"Layoff" (ஆட்குறைப்பு) - என் அனுபவங்கள்+பரிந்துரைகள் ((இறுதி)பாகம் 2)

எப்போதும் தனக்கு கஷ்டம் வரும் போது தான் அதன் வலி புரியும், மற்றவர்களுக்கு ஏற்படும் போது ஓரளவிற்கு தான் உணர முடியுமே தவிர முழுதும் அறிய முடியாது..அதனால தான் முன்னாடியே சொல்லிட்டாங்க போல "தனக்கு வந்தா தான் தெரியும் தலைவலியும் திருகு வலியும்" என்று :-)

Layoff பற்றி கேள்வி பட்டு இருந்தாலும், தெரிந்த நிறுவனங்களில் நடந்து கொண்டு இருந்தாலும் அது பற்றி முக்கியத்துவம் கொடுக்கவில்லை நான். அது நமக்கே நேரும் போது தான் அதன் வீரியம் உணரமுடிந்தது.

நான் ஒரு பிரபல வங்கியில் பணி புரிந்து வருகிறேன், UNIX ஆபரேட்டிங் சிஸ்டம் ல் ப்ரோடக்சன் சர்வர் சப்போர்ட் ல் இருக்கிறேன். எங்கள் நிறுவனத்தில் layoff பற்றி எல்லாம் பேச்சே அடிபடவில்லை அதனால் அது பற்றி நினைப்பு இருந்தாலும் பெரிதாக அலட்டிக்கொள்ளவில்லை.

நானும் என் டீமில் உள்ள பெண் நண்பரும் பேசி கொண்டு இருந்தோம், எங்க TL(team leader) வந்து அந்த பெண்ணை தனியே அழைத்து சென்றார். எதற்கு இவரை கூட்டிக்கொண்டு கொண்டு செல்கிறார், ஏதாவது பிரச்சனையா என்று யோசித்துக்கொண்டு இருந்தேன், கொஞ்ச நேரத்தில் திரும்ப வந்தார் "she is leaving" னு கூறினார், எனக்கு ஒன்றும் புரியவில்லை..என்ன சொல்றீங்கன்னு கேட்டேன்..Our company has started the layoff னு சொன்னாரு எனக்கு குபீர்னு ஆகி விட்டது. என்னடா கொஞ்ச நேரம் முன்னாடி சிரித்து பேசிட்டு இருந்தோம் அதற்குள் நிலைமை இப்படி ஆகி விட்டதே என்று, அந்த பெண்ணுக்கும் அதிர்ச்சி தான் என்றாலும் அவர் ஏற்கனவே இங்கே பிடிக்கவில்லை இந்தியா செல்வதாக கூறி கொண்டு இருந்தார், எனவே மனதளவில் பெரிய பாதிப்பில்லை. இந்த நீக்கம் திறமையின் அடிப்படையில் அல்ல.

இன்னொரு டீமில் ஒருத்தர் விடுமுறையில் இந்தியா சென்று இருந்தார் அவருக்கு அவருடைய TL போன் செய்து வேலையை விட்டு நீக்கியதாக கூறி விட்டார், குழந்தை பெறுவதற்காக விடுப்பில் இருந்த ஒரு பெண்ணுக்கும் இதே நிலைமை.

ஒரு சிலருக்கு வேலையை விட்டு நீக்கிய செய்தி கூறியவுடன் செக்யுரிட்டி உடன் வெளியே சென்று விடப்பட்டனர், அவர்களால் திரும்ப மெயில் மற்றும் எதையும் அக்சஸ் செய்ய முடியாது, என்ன நடந்தது என்பதை உடன் பணி புரிபவர்களிடமும் கூற முடியாது அப்போதைக்கு.

இதில் நிரந்தர மற்றும் ஒப்பந்த ஊழியர் என்று எந்த பாகுபாடும் இல்லை. எவரை வேண்டும் என்றாலும் உடனடியாக நீக்குகிறார்கள். உடனடியாக என்றால் உடனடியாக தான், மீட்டிங் முடிந்து வெளியே வந்தால் வீட்டிற்கு போக வேண்டியது தான்

இதில் ஒரு ஊழியரின் திறமையை வைத்து மட்டும் நீக்குவதில்லை, அவருடைய சம்பளம் அதிகம் இருந்தாலும், கடைசியாக சேர்ந்தவர் என்று எதையும் அறுதியிட்டு கூற முடியாத அளவிற்கு நீக்கம் உள்ளது.

இதை போல பல செய்திகள் உள்ளன,  இது என் நிறுவனத்தில் மட்டுமே நடந்தது என்று எண்ண வேண்டாம், பல நிறுவனங்களில் இதை போல நடந்துள்ளது, நடந்து கொண்டு இருக்கிறது. இவை யாவும் வெளிநாடுகளில் நடந்தவையை அடிப்படையாக வைத்து கூறி இருக்கிறேன். இந்தியாவில் இந்த அளவிற்கு மோசம் இருக்காது என்று நம்புகிறேன்.

மேலே சிலதை நான் எதற்கு கூறினேன் என்றால், எது எப்போது நடக்கும் என்று யாருக்கும் தெரியாது. மிகவும் அசால்ட்டாக எடுத்துக்கொள்ளாமல் நிலைமை உணர்ந்து நடந்து கொள்ளுங்கள் எதற்கும் தயாராக இருங்கள் என்று அறிவுறுத்தவே. எதற்கும் தயாராக இருந்து கொண்டால் பாதிப்பு ஏற்பட்டாலும் அதன் அதிர்ச்சியை நம்மால் தாங்கி கொள்ள முடியும்

என்னுடைய சில பரிந்துரைகள்

தற்போது உள்ள நிறுவனத்தில் இருந்து வேறு நிறுவனத்திற்கு மாற முயற்சிக்காதீர்கள் காரணம் புதியவராக இருந்தால் வேலைய விட்டு நீக்கப்படுவதில் அவர்களுக்கே வாய்ப்பு அதிகம் (Last joinee first out)

தற்போதுள்ள வேலையில் தவறுகள் ஏற்படாமல் பார்த்து கொள்ளுங்கள்

நீங்கள் செய்யும் வேலையை மற்றவர்களுக்கு அறிய படுத்துங்கள் (visibility)

முடிந்த வரை உங்கள் மேலதிகாரியுடன் முறைத்து கொள்ளவேண்டாம் மற்றும் உங்கள் டீம் சம்பந்தப்பட்ட இடங்களில் தேவை இல்லாத பிரச்னையை கிளப்ப வேண்டாம்

முறுக்கி கொண்டு நிற்பது எல்லாம் தற்போது வேலைக்காகாது என்பதை உணருங்கள்

முடிந்தால் ஏதாவது certification (இது ஐ டி துறையை சேர்ந்தவருக்கு) முடித்து வையுங்கள்

உங்களுக்கு வேலை எதுவும் இல்லை என்பதை காண்பித்து கொள்ளாதீர்கள் (உண்மையிலேயே ஒரு சிலர் பிராஜக்ட் இல்லாமல் வேலை இல்லாமல் இருக்கிறார்கள் அதனால் கட்டாய விடுப்பு அளிக்கப்படுகிறது, இது அவர்களுக்கல்ல) ஏதாவது வேலையை நீங்களே எடுத்து போட்டு செய்யுங்கள்

2009 வருடம் (குறிப்பாக முதல் ஐந்து மாதம்) எந்த  ஒரு பெரிய ரிஸ்க் ம் எடுக்க வேண்டாம்

புதிய ஆடம்பர பொருட்கள் அல்லது விலையுயர்ந்த பொருட்கள், வாகனங்கள் எதுவும் வாங்காதீர்கள், குறிப்பாக வெட்டி செலவு செய்யவே வேண்டாம்

முடிந்த வரை சேமிப்பில் கவனம்  செலுத்துங்கள், பின்னாளில் வேலையில் பிரச்சனை என்றால் சமாளிக்க உதவும்

என் ப்ராஜக்ட் முடிவதால் ஏப்ரல் வரையே என் வேலை உறுதி செய்யப்பட்டுள்ளது (அதே பெரிய விஷயம்) அதன் பிறகு இங்கேயே வேறு டீமிற்கு மாற்றி தருகிறேன் என்று கூறி இருக்கிறார்கள், இருந்தாலும் நான் எங்களுடைய இந்திய கிளைக்கு மாற்று கேட்டு இருக்கிறேன், எதுவும் உறுதி இல்லை இருந்தாலும் செய்து தருகிறேன் என்று நம்பிக்கை அளித்துள்ளார்கள். எதுவும் எப்போதும் நடக்கும் அதனால் அதை பற்றி எல்லாம் நான் நினைத்து எப்போதும் கவலைபடுவதில்லை. நடப்பதை யாரும் தடுக்க முடியாது.

என்னுடைய ஆலோசனைகள்

முதலில் எதற்கும் கவலை படாதீர்கள், யோசிப்பது வேறு கவலைப்படுவது வேறு. கவலைப்படுவதால் எந்த பிரச்சனையும் தீர்ந்து விடப்போவதில்லை. அவ்வாறு நீங்கள் கவலை பட்டுக்கொண்டு இருப்பதால் எந்த பயனும் இல்லை, நீங்கள் கவலை பட்டதை ஒரு லிஸ்ட் எடுத்து பாருங்கள் அதில் நாம் கவலை பட்டதால் எத்தனை பிரச்சனை தீர்ந்து இருக்கிறது என்று. அதன் பின் நாம் எவ்வளவு முட்டாள் தனமான காரியம் செய்கிறோம் என்று புரியும்.

தற்போது அனைவருக்கும் தேவை மன தைரியம் மட்டுமே. எது வந்தாலும் பார்த்து கொள்ளலாம் என்ற தைரியம் மனதில் இருக்க வேண்டும்.

ஒரு சிலர் கஷ்டப்படாமலே வேலைக்கு சேர்ந்து, பல ஆயிரம், லட்சம் சம்பாதித்து இருக்கலாம் அதனால் வாழ்க்கையில் கஷ்டம் என்ற நிலையை எட்டி பார்க்காமலே இருந்து இருக்கலாம். அவர்களுக்கு தற்போதைய நிலை, வாழ்க்கை என்றால் என்ன? கஷ்டங்கள் என்றால் என்ன? முக்கியமாக பணத்தின் அருமை என்ன? நாம் செய்யும் வேலையின் முக்கியத்துவம் என்ன? பணம் மட்டுமே அல்ல வாழ்க்கை அதையும் தாண்டி பெற்றோர் பாசம், ஆதரவு, நண்பர்கள் நட்பு, பணியில் கிடைக்கும் மன நிறைவு என்று பல உள்ளது என்பதை கண்டிப்பாக புரிய வைக்கும். பெரிய நிறுவனங்கள் தாங்கள் செய்த தவறுகளை திருத்தி கொள்ள இது ஒரு வாய்ப்பாக இருக்கும்.

எனவே நடப்பவை எல்லாம் நன்மைக்கே என்று நினைப்பதை தவிர வேறு வழி இல்லை, கவலை இல்லாமல் இருப்பதும் (அதற்காக எதற்கும் முயற்சி செய்யாமல் இருந்து விடாதீர்கள்) தைரியமான மனதை கொண்டு இருப்பதுமே அனைவருக்கும் தற்போது மிகவும் அவசியமான ஒன்றாகும். வரும் ஆண்டு 2009 கடும் சவால்களை ஐ டி துறை மட்டுமல்லாது அனைத்து துறையினரும் எதிர் நோக்கியுள்ளோம், எனவே உண்மை நிலை உணர்ந்து அதன் படி நடந்தால் வாழ்க்கையில் எதுவுமே ஒரு பொருட்டே இல்லை, நம்மால் எதையும் சமாளிக்க முடியும். எத்தனையோ பிரச்சனைகளை கடந்து வந்துள்ளோம் அதை போல இது ஒரு பிரச்சனை அவ்வளோ தான். இந்த சவாலை நம் சமாளிக்கும் திறனுக்கு கிடைத்த ஒரு வாய்ப்பாக கருதினால் மலையும் கடுகு. வாழ்க்கையில் நமக்கு மட்டுமே கஷ்டம் இல்லை "நமக்கும் கீழே உள்ளோர் கோடி"

பின் குறிப்பு:

மேலே கூறியவை யாவும் என் சொந்த கருத்துக்களே, எனவே எனக்கு பிரச்சனையாக தோன்றும் விஷயம் மற்றவர்களுக்கு எதுவுமில்லாத விசயமாக இருக்கலாம். இது நாம் எச்சரிக்கையாக இருந்து கொள்வதற்கான அறிவுறுத்தல் மட்டுமே.