பிரிவு பிரபலங்களுக்கு இழப்பு ரசிகர்களுக்கு (பாகம் 3)

செல்வராகவன் - யுவன்ஷங்கர் ராஜா

தற்போதைய இளசுகளை மயக்கிய கூட்டணி இது, இவர்கள் கூட்டணியில் ஒரு படம் கூட பாடல்கள் சரி இல்லை என்று கூற முடியாது, அந்த அளவிற்கு இவர்கள் இருவருக்கும் கெமிஸ்ட்ரி வேலை செய்தது. துள்ளுவதோ இளமை (இதில் செல்வராகவன் இயக்குனர் இல்லை ஆனால் இயக்குனர்) படத்தில் இருந்து தொடர்ந்த இவர்கள் இணை "ஆயிரத்தில் ஒருவன்" படத்தில் பாதி வேலையிலே முடிவு பெற்றது.

"7 G ரெயின்போ காலனி" படத்தின் பாடல்களை எவராலும் மறக்க முடியாது, அந்த படம் வெளிவந்த சமயத்தில் இந்த படத்தின் பாடல்களை முணுமுணுக்காத இளசுகள் மிக குறைவு. இந்த படத்தில் வரும் "நினைத்து நினைத்து" என்ற மெலோடி பாடலை கேட்கும் எவரும் உருகி விடுவார்கள், அந்த அளவிற்கு அற்புதமாக இருக்கும். யுவனை சிறப்பாக பயன்படுத்தி கொண்ட இயக்குனர்கள் செல்வராகவன், அமீர், பாலா, இதில் செல்வராகவன் குறிப்பிடத்தக்கவர். அவருடைய "புதுப்பேட்டை" படம் ஒன்று சிறப்பான எடுத்துக்காட்டாக கூறலாம், அதில் உள்ள பின்னணி இசை இது வரை வந்த யுவனின் படங்களிலே சிறந்த பின்னணி இசையாக கூறலாம். படம் சரியாக போகாததால் இசையும் கவனிக்கப்படாமலே போய் விட்டது, இதில் எனக்கு வருத்தம். எனக்கு மிகவும் பிடித்த படங்களில் "புதுப்பேட்டை"யும் ஒன்று பின்னணி இசைக்காகவும் சேர்த்து.

தற்போது கருத்துவேறுபாடு காரணமாக இருவரும் பிரிந்து விட்டார்கள். செல்வராகவன் G.V பிரகாஷுடன் இணைந்து விட்டார். காரசாரமாக இருவரும் மாற்றி மாற்றி பேட்டி கொடுத்து கொண்டு இருந்தார்கள். இவர்கள் மீண்டும் இணைவார்களா! காலம் தான் பதில் கூற வேண்டும்.

கெளதம் - ஹாரிஸ் ஜெயராஜ்

இவர்கள் இருவருமே தங்கள் திரை வாழ்க்கையை "மின்னலே" என்ற படத்தின் மூலம் தொடங்கினார்கள், அந்த படத்தில் இருந்து "வாரணம் ஆயிரம்" வரை ஒன்றாக பணி புரிந்தனர், இவர்கள் இணையில் "பச்சை கிளி முத்துச்சரம்" மட்டுமே பாடல் ஹிட் ஆகவில்லை, அதிலும் ஒரு சில பாடல்கள் பலரால் விரும்பப்பட்டது. மற்றபடி அனைத்து படங்களின் பாடல்களும் சூப்பர் ஹிட் தான் தற்போதைய "வாரணம் ஆயிரம்" வரை. "மின்னலே" படத்தில் வரும் "வசீகரா" பாடல் இன்றும் பலரால் விரும்பி கேட்கப்படும் மெலோடி பாடல். இவர்கள் கூட்டணியில் குறிப்பிடத்தக்க இன்னொருவர் பாடலாசிரியர் "தாமரை", பாடலில் ஆபாசம் கலக்காமல் பாடல்களை கொடுத்த இவர் பாராட்டுக்குரியவர்.

கடைசியாக வந்த "வாரணம் ஆயிரம்" படம் இருவருக்கும் (தற்போது) கடைசி படம் ஆகி விட்டது. கலந்து ஆலோசிக்காமல் முடிவெடுப்பதாக கூறி உறவை முறித்து கொள்வதாக ஹாரிஸ் கூறிவிட்டார். இனிமேல் எப்போதுமே கெளதம் உடன் பணி புரியபோவதில்லை என்று இறுதியாக கூறி அனைவரையும் அதிர்ச்சி அடைய வைத்து விட்டார். அவசரப்பட்டு இப்படி கூறி விட்டாரோ என்று தோன்றுவதை தவிர்க்க முடியவில்லை. தற்போது கெளதம், A.R.ரகுமானுடன் இணைந்து விட்டார், இவர்கள் சண்டையாலோ என்னவோ A.R.ரகுமானை புகழ்ந்து பேட்டி கொடுத்துக்கொண்டு இருக்கிறார்.

ஊடகங்களுக்கு இந்த இரண்டு ஜோடியும் தங்கள் கருத்து வேறுபாடுகளை பற்றி வெளிப்படையாக தெரிவித்து இருப்பதால், திரும்பவும் இணைவது சிரமமே அப்படி இணைந்தாலும் காலம் அதிகம் எடுக்கும் என்றே கருதுகிறேன்.

இவ்வாறு பிரிந்த பிரபலங்கள் மட்டுமல்ல நம்மை போன்ற சாதாரணமானவர்களுக்கும் என் பார்வையில் தோன்றுவது, "நெருங்கி வந்தால் விலகி விடுவீர்கள், விலகி இருக்கும் வரையே நெருங்கி இருப்பீர்கள்". அளவான நெருக்கம் அல்லது சரியாக புரிந்து கொண்ட நட்பு மட்டுமே ஈகோ பார்க்காமல் நிலைக்கும். அளவிற்கு அதிகமான நெருக்கம் பல சமயங்களில் அதே அளவு பிரச்சனைகளையும் கொடுக்கும். இது அனைவருக்கும் பொருந்தும்.

எனது அடுத்த பதிவில், பிரிந்தாலும் சிறப்பாக வெற்றி பெற்ற ஒரு ஜோடியையும் மற்றும் குறிப்பிடத்தக்க சிலரையும் கூறுகிறேன்.