பிரிவு பிரபலங்களுக்கு இழப்பு ரசிகர்களுக்கு (பாகம் 1)

எப்போதும் பிரபலங்கள் என்றாலே பிரச்சனை தான், அதுவும் பிரபலங்கள் கூட்டணி என்றால் நிச்சயம் அங்கே ஈகோ பிரச்சனை வந்து விடும். இதில் இருந்து தப்பித்தவர்கள் வெகு சிலரே.

இரண்டு பேர் நெருங்கிய நண்பர்களாக இருந்தாலும், நண்பர்களாக இருந்து பின் நெருங்கி இருந்தாலும் கடைசியில் ஏதாவது கருத்து வேறுபாடு காரணமாக பிரிந்து விடுவார்கள், அல்லது ஒதுங்கி விடுவார்கள். அப்படிப்பட்ட திரை உலக பிரபலங்கள் ஒரு சில ஜோடியை பற்றி பார்ப்போம்.

முதலில் இளையராஜா - வைரமுத்து

"நிழல்கள்" படத்தின் மூலம் இவர்கள் கூட்டணி ஆரம்பமாகியது, இதில் வரும் "மடை திறந்து" பாடல், ஒரு புதிய இசையமைப்பாளன் வாய்ப்பு கிடைத்து பாடும் ஒரு பாடலாக வரும், இதில் பாடல் சிறந்ததா! இசை சிறந்ததா! என்று ஒரு போட்டியே வைக்கலாம், அந்த அளவிற்கு அற்புதமாக உணர்வுகளை வெளிக்காட்டி இருக்கும்.  இவர்கள் கூட்டணியில் வந்த பாடல்கள் பெரும்பாலும் சூப்பர் ஹிட். கண்ணதாசன் அவர்களுக்கு பிறகு அனைவராலும் தற்காலத்தில் அதிகளவில் விரும்பப்பட்ட, படும் கவிஞர்களுள் வைரமுத்து அவர்களுக்கு முக்கிய இடமுண்டு. இளையராஜா அவர்களை பற்றி யாரும் கூறி தெரியவேண்டியதில்லை. இவரது இசையில் வந்த பல பாடல்களே தற்போது பல பண்பலை வானொலிகளை வாழவைத்து கொண்டு இருக்கின்றன.

பொதுவாக இளையராஜா என்றாலே தலைக்கனம் அதிகம் என்ற குற்றச்சாட்டு உண்டு, திறமையுள்ளவர்களுக்கு இயல்பாகவே வருவது தான் அது. வைரமுத்து மனதில் உள்ளதை அப்படியே கூறி விடுபவர் சில சமயங்களில், நாம் கூறுவது எதிர் நபருக்கு மன வருத்தத்தை ஏற்படுத்துமே என்ற எண்ணம் இன்றி. இதை போல பல காரணங்களால் இருவரும் பிரிந்து விட்டார்கள். இன்றும் என்னதான் இளையராஜா கிராமத்து படங்களுக்கு இசையமைத்தாலும் வைரமுத்து வரிகள் இல்லாதது பெரும் குறையாகவே உள்ளது, இதே நிலைமை தான் வைரமுத்துவிற்கும். இவர்கள் இருவரும் மீண்டும் இணைவதாக செய்திகள் வந்தன ஆனால் அவை செய்திகளாகவே தான் உள்ளன, உறுதி ஆகாமல் உள்ளது. இவர்கள் எப்போது இணைவார்கள் எப்போது நல்ல பாடல்களை திரும்ப கேட்போம் என்று ஏங்காத ரசிகர்களே இருக்க மாட்டார்கள்.

இளையராஜா - பாரதிராஜா

கிராமத்து படம் என்றால் அனைவருக்கும் நினைவு வருவது இவர்கள் இருவரும் தான் என்றால் அது மிகையல்ல. உணர்வு பூர்வமான கிராமத்து இசையை இது வரை இளையராஜாவை தவிர தற்போதைய இசையமைப்பாளர்கள் எவராலும் கொடுக்க முடியவில்லை. இவர்கள் கூட்டணியில் வந்த 16 வயதினிலே, முதல் மரியாதை, அலைகள் ஓய்வதில்லை போன்ற படங்களை எவராலும் மறக்க முடியுமா! இசை நன்றாக இருந்ததா! இல்லை அதற்க்கு வடிவமைக்கப்பட்ட காட்சி அமைப்பு சிறப்பாக இருந்ததா என்று கூறமுடியாத அளவிற்கு இரண்டும் அப்போதைய டிரன்ட்டிற்கு போட்டி போட்டு இருந்தன. பல பாடல்கள் என்ன தான் சிறப்பாக இருந்தாலும் காட்சி அமைப்பு சரி இல்லை என்றால் பாடலும் சேர்ந்து சொதப்பி விடும் அல்லது பிரபலமாகமலே போய் விடும். ஆனால் இவர்கள் கூட்டணியில் ஒவ்வொரு பாடலும் அதற்க்கு பின்னணி இசையும், அதன் காட்சி அமைப்பும் அருமையாக இருந்தது.

திறமையான இசையமைப்பாளராக இருந்தாலும் திறமையில்லாத இயக்குனரிடம் ஜோடி சேர்ந்தால் ஜொலிக்காமல் போய்விட வாய்ப்புண்டு, இதற்க்கு பல உதாரணங்களை கூறலாம். ஆனால் இவர்கள் இருவருமே தங்கள் துறையில் மிக திறமையானவர்களாக இருந்ததால் ரசிகர்களுக்கு நல்ல விருந்தாக இருந்தது. ஆனால்  ஒரு கட்டத்திற்கு மேல் இருவராலும் தொடர முடியவில்லை, ஈகோ மற்றும் கருத்து வேறுபாடுகள் காரணமாக பிரிந்து விட்டார்கள். பாரதிராஜாவும் அதன் பிறகு A.R.ரகுமானை வைத்து பல படங்களை இயக்கி இருந்தாலும், சூப்பர் ஹிட் பாடல்களை கொடுத்து இருந்தாலும் உயிரோட்டமுள்ள கிராமத்து இசை என்ற இடம் வெற்றிடமாகவே இருக்கிறது. இளையராஜாவிற்கும் கிராமத்து இசையில் தன் முழு திறனை காட்ட சரியான வாய்ப்பு கிடைக்காமலே இருக்கிறது. இன்றும் நல்ல நண்பர்களாக இருக்கிறார்கள் ஆனால் தொழிலில் ஒன்றாக இணையமாட்டேன் என்கிறார்கள், யாராவது ஒருவர் மனம் விட்டு பேசி அல்லது விட்டு கொடுத்தால் கூட அவர்களது ரசிகர்கள் மனம் மகிழ்வார்கள், இவர்கள் ஒன்றாக விரைவில் இணைவார்களா மீண்டும் நல்ல இசையை தருவார்களா! என்பதை காலம் தான் கூற வேண்டும்.

மேலும் பல ஜோடிகளை பற்றி எனது அடுத்த பதிவுகளில் கூறுகிறேன்.