"ரஜினி" திரைப்பட முதல் காட்சி (FDFS) அனுபவங்கள் (இறுதி பகுதி)

சந்திரமுகி பரபரப்பு முடிவதற்குள்ளே எவருமே எதிர்பாராத அறிவிப்பு ரஜினியின் அடுத்த படத்தை ஷங்கர் இயக்குவதாக...ரசிகர்கள் அனைவரும் அடைந்த சந்தோசத்திற்கு அளவே இல்லை. காரணம் ஷங்கர் ஒரு ஃபாண்டஸி இயக்குனர் என்பது அனைவருக்கும் தெரியும், அதுவுமில்லாமல் அவரது படங்களில் ஹீரோ விற்கு அதிக முக்கியத்துவம் இருக்கும். பலரும் ரஜினி ஷங்கர் படத்தில் நடித்தால் நன்றாக இருக்கும் என்று நினைத்துக்கொண்டு இருந்த வேளையில் இப்படி அதிரடியாக உடனே அறிவிப்பு வந்ததை பலரும் எதிர்பார்க்கவில்லை. என்னை போல ஷங்கர் படம் பிடிக்கும் ரசிகர்களுக்கு சொல்லவே தேவையில்லை.

படத்திற்கு பூஜை எல்லாம் மிகவும் எளிமையாகவே நடந்தது. படம் எடுக்க தாமதமானாலும் படம் நன்றாக வரும் என்பதில் அனைவருக்கும் நம்பிக்கை, காரணம் ஷங்கர் திரைக்கதை அமைப்பதில் வல்லவர், படத்தை முதலில் இருந்து கடைசி வரை விறுவிறுப்பு குறையாமல் கொண்டு செல்பவர். இவருடன் வந்த இயக்குனர்கள் பலர் சரக்கு தீர்ந்து போய் விட இவர் மட்டும் பட்டய கிளப்பிட்டு இருக்காரு.

சிவாஜி படத்திற்கு வட மாநில தொலைகாட்சி நிறுவனங்கள் கொடுத்த முக்கியத்துவத்தை பார்த்து பல "கான்" களுக்கு தூக்கம் போய் இருக்கும், அந்த அளவிற்கு போட்டி போட்டு சிவாஜி செய்திகள் கூறின, அதுவும் IBN live அறிவிக்கப்படாத ரஜினி டிவி யை போல செயல்பட்டது.

படம் வெளியான வாரத்தில் எனக்கு உடல் நிலை சரியில்லாமல் போய் விட்டது. எனக்கு செம கடுப்பு என்னய்யா! இது தலைவர் படம் வரும் நேரத்தில் இப்படி ஒரு சோதனையா என்று. இதற்க்கு டிக்கெட் வாங்க அலைந்ததை போல எதற்கும் அலைந்தது இல்லை. இந்த படத்தை என் அலுவலக நண்பன் (அதி தீவிர ரசிகன்) எப்படி பார்த்தான் என்று கூறினால் ரசிகர்கள் அல்லாதவர்கள் செம டென்ஷன் ஆகி விடுவார்கள் ;-)

படம் அதிக பட்ஜெட் என்பதால் படத்தை வெளியிடும் திரை அரங்குகளின் எண்ணிக்கையும் அதிகப்படுத்தினார்கள், இதனால் இது வரை ரஜினி படம் வெளியாகாத திரை அரங்குகளில் கூட சிவாஜி வெளியாகியது. ஹிந்தி படங்களே அதிகம் வெளியிடப்பட்ட மெலோடி திரை அரங்கில் சிவாஜி வெளியிடப்பட்டது. அதில் எனக்கு படம் வெளியாகும் நாளுக்கு முந்தைய நாளே டிக்கெட் கிடைத்தது, என் இன்னொரு நண்பன் அழைத்தும் என் உடல் நிலை சரி இல்லாததால் என்னால் செல்ல முடியவில்லை, செல்லவில்லையே தவிர என் எண்ணம் முழுவதும் படத்திலேயே இருந்தது.

படம் பார்த்த என் நண்பன் இடைவேளையின் போது போன் செய்து.. படம் சூப்பர் சூப்பர் னு சொல்ல எனக்கு இருப்பு கொள்ளவில்லை..அடடா! பேசாம போய் இருந்து இருக்கலாமேன்னு மண்டைய சொறிந்தேன்....என் நண்பன் வேறு படம் செம ஸ்பீட் ..போவதே தெரியலை.. இடைவேளை வரை கலக்கல் அது இதுன்னு பில்ட் அப் கொடுக்க எனக்கு செம கடுப்பாகி விட்டது. ச்சே! பேசாம போய் இருந்து இருக்கலாம் என்று சரியாகவே தூங்கலை..

அடுத்த நாள் வழக்கமாக நான் உடன் போகும் நண்பன் போன் செய்து டேய்! டிக்கெட் எங்கேயும் கிடைக்க மாட்டேங்குது னு சொன்னவுடன் டர்ர்ர் ஆகிட்டேன்..வடை! போச்சே மாதிரி ஆகிட்டேன். டேய் எப்படியாவது வாங்கு வாங்கு என்று அவனை அனத்தி எடுக்க ..கடைசியில் அவன் நண்பர்களை எல்லாம் தொல்லை செய்து ஒருவழியா பெரம்பூர் "பிருந்தா" ல தான் இருக்காம் வாங்கட்டுமா ன்னு கேட்டான்.. டேய்! என்னடா கேட்டுட்டு இருக்கே அவனை கோழிய அமுக்குற மாதிரி அமுக்கி டிக்கெட்ட வாங்கி தொலைடா வெண்ணை! என்று திட்ட அப்புறம் வாங்கினான். சரி நீ சென்ட்ரல் வந்துடு அங்கே இருந்து ரயில் ல போய்டலாம் என்று சொல்ல சரி என்று கூறி விட்டேன்.

என் அம்மா க்கு என்னை பற்றி நல்லா தெரியும் என்பதாலும், என் உடல்நிலை பரவாயில்லை ரகமாக இருந்ததாலும் செல்ல அனுமதி கொடுத்தார்கள். இரண்டு பேரும் பிருந்தா சென்றால் அங்கே பஸ் போகவே வழி இல்லை.. திரை அரங்கு முன்பு செம கூட்டம்..அந்த சாலை ஏற்கனவே ரொம்ப சின்னது ..இதுல ரசிகர்கள் கூட்டமும் சேர்ந்ததால் நினைத்து பாருங்க. அந்த ஏரியாவே அதகளமா இருக்கு. எனக்கு உடல்நிலை வேறு சுமாராக இருந்ததால் நிக்க வேற முடியலை..செம வெய்யில் மண்டை காயுது.

டிக்கெட் கவுண்டர் கிட்ட ஒரு போர்களம் போல இருக்கு. திரை அரங்கும் வாசல் முன்பு ஒரு பெருங்கூட்டம் இருந்தது..திடீர்னு எல்லோரும் தெறிச்சு ஓடினாங்க ..எங்களுக்கு ஒன்னும் புரியல...சரி போலீஸ் தான் லத்தி சார்ஜ் பண்ணுறாங்க போல என்று ஒரு ஓரமா ஒதுங்குனோம்...அப்புறம் தான் தெரிந்தது யாரோ 1000 வாலா சரவெடி வைத்தாங்கன்னு..பட்டாசு சத்தம் ரசிகர்கள் சத்தம் எல்லாம் சேர்ந்து என் வயிற்றையே கலக்கி விட்டது..(நல்ல வேளை நீங்க நினைக்கிற மாதிரி எதுவும் ஆகல ;-) )

எங்களுக்கு முந்தைய காட்சி முடிந்த வருகிறவர்கள் எல்லாம் சட்டையை கழட்டி பிழிஞ்சுட்டு வராங்க..குளிச்ச மாதிரி ஒவ்வொருத்தரும் இருக்காங்க. என்னையா! விசயம்னு கேட்டா உள்ளே AC வேலை செய்யலைன்னு சொல்லிட்டு அதை பற்றி கவலைப்படாம படம் சூப்பர் சூப்பர் னு நம்ம கேட்டதையே காதுல வாங்கிக்காம போயிட்டு இருக்கானுக .. என் நண்பன் அப்பவே படம் நல்லா இருக்குன்னு சொன்னாலும் ..நமக்கு நிம்மதி ஆகுமா..சரி இவங்க கிட்டேயும் கேட்போம்னு கேட்டா! நான் கேட்பதையே காதுல எவனும் வாங்க மாட்டேங்குறான்.. அடப்பாவிகளா! படம் எப்படி இருக்குதுன்னு சொல்லி தொலைங்கடான்னு திட்டலாம்னு பார்த்தா ..அந்த ஆளு அயோத்தி குப்பம் வீரமணி மாதிரி இருந்தாரு..எதையாவது கேட்டு நம்மை மூஞ்சியை பேத்துட்டா என்ன செய்வது என்று மேலும் கேட்கலாம் என்று இருந்த யோசனையை கை விட்டேன்.

இந்த முறை பால்கனி ல இடம், அதனால கொஞ்சம் வருத்தம், ஸ்க்ரீன் பக்கத்துல கிடைக்கவில்லை என்று. விளம்பர சிலைடு போட்டு அதில் ரஜினி படம் வந்தாலே பயங்கர சத்தம், விசில். படம் ஆரம்பித்த வுடன் ஒண்ணுமே தெரியலை..அட! ஆமாங்க எல்லோரும் சேர்ல ஏறி நின்னுட்டாங்க..அடேய்! உட்காருங்க உட்காருங்க என்று கொஞ்சம் பேரை அமைதி செய்து உட்காரவைப்பதற்க்குள் படமே 5 நிமிடம் போய் இருக்கும். செம டென்ஷன் ஆகி விட்டது..எவனும் சொன்னாலும் கேட்க மாட்டேங்குறான். ரஜினி வந்ததையே பார்க்க முடியலை..

ஸ்டைல்! பாட்டு போட்டாங்க அவ்வளோ தான் ...ஏற்கனவே சுமாரா இருந்த நான் டோட்டல் டேமேஜ் ஆகிட்டேன். எல்லோரும் ஆடிய ஆட்டத்தில் எனக்கு மயக்கம் வர மாதிரி ஆகி விட்டது AC வேறு வேலை செய்யவில்லை. ஓவரா கத்தியதில் தொண்டை வேறு கட்டி விட்டது. பாட்டு முடிந்தது அனைவரும் ஒன்ஸ் மோர் கேட்க ஆபரேட்டர் கண்டுகொண்டதாகவே தெரியலை..எல்லோரும் எழுந்து ஆபரேட்டர் அறையை பார்த்து கத்துறாங்க..ம்ஹீம் அவரு அசைந்தே கொடுக்கவில்லை ..போலீஸ் வேற முன் வரிசை ரசிகர்கள் பக்கம் லத்தியை சுழட்டிடு இருக்காங்க ..திடீர்னு எதுவும் திரையில் தெரியவில்லை சத்தம் மட்டும் கேட்குது.. என்னடா இதுன்னு திரும்பி பார்த்தால் ஒரு கடுப்பான ரசிகர் தன்னோட சட்டையை கழட்டி ப்ரொஜக்டர் ரூம் ஓட்டையை அடைத்து விட்டார் ஹா ஹா ஹா அப்புறம் எங்க படம் தெரியும்..

அப்புறம் அதை எடுக்க கூறி எடுத்த பிறகும் ரசிகர்கள் தொடர்ந்து கத்தியும் போடவில்லை..பிறகு தான் அந்த ரணகளம் நடந்தது..கடுப்பான ரசிகர் ஒருவர் தன்னிடம் இருந்த வாட்டர் பாட்டிலை எடுத்து ஸ்க்ரீனை நோக்கி வீச ஸ்க்ரீன் டர்ர்ர்ர்ர் ஆகி விட்டது..ஆமாங்க ஸ்க்ரீன் கிழிந்து விட்டது. இன்னும் ஆவேசமான ரசிகர்கள் சேர் எல்லாம் எடுத்து போட ஆரம்பிக்க ..பிறகு ஒரு சிலைடு வந்தது இப்படி "ரசிகர்கள் அமைதி காக்கவும், உங்கள் விருப்பத்திற்காக இந்த பாடல் மீண்டும் ஒரு முறை ஒளிபரப்பப்படுகிறது" என்று.. உடனே ஒரு ரசிகர்..இதை முன்னாடியே செய்து இருந்தா ஸ்க்ரீனாவது கிழியாம இருந்து இருக்கும் என்று கமெண்ட் அடிக்க எல்லோரும் சிரித்து விட்டார்கள்.

அப்புறம் என்னால கத்த முடியல தொண்டை கட்டி கொண்டதால், வேற வழி இல்லாம கம்முனு உட்காந்துட்டேன். தலைவர் கோர்ட்ல அனைத்தையும் இழந்து வெளியே வரும் போது, சுமன் அவரிடம் வந்து இனி என்ன வேலை செஞ்சு பிழைக்க போறே கண்டக்டரா, பால்காரனா, ஆட்டோ வா இப்படி கேட்டுக்கொண்டு இருக்கும் போது இருக்கிற அனைத்து "நல்ல" வார்த்தைகளும் சுமன் மீது, செருப்பெல்லாம் ஸ்க்ரீன் க்கு பறக்குது. சுத்தி முற்றி பார்த்தேன் பெண்கள் யாரும் இல்லை.. நல்லவேளை டா சாமின்னு நினைத்தேன். சுமன் இதை எல்லாம் கேட்டு இருந்தா அவ்வளோ தான்..வெறுத்தே போய் இருப்பாரு. அதே போல ஸ்ரேயா தலைவரை கருப்புன்னு சொன்னவுடன் போச்சுடா ஸ்ரேயா நிலைமை காலி ன்னு நினைக்கும் போது நல்லவேளை விவேக் அதை காமெடி செய்து நம் மக்களை கூல் செய்துட்டாரு இல்லைனா..ஸ்ரேயா பரம்பரையையே இழுத்து இருப்பாங்க :-))) ரஜினியை சுமன் போலீஸ் ஸ்டேஷன் ல வைத்து அடிக்கும் போதும் மேற்கூறிய நிகழ்வு தான்.

கடைசில ரஜினி மொட்டை பாசாக வரும் போது எழுந்த விசில் சத்தம் காது பஞ்சர் ஆகாது தான் பாக்கி. ரசிகர்களை அந்த காட்சி வெகுவாக கவர்ந்து விட்டது. அதுவும் அந்த காட்சியில் ரஜினி ரொம்ப கூலாக நடித்து இருப்பார்..

படம் பார்த்து விட்டு வீட்டிற்கு போன கொஞ்ச நேரத்தில் என் அக்கா வீட்டுகார் போன் செய்து கிளம்பி ரெடி ஆகி இரு மாயாஜால்ல பசங்க டிக்கெட் எடுத்து வைத்து இருக்காங்க நான் உன்னை வந்து கூட்டிகிறேன்னு சொன்னாரு....ஆகா! மறுபடியுமா.. டேய்! கிரி உனக்கு சங்கு தாண்டின்னு முடிவு செய்துட்டேன். என் அம்மா கிட்ட சொல்லிட்டு மறுபடியும் என் மச்சான் நண்பர்களுடன் திரும்ப ஒருமுறை. ஆனால் அங்கே முதல் வரிசை, நான் ஏற்கனவே முக்கால்வாசி காலி மற்றும் தொண்டை வேறு கட்டி விட்டதால் பேசாம கம்முனு உட்காந்து வந்து விட்டேன்.

அடுத்ததாக எந்திரன் படம் அறிவிப்பு வெளியானது அது முடிய தாமதமாகும் என்பதால் இடையில் ரஜினி அவரது குருநாதருக்காக செய்து கொடுத்த படம் தான் குசேலன். ரஜினி இதில், தான் 25% பகுதியில் தான் நடித்து இருக்கிறேன் என்று கூறி இருந்தார் அதையும் மீறி எதிர்பார்ப்புகள் வழக்கம் போல. இங்கே சிங்கையில் நம்ம ஊரில் வெளியாகும் முன்பே குசேலன் வெளியாகி விட்டது. நானும் முன்பதிவு செய்து படம் பார்த்தேன். சிங்கை என்பதாலும் இது முற்றிலும் ரஜினி படம் இல்லை என்பதாலும் ஆராவாரம் குறைவாகவே இருந்தது பெண்களும் அதிக அளவில் வந்து இருந்தனர்., ஆனால் படம் முடிந்து வந்து எந்த எதிர்மறையான கருத்துக்களும் யாரும் கூறவில்லை.

ஆனால் அன்று மாலை விதி வேறு ரூபத்தில் வந்து விட்டது, ரஜினி பெங்களூர் விநோயகஸ்தர்கள் கேட்டு கொண்டதற்காக கருத்து கூற போக, அதை ஊடகங்கள் பெரிய பிரச்சனை ஆக்கி விட்டன. குறிப்பாக சன் டிவி தனக்கு டிவி பட உரிமை கிடைக்கவில்லை என்ற ஆத்திரத்தில் ரஜினி மன்னிப்பு கேட்டதாக ஃபிளாஷ் செய்தி போட, ஒட்டு மொத்த மக்களும் கோபம் அடைந்து விட்டார்கள், இதில் பல ரஜினி ரசிகர்களும் அடக்கம் அப்புறம் எங்கே மற்றவர்களை குறை கூறுவது. நம்ம மக்கள் தான் வச்சா குடுமி சரைச்சா மொட்டை ஆச்சே..எதையும் பொறுமையாகவே யோசிக்க மாட்டாங்க.

ரஜினி க்கு கர்நாடகாவில் படம் வெளியாவதால் எந்த லாபமும் இல்லை, பலன் அடைவது விநோயகஸ்தர்கள் மற்றும் தயாரிப்பாளர்கள் மட்டுமே. இதை யோசித்து இருந்தாலே போதுமானது. ஆனால் ரஜினி இதற்க்கு விளக்கம் கொடுக்க தாமதமானதாலும் இதை பலர் உணரும் முன்பேயே படம் போதுமான அளவிற்கு சேதத்தை சந்தித்து விட்டது. பொதுவாக கோபமான மன நிலையில் இருக்கும் எவருக்கும் படம் பார்த்தால் கண்டிப்பாக படம் பிடிக்காது, அதுவே இந்த படத்தின் தோல்விக்கு முக்கிய காரணம்.

இவை தவிர படத்தின் தோல்விக்கு நான் கருதும் காரணங்கள்

ரஜினி பல முறை கூறியும் படம் அதிகவிலைக்கு விற்கப்பட்டது

குறைந்த காட்சிகளே வருகிறேன் என்று ரஜினி கூறியும் படம் முழுவதும் வருவதாக விளம்பரப்படுத்தப்பட்டது

அதிக திரை அரங்குகளில் வெளியிடக்கூடிய படமல்ல இது என்று கூறியும் அதிக திரை அரங்குகளில் வெளியிடப்பட்டது

ஒட்டு மொத்த ஊடகங்களும் ரஜினி என்னவோ இவர்கள் சொத்தை அபகரித்து கொண்டதை போல தாறுமாறான செய்திகள் வழங்கின.

உலகத்திலேயே எவரும் பண்ணாத சாதனையை நமது திரை அரங்கு உரிமையாளர்கள் யாரோ தூண்டுதலில் செய்தார்கள், அது.. படம் ஃப்ளாப் ஆகி விட்டது என்று படம் வெளியாகி நான்காவது நாளே போர்க்கொடி தூக்கினார்கள். நான்கு நாளில் படம் ஃப்ளாப் என்று நஷ்ட ஈடு கேட்டது உலகத்திலேயே இவர்கள் தான் முதலாக இருக்கும். இதற்காக இவர்களை கின்னஸ் சாதனைக்கு பரிந்துரைக்கலாம். அது எப்படியா! ரஜினி படத்தை வைத்து இது வரை எவ்வளோ சம்பாதித்து இருப்பீங்க.. அந்த நன்றி கொஞ்சம் கூட இல்லாமல் எப்படி உங்களால் இப்படி பணம் பணம் என்று கீழ்த்தரமாக நடந்து கொள்ள முடிகிறது. ஆண்டவன் என்று ஒருவன் இருந்தால் இதற்காக கண்டிப்பாக நீங்கள் தண்டிக்கப்படுவீர்கள்.

இன்னொரு பகுதி... படத்தில்

படத்தில் வடிவேல் சம்பந்தப்பட்ட இரட்டை அர்த்த வசனங்கள் மற்றும் சில காட்சிகள், தேவையில்லாமல் வாசு புகுத்தி தாய்க்குலங்களின் வெறுப்பை சம்பாதித்து விட்டார்

கேள்வி பதில் வைக்கிறேன் என்று நான் படத்திற்காக தான் கூறினேன் என்று கூறிய வசனம் ரசிகர்களை ஆத்திரப்பட வைத்துவிட்டது.

மற்றபடி குசேலன் நல்ல படமே தனிப்பட்ட விருப்பு வெறுப்புகளால் இந்த படம் தோல்வி அடைய செய்யப்பட்டது (தோல்வி அடையவில்லை)

வலைஉலகத்தில் பொதுவாக ரஜினியை கிண்டல் செய்து பதிவுகள் வரும் (என்னவோ தங்களை அதி புத்திசாலிகளாக நினைத்து) அதுவும் இந்த சமயத்தில் வந்த பதிவுகளில் மிக மிக அசிங்கமாக தங்கள் எண்ணங்களை வெளிப்படுத்தினார்கள், குறைந்த பட்ச நாகரீகம் கூட இல்லாமல் அனைவரும் தாறுமாறாக பதிவுகள் எழுதினார்கள், புதியவர்களுக்கு இது பற்றி தெரியாது. இந்த படத்தை என்னவோ ஷகிலா பட ரேஞ்சுக்கு பேசியதை நினைத்து வந்த ஆத்திரத்திற்கு அளவே இல்லை. அப்போது நான் நினைத்தது "ரஜினியை விட ரஜினிக்கு ரசிகனாக இருப்பது ரொம்ப சிரமம்" என்று

இந்த நேரத்தில் ரஜினி ரசிகர்கள் அடைந்த மன உளைச்சல் கொஞ்ச நஞ்சமல்ல, இந்த சமயத்தில் ரசிகர்களுக்கு தெளிவான விளக்கங்களை கொடுத்தது rajinifans.com, சுந்தர்(onlysuperstar.com) மற்றும் வினோ(envazhi.com) இவர்கள் மட்டும் எதுவும் கூறவில்லை என்றால் ரசிகர்கள் பலர் வாழ்க்கையே வெறுத்து போய் இருப்பார்கள், அந்த அளவிற்கு அனைவரும் ஒரு வழி ஆகி விட்டார்கள் மற்றவர்கள் கிண்டலாலும் மற்றும் சரியாக புரிந்து கொள்ளாததாலும். இதற்காக இவர்களுக்கு எவ்வளோ நன்றி கூறினாலும் பத்தாது.

தற்போது பல நிகழ்ச்சிகளை தாண்டி வந்தாச்சு, காலமே காயத்திற்கு மருந்து என்பதை போல அந்த மிக வருத்தமான சம்பவங்கள் தற்போது ஆறிவிட்டன. அனைவரும் நினைத்து கொள்வது எந்திரன் படத்திற்கு இந்த படம் திருஷ்டி கழிந்து விட்டதாக என்பது தான். இத்தனை நடந்தும் பலர் கிண்டல் செய்தும் ரஜினி இன்னும் அதே உச்சத்தில் இருப்பது, நிஜமான ஃபீனிக்ஸ் பறவை ரஜினி என்பது சொல்லி தெரிய வேண்டியதில்லை. இதே வேறு ஒருவராக இருந்து இருந்தால் என்ன ஆகி இருக்கும் என்று தெரியவில்லை. அனைத்து எதிர்ப்புகளையும் சகதிகளையும் ஏச்சு பேச்சுகளையும் மன உளைச்சல்களையும் தைரியமாக எதிர் கொண்டார் குறிப்பாக எந்த ஒரு இடத்திலும், நிலையிலும் தன்னை பற்றி அவதூறு கூறியவர்களை அநாகரீகமாக ஒரு வார்த்தை கூறவில்லை., தலைவா! இதற்காக தான் மீது பலர் உன் மீது பைத்தியமாக இருக்கிறார்கள். பொறுமை என்னவென்று ரஜினியை பார்த்தால் போதும்.

குசேலனில் நடந்த சங்கடங்கள் எந்திரனில் கண்டிப்பாக தீரும் என்று நம்புவோம்.. எந்திரன் படம் 2010 ஏப்ரல் வெளியாகும் என்று நினைக்கிறேன். குசேலன் சமயத்தில் நம்மிடம் கேவலமாக நடந்து கொண்டவர்களுக்கு எந்திரன் படம் வெளியாகி வெற்றி பெரும் நாள் அன்று இருக்கு "தீபாவளி" [அது ஏப்ரல் மாதமாக இருந்தாலும் ;-)].

இந்த வீடியோ ஒன்று போதும்னு நினைக்கிறேன்... எதுக்குன்னு நீங்களே முடிவு செய்துக்குங்க ;-)

இது வரை எனது அனைத்து பாகத்திற்கும் உற்சாகமளித்த ரசிகர்கள் அனைவருக்கும் என் மனமார்ந்த நன்றிகள். முதலில் ஒரு பதிவு தான் எழுத நினைத்து இருந்தேன், பின்னர் இரண்டு தற்போது மூன்றாவது பாகம் வரை வந்து விட்டது தலைவரின் அன்பு ரசிகர்களின் வேண்டுகோளுக்காக. என் வலைத்தளம் ரஜினி ரசிகர்களை மட்டுமே கொண்டதல்ல..பல்வேறு ரஜினி ரசிகர்கள் அல்லாதவர்களும் படிப்பதால் இதற்கும் மேல் தொடர்ந்தால் அது அவர்களுக்கு வெறுப்பாக இருக்கும் என்பதால் இதோடு மனநிறைவுடன் முடித்து கொள்கிறேன் (அளவிற்கு மீறினால் அமிர்தமும் நஞ்சு). இன்னொரு சமயத்தில் மறுபடியும் தலைவரின் பக்காவான இடுகையுடன் சந்திக்கிறேன்

அன்புடன்

கிரி