"ஸ்டாலின்" (துணை) முதல்வர் பதவிக்கு தகுதியானவரா!

நீண்ட நாட்களாக பலரும் எதிர்பார்த்துக்கொண்டு இருந்த நிகழ்வு நடந்து விட்டது, கலைஞர் அவர்கள் தன் உடல் நிலையை கருத்தில் கொண்டு ஸ்டாலினை துணை முதல்வர் பொறுப்பில் அமர்த்தி இருக்கிறார் அல்லது அடுத்த முதல்வர் என்பதற்கு அச்சாரமாக இதை செய்து இருக்கிறார்.

ஸ்டாலின் துணை முதல்வர் ஆன செய்தியை தற்போதைய கலைஞர் சர்ச்சை என்ற குறுகிய வட்டத்திற்குள் பார்க்காமல் இது பற்றி பேசுவதே சரியான ஒன்றாகும்.

ஸ்டாலின், கலைஞரின் மகன் என்ற கூடுதல் தகுதியை தவிர அவர் மற்ற எந்த எந்த விதத்திலும் தகுதியிலும் குறைந்தவரல்ல. கலைஞரின் மகன் என்ற ஒரே காரணத்திற்காக ஒரு சில சலுகைகள் அவருக்கு கிடைத்து இருக்கலாம், ஆனால் மற்றவர்கள் முகம் சுழிக்கும் வகையில் அல்லது இவருக்கு போய் இந்த பதவியா! என்று கேட்கும் அளவிற்கு இல்லாமல் அந்த பதவிக்கு தகுதியானவராகவே இருந்துள்ளார். கட்சியில் உள்ள மற்ற முக்கிய தலைவர்களுக்கு எவ்வாறு கட்சியில் முக்கியத்துவம் கொடுக்கப்பட்டதோ அதை போன்றே இவருக்கும் அதிகாரம் வழங்கப்பட்டது.

ஸ்டாலின் என்பவர் எதோ கடந்த ஐந்து வருடத்தில் கட்சியில் இணைந்து திடீரென இந்த பதவிக்கு வந்து விடவில்லை. 1970 களில் இருந்தே கட்சி பணிகளில் தன்னை இணைத்துக்கொண்டு உள்ளார். கட்சி நடத்திய மிசா சட்டம் உட்பட போராட்டங்களில் கலந்து சிறைக்கு சென்றுள்ளார்.

மேயராக இருந்த போதும், உள்ளாட்சி துறை அமைச்சராகவும் இருந்த போதும் இவர் மீது யாராலும் பெரிதாக எந்த குற்றச்சாட்டையும் வைக்க முடியவில்லை. தன் பங்கை சிறப்பாக செய்து இருந்தார். அதே போல பெருமளவில் மக்களை தனது செயல்பாடுகளால் கவர்ந்து இருந்தாரா என்பதும் சந்தேகமே!

ஸ்டாலின் மற்ற அரசியல்வாதிகளை போல அதிரடி அரசியல் செய்வது இல்லை, கலைஞரை போல ஸ்டாலின் மக்களை கவர்ந்து இருக்கிறாரா! என்றால் இல்லை என்று தான் கூறுவேன். ஆனால் அவர் மேயராக இருந்த சமயங்களில் மற்ற அமைச்சர்களெல்லாம் குற்றசாட்டுகளில் அடிப்பட்ட போது இவர் இருக்கும் இடமே தெரியாமல் இருந்தார். அப்போது நான் கூட ஆச்சர்யமாக நினைத்ததுண்டு ஸ்டாலின் இப்படி ரொம்ப அமைதியா இருக்கிறாரே என்று மற்றவர்களை ஒப்பிடும் போது.

கலைஞர் மீது அடுக்கடுக்காக குற்றச்சாட்டுகளை கூறிக் கொண்டு இருக்கும் பலரும் ஸ்டாலின் மீது குற்றம் சாட்ட காரணத்தை தான் தேட வேண்டும். கலைஞரை பிடிக்காத "சோ" அவர்களே ஸ்டாலின் முதல்வர் ஆவதை வரவேற்றவர், ஸ்டாலினுக்கு முதல்வர் பதவிக்கு தகுதியானவர் என்று "துக்ளக்" பத்திரிகையில் கூறியவர்.

தமிழக அரசியலில் கேவலமான ஒரு நடைமுறை உண்டு, இரு பெரும் கட்சி தலைவர்களான கலைஞரும் ஜெ'வும் பொது இடங்களில் எதேச்சையாக பார்க்க வேண்டி இருந்தாலும் பேசிக்கொள்ள மாட்டார்கள், அறிக்கையில் மட்டுமே பேசிக்கொள்வார்கள். இந்த விசயத்தில் வட மாநில அரசியல்வாதிகளை பாராட்டலாம். அப்படிப்பட்ட சூழ்நிலையில் நிவாரண நிதியை ஜெ'விடம் ஈகோ பார்க்காமல் ஸ்டாலின் சென்று கொடுத்து வந்தது பலரை புருவம் உயர்த்த வைத்து.

தற்போது வைகோ திமுக வில் இருந்து இருந்தால் கண்டிப்பாக ஸ்டாலினுக்கு பெரும் பிரச்சனையாக இருந்து இருக்கும், அன்பழகன் அவர்களுக்கும் வயதாகி விட்டதால் ஸ்டாலினுக்கு பதவி ஏற்பதில் எந்த பெரிய தடையும் இல்லை. கலைஞர் மீது வாரிசு அரசியல் செய்கிறார் என்ற குற்றச்சாட்டுண்டு, அதில் எந்த சந்தேகமும் இல்லை. ஆனால் ஸ்டாலினுக்கு பதவி என்பது வாரிசு அரசியல் என்ற நிலையை தாண்டி கட்சியில் பல காலம் இருந்தவர் என்ற முறையில் (கட்சி தலைவர் மகன் என்ற கூடுதல் சலுகை இருந்தாலும்) அவர் (துணை) முதல்வர் பதவிக்கு தகுதியானவரே.

தற்போதைய ஈழம் பிரச்சனையில் கலைஞர் அவர்கள் மிகவும் மோசமாக நடந்து கொண்டதாலே மற்றும் வாரிசு அரசியல் செய்ததாலே திமுக பலரின் வெறுப்புக்கு ஆளாகி இருந்தது, இருப்பினும் மக்கள் அவர்களுக்கு வெற்றியே கொடுத்துள்ளார்கள். கலைஞருக்கு பிறகு ஸ்டாலின் அவர்கள் சிறப்பாக வழி நடத்துவார் என்று நம்புவோம். ஸ்டாலின் அவர்கள் கலைஞரை போல வழவழ கொழ கொழ முடிவுகளை எடுக்காமல் உறுதியான முடிவுகள் எடுத்து வெற்றி பெற வாழ்த்துவோம்.