரை பராமரிக்கும் நபர்களும் முக்கியம், குறிப்பாக பந்தயத்தின் போது டயர் மாற்றம் நடக்கும் போது.

F1 கார் பந்தயம் 61 சுற்றுகள் (lap) நடக்கும், கார் தாறுமாறான வேகத்தில் செல்வதால் டயர் சீக்கிரம் தேய்ந்து விடும் அல்லது பாதிப்படைந்து விடும் எனவே இடையில் பெட்ரோல் போடவும் டயர் மாற்றவும் வருவார்கள், ஓட்டுனர் குழுவை சேர்ந்தவர்கள் மின்னல் வேகத்தில் அனைத்தையும் செய்வார்கள்.

ஒவ்வொரு பாகத்தையும் மாற்ற தனித்தனி நபர்கள் இருப்பார்கள், டயர் மாற்ற பெட்ரோல் போட (பெட்ரோல் வழக்கம் போல இல்லாமல் வேகமாக செல்லும்) என, அதிரடியாக அனைத்தும் நடக்கும். சராசரியாக குறைந்த பட்சம் 6 நொடியில் இருந்து அதிகபட்சமாக 10 நொடிக்குள் அனைத்தையும் மாற்றி விடுவார்கள்.

ஒரு ஓட்டுனர் பெட்ரோல் பைப்பை எடுக்கும் முன்பே அவசரப்பட்டு எடுத்து விட அதை பிடித்துக்கொண்டு இருந்தவர் மற்றும் அதன் அருகில் இருந்தவர்கள் அனைவரையும் இழுத்துக்கொண்டு போய் விட்டார், பின் நிறுத்தி அவசரமாக இன்னொருவர் எடுத்து (பிடுங்கி) அனுப்பி வைத்தார்.

ஓட்டுனர் அலான்சோ குழுவினர் 5.8 நொடியில் நான்கு டயரையும் மாற்றி பெட்ரோல் போட்டு வண்டியை புறப்பட வைத்தார்கள்....சரவெடியாக இருந்தது.

சுருக்கமாக சொல்ல வேண்டும் என்றால் சிங்கப்பூர் அரசு Formula 1 போட்டியை மிகச்சிறப்பாக நடத்தி தான் ஒரு திறமையான அரசு என்பதை மீண்டும் ஒருமுறை நிரூபித்து விட்டது. போட்டி முடிந்தாலும் அந்த பகுதியில் உள்ளவர்களுக்கு இன்னும் கொஞ்ச நாளைக்கு கார் சத்தம் காதில் ஒலித்துக்கொண்டே இருக்கும் என்பது உறுதி.

F1 கார் பந்தயத்தை பற்றி படித்து விட்டு நீங்கள் சும்மா சென்றால் எப்படி..உங்களை அலறவைக்கும் இசையை, உடலில் மின்சார அலைகளை ஏற்படுத்தும் "ஷுமேக்கர்" பாடலையும் கேட்டு என்ஜாய் மாடி :-)